Paliya Bible
उबजणाय कीताप 31
याकुब नु लाबान ने तां गेथु नाहवु
अळतेण लाबान ना सोराम नी आहयी वात याकुब ने ह़मळवा मे आयी, “याकुब अमारा बाह नु आखु कंय हापकी लेदलो से, अने अमारा बाह ना धन ना कारण सी तीनी आहयी ईज्जत से।” अने याकुब लाबान ना मोडा पोर नींगा कर्यो अने देख लेदो के तीहयो तीनी लेदे पेलेन तेम दया वाळो नी र्यो। तत्यार यहोवा याकुब ने केदो, “आह़फा ना आड़ा-बुड़ा ना देस अने जां तु पयदा हयलो तां पासो जत रे, अने मे तारी ह़ाते रेही।”
तत्यार याकुब राहेल अने लीवा ने चोवगान मे आह़फा ना गाडरा अने बोकड़ाम ने तां बोलावीन केदो, तमारा बाह ना मोडा सी, “मने ह़मज पड़े के तीहयो मने पेलेन तेम हाव दया वाळो नी देखायतो; पण मारा बाह नो भगवान मार ह़ाते से। तमु बी जाणो के मे पुरी ताखत सी तमारा बाह नी सेवा करलो से। ते बी तमारो बाह मारी ह़ाते धोको करीन मारी दाड़की ने दह वार बदल देदो; पण भगवान तीने मारु नुकसान नी करवा देदो। जत्यार तीहयो केदो, ‘काबर्या बच्चा तारा दाड़की हयहे,’ तत्यार आखा गाडरा अने बोकड़्या काबर्या बच्चा जणवा बाज जी; अने जत्यार तीहयो केदो, ‘रेहटाळ्या बच्चा तारी दाड़की हयहे,’ तत्यार आखा गाडरा अने बोकड़्या रेहटाळ्या बच्चा जणवा बाज जी। आहयी रीते भगवान तमारा बाह ना जानवरु लीन मने आल देदो।
“गाडरा अने बोकड़्या गाबणा हयवा नी टेमे मे ह़पनु मे ह़ु देख्यो के जे बोकड़ा बोकड़्या पोर कुदवा बाज र्या हता, तीहया रेहटाळ्या, चीतर्या, अने टीपकाळ्या से। तत्यार भगवान ना दुत ह़पनु मे मने केदा, ‘ए याकुब,’ मे केदो, ‘ह़ु हुकम।’ तीहयो केदो, ‘डोळा उपर करीन तीहया आखा बोकड़ा ने जे बोकड़्या पोर कुद र्या देख, के तीहया रेहटाळ्याण, काबर्या-चीतर्याण, अने टीपकाळ्याण से; काहाके जे कंय लाबान तारी ह़ाते कर र्यो तीहयु मे देखलो से। मे तीहया बेतेल नो भगवान से, जां तु एक दगड़ा नो खम्बो उबो करलो हतो अने तीनी पोर तेल नाखलो हतो, अने मारी मान-बादा लेदलो हतो। हाव चाल, आहया देस मे गेथो नीकळीन तु पयदा हयलो तां पासो जत रे।’”1
तत्यार राहेल अने लीवा तीने केदी, “ह़ु अमारा बाह ना घोर मे हाव बी अमारो कंय वाटो नीता थोड़ुक बचलु से? ह़ु आमु तीनी नींगा मे बीजा नी ठेर्या? देख, हीय्यो आमु ने ते वेच नाख्यो, अने अमारा रुप्या ने खाय्न बहलो से। एतरे भगवान अमारा बाह नु जेतरु धन हतु ली लेदलो से, तीहयु अमारु अने अमारा सोरा नु से; हाव जे कंय भगवान तने केदलो से, तीहयुत कर।”
तत्यार याकुब आह़फा ना सोराम ने अने बयराम ने उटड़ा पोर बहाड़्यो; अने जेतरा जानवरु ने तीहयो पदनराम मे भेळा करीन धन वाळो हय जेलो हतो, आखा ने कनान मे आह़फा ना बाह ईसाक ने तां जवा ना वीच्यार सी, ह़ाते ली ज्यो। लाबान आह़फा ना गाडरा ना नीम्बाळा कातरवा करीन जत रेलो हतो, अने राहेल आह़फा ना बाह ना घोर ना देवताम ने चोरीन लीत्ती री। याकुब लाबान अरामी ना घोर गेथो चोराये जत र्यो, तीने नी केदो के मे नाहीन जवा बाज र्यो। तीहयो आह़फा नु आखु कंय लीन नाह्यो, अने मोट्ली नंदी2 नी पार उतरीन आह़फा नु मोडु गीलाद ना बड़ा ना देस भणी कर्यो।
लाबान याकुब नी पछळ पड़े
तीसरा दाड़े लाबान ने खबर जड़ी के याकुब नाह जेलो से। एतरे तीहयो आह़फा ना भायु ने ह़ाते लीन सात दाड़ा तक तीनी पछळ पड़्यो, अने गीलाद ना बड़ा ना देस मे जाय्न तीने हात कर लेदो। पण भगवान राते ना ह़पनु मे अरामी लाबान ने तां आवीन केदो, “चेतीन रे, तु याकुब ने नी ते भलो केजे अने नी बुरु।” अने याकुब आह़फा नु तम्बु गीलाद नाम ना बड़ा ना देस मे उबु कर र्यो हतो अने लाबान बी तीना भायु भेळ तीहयात बड़ा वाळा देस मे तम्बु उबो कर्यो।
तत्यार लाबान याकुब ने केवा बाज ज्यो, “तु आहयु ह़ु कर्यो के मारीन्तां गेथो चोराये आवती र्यो, अने मारी सोरीम ने आसम ली आयो, जीसम कोय तलवार नी ताखत पोर कुंडीन राख र्या हय? तु ह़ुका होगोत नाह आयो, अने मने कंय कीया वगर मारीन्तां गेथो चोराये नाहीन आवती र्यो; नीता मे तने खुसी सी ढाक अने तम्बुरो वगाड़तो, अने गीत गवाड़तो जीन मोकलतो। तु ते मने मारा सोरा-सोरी ने गोळो लग नी देवा देदो? तु गंडाय करलो से। तमारु नुकसान करवा नी ताखत मारा हात मे ते से; पण तमारा बाह नो भगवान ज्यी राते केदो, चेतीन रेजे, याकुब ने नी ते भलु केजे अने नी बुरु। भलु, हाव तु आह़फा ना बाह ना घोर नी हेर करीन ते आवती र्यो, पण मारा देवताम ने तु ह़ुका चोरी करीन ली आवलो से?”
