Paliya Bible
उबजणाय कीताप 32
याकुब नी एसाव ने भेटवा नी तीयारी
याकुब बी आह़फा नी वाट्ये लाग्यो अने भगवान ना दुत तीने आय भेट्या। तीमने देखतेत याकुब केदो, “आहयो ते भगवान नो टोळो से।” एतरे तीहयो ते जागा नु नाम महनेम1 पाड़्यो।
तत्यार याकुब सेईर देस मे, मतलब एदोम देस मे, आह़फा ना भाय एसाव ने तां आह़फा नी अगळ दुत ने मोकल्यो, अने तीहयो तीमने आहयो हुकम आप्यो, “मारा मालीक एसाव ने आहयु केजो: तारो पावर याकुब तने आहयु केय, के मे लाबान ने तां परदेसी हय्न हजु तक र्यो; अने मारी पांह गाय-बोळद्या, गदड़ा, गाडरा अने बोकड़ा, अने पावर-पावर्याण से अने मे मारा मालीक पांह आनीन करते खबर पुगाड़्यो के तारी दया नी नींगा मारी पोर हये।”
तीहया दुत याकुब पांह पाछा आवीन केवा बाज ज्या, “आमु तारा भाय एसाव पांह जेला हता, अने तीहयो बी तने भेटवा करी च्यार ह़ोव अदमी लीन आव्वा बाज र्यो।” तत्यार याकुब घणो बीह ज्यो, अने वेला मे पड़्यो: अने आहयु सोचीन, आह़फा ना ह़ातीम ना, अने गाडरा अने बोकड़ाम, अने गाय-बोळद्या, अने उटड़ाम ना बी अलग-गलक बे टोळा कर लेदो, के एसाव आवीन पेला टोळा ने मारवा हींडे, ता बीजो टोळो नाहीन बच जहे।
अळतेण याकुब केदो, “ए यहोवा, ए मारा डायला बाह अब्राहम ना भगवान ए मारा बाह ईसाक ना भगवान, तु ते मने केदलो हतो के आह़फा ना देस अने जा पयदा हयलो तां पासो जत रे, अने मे तारी भलाय करही: तु जे-जे काम आह़फा नी दया अने सच्चाय सी आह़फा ना पावर नी ह़ाते करलो से, के मे जे मारी लाकड़ीत लीन आहयी यरदन नंदी नी पार उतरीन आयो, अने हाव मारा बे टोळा हय जेला से, तारा आसम-आसम कामु मे सी मे एक नी बी लायक नी हय। मारा रावण्या ह़मळीन मने मारा भाय एसाव ना हात सी बचाड़ मे ते हीनी सी बीहु, कंखर आसम नी हय के तीहयो आवीन मने अने आह्य भेळ सोराम ने बी मार नाखे। तु ते केदलो से, के पक्को तारी भलाय करही, अने तारी अवल्यात ने दर्या ना बालु रेत नी तेम ढेरेत करही, जे ढेरेत हयवा नी कारण गीणाये नी।”2
तीहयो ते दाड़े नी रात तांत वीताड़्यो; अने जे कंय तीनी पांह हतु तीनी मे सी आह़फा ना भाय एसाव नी भेट नी लेदे टाळी-टाळीन नीकाळ्यो; मतलब बे ह़ोव बोकड़्या, अने वीह बोकड़ा, अने बे ह़ोव गाडर्या, अने वीह गाडरा, अने बच्चा भेळ दुत आपवा वाळी तीस उटड़ी, अने चाळीह गायु, अने दह बोळद्या, अने वीह गदड़ी अने दह गदड़ा। ईमने तीहयो टोळा-टोळा करीन, आह़फा ना पावर्याम ने ह़ोपीन तीमने केदो, “मार गेथा अगळ जावो; अने टोळाम ना वचे-वचे गाळो राखो।” अळतेण तीहयो अगला टोळा ना रखवाळ्या ने हुकम आप्यो, जत्यार मारो भाय एसाव तने भेटे, अने पुछे, तु कोयनो पावर से, अने अळी केय, अने आहया जे तारी अगळ-अगळ से, ते कोयना जानवर से? तत्यार केजे, “आहया तारा पावर याकुब ना से। ए मारा मालीक एसाव, आहयी भेट तने आपवा नी लेदे तारी पांह ली मोकल्ला से, अने तीहयो बी अमारी पछळ-पछळ आव्वा बाज र्यो।” अने तीहयो बीजा अने तीसरा रखवाळ्या ने बी, “पण तीहया आखा ने जे टोळा ना पछळ-पछळ हता आसमेत हुकम आप्यो के जत्यार एसाव तीमने भेटे ता आहयी रीते तीने केजो। अने आहयु बी केजो, ‘तारो पावर याकुब अमारी पछळ-पछळ आव्वा बाज र्यो।’” काहाके तीहयो आहयो वीच्यार कर्यो के आहयी भेट जे मारी अगळ-अगळ जाय, आनी लारे “मे तीनी रीह ने होगी करीन तत्यार तीनो दरसन करही; हय सके तीहयो मारी सी खुस हय जाय।” एतरे तीहयी आखी भेट नो टोळो याकुब गेथो पेले पार जत र्यो, अने याकुब आह़फोत ते रात पड़ावा मे र्यो।
याकुब नी कुस्ती नी लड़ाय
तीहयीत राते तीहयो उठ्यो अने आह़फा नी बेम लाडी, अने बेम पावर्याण, अने ग्यारे सोराम ने ह़ाते लीन बड़ा पोर गेथो यब्बोक नंदी नी पार उतरी ज्यो। तीहयो तीमने तीहयी नंदी नी पार उतार देदो, अळी आह़फा नु आखु पार उतार देदो। अने याकुब आह़फो एखलो री ज्यो; तत्यार कानो अदमी परगड़ फाटते लग तीनी सी कुस्ती लड़तो र्यो। जत्यार तीहयो देख्यो के मे याकुब पोर भारी नी पड़तो, तत्यार तीनी ह़ातळ्या नी नेह ने छीम्यो; अने याकुब नी ह़ातळ्या नी नेह तीने कुस्ती लड़ते लड़तेत अकड़ाय जी। तत्यार तीहयो केदो, “मने जवा दे, काहाके ह़वारे हयवा वाळु से,” याकुब केदो, “जत्यार लग तु मने बरकत नी आले, तांह लग मे तने जवा नी देम।”
अने तीहयो याकुब ने पुछ्यो, “तारु नाम ह़ु से?” तीहयो केदो, “याकुब।”
तीहयो केदो, “तारु नाम याकुब नी, पण ईस्रायल 3हयहे, काहाके तु भगवान ह़ाते अने माणहु ह़ाते बी लड़ाय करीन जीक जेलो से।”4
याकुब केदो, “मे रावण्या करु, मने आह़फा नु नाम देखाड़।” तीहयो केदो, “तु मारु नाम ह़ुका पुछे।” तत्यार तीहयो तीने तांत बरकत आप्यो।5
तत्यार “याकुब आहयु कीन तीहया जागा नु नाम पनीएल 6पाड़्यो; भगवान ने आम्बो-साम्बो देखवा पोर बी मे जीवत्लो से।” पनीएल ने तां गेथो चालते-चालते दाड़ु उग ज्यु, अने तीहयो ह़ातळ्या नी नेह ना कारण सी लंगड़ायतो हतो। ईस्रायली माणहु जे जानवरु ना कुला नी नेह ने, आज तक बी नी खाय; काहाके तीहयो माणेह याकुब ना ह़ातळ्या नी नेह ने छीमलो हतो।
Source notes (6)
- Footnote महनेम बे टोळा
- Cross-reference उबजणाय कीताप 22:17
- Footnote ईस्रायल भगवान ह़ाते झुमायवा वाळो
- Cross-reference उबजणाय कीताप 35:10
- Cross-reference न्यायीयो 11:17,18
- Footnote पनीएल भगवान नु मोडु
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.