याकुब लाबान ने जपाप आप्यो, “मे आहयु सोचीन बीह जेलो हतो के कंखर माय्न तु तारी सोरीम ने मारी पांह गेथी हापकी नी लेय। जे कोय नी पांह तु आह़फा ना देवताम ह़ोद लेय, तीहयु जीवत्लु नी बचहे। मारी पांह तारु जे कंय नीकळे, तीने भाय-बोंदुम नी अगळ ओळखीन ली ले।” काहाके याकुब नी जाणतो हतो के राहेल घोर ना देवता चोरी कर लावली से।
आहयु ह़मळीन लाबान, याकुब अने लीवा अने बेम पावर्याण ना तम्बु मे ज्यो, अने कंय नी जड़्यु। ता लीवा ना तम्बु मे गेथो नीकळीन राहेल ना तम्बु मे ज्यो। राहेल ते घोर ना देवताम ने उटड़ा नी काठी मे मेलीन तीनी पोर बह री हती। लाबान तीना आखा तम्बु मे भाळवा पोर बी तीहया नी जड़्या। राहेल आह़फा ना बाह ने केदी, “ए मार मालीक; आनी सी रीहायजे नी के मे तारी अगळ नी उठी; काहाके मे मयना सी से।” लाबान ने ह़ोदवा पोर बी घोर ना देवता तीने नी जड़्या।
तत्यार याकुब खीजवाय्न लाबान ह़ाते झगड़ो करवा बाज ज्यो, अने केदो, “मारो ह़ु गुनो से?” मारो “ह़ु पाप से के तु एतरो खीजवाय्न मारी पसळ पड़्यो? तु जे मारी आखी चीज ने धरी-धरीन देख्यो, ता तने अमारा घोर नी आखी चीज मे गेथु ह़ु जड़्यु? कंय जड़्यु हय ता तीने आञे तारा अने मारा भाय-बोंदु नी अगळ मेल दे, अने तीहयी आपणु बेम जणा नी वचे नीयाव करे। आहया वीह साल लग मे तारी ह़ाते र्यो; आमनी मे नी ते तारा गाडरा अने बोकड़्या नु काचलु गीदल्यु तक नी पड़्यु, अने तारा गाडरा नु माह मे कदी नी खादो। जीने जंगली जानवरु मार नाखे तीने मे तारी पांह नी लावतो हतो ह़ु, तीनु नुकसान मेत झेलतो हतो; भले दीहु चोरी हय जाय नी ता राते, तु मार पांह गेथु तीने ली लेतो हतो। मारी आसवी हालत हती के दीहु नो तोप अने रात नी टाड सी मे मर जतो हतो। मारी नींदर मारा डोळा मे गेथी नाह जती हती। मे वीह साल लग तारा घोर मे र्यो; चोवदे साल ते मे तारी बेम सोरीम नी करते, अने छोव साल तारा गाडरा अने बोकड़ाम नी लेदे सेवा कर्यो; अने तु मारी दाड़की ने दह कावा बदली देदो। मारा बाह नो भगवान, मतलब अब्राहम नो भगवान, जीनी बीक ईसाक बी माने, कदी मारी ह़ाते नी हतो ता पक्को तु हाव मने ठारला हाते जवा देतो। मारा दुख अने मारा हात नी मेहनत ने देखीन भगवान वीती रात मे तने वड्यो।”
याकुब अने लाबान नी वचे समजोतो
लाबान याकुब ने केदो, “आहया सोर्या ते मारात से, अने आहया सोरा बी मारात से, अने आहया गाडरा अने बोकड़ा बी मारात से, अने जे कंय तने देखाव पड़े तीहयु आखु मारुत से। पण हाव मे मारा आहया सोर्या, अने आमनी अवल्यात ह़ाते ह़ु कर सकु? हाव आव, मे अने तु बेम एक बीजा ह़ाते वायदो करया, अने तीहयो वायदो मारी अने तारी वचे फोम रेय करीन आमु एक दगड़ा नो एक खम्बो बणावया।”
तत्यार याकुब एक दगड़ो लीन तीनो खम्बो उबो कर्यो। तत्यार याकुब आह़फा ना भाय-बोंदु ने केदो, “दगड़ा एक्ठा करो।” आहयु ह़मळीन तीहया दगड़ा एक्ठा करीन ढेर लगाड़्या, अने तीहयात ढेर ने तां तीहया खाणु खादा। तीहया ढेर नु नाम लाबान ते यज्रसहादुथा3 पाड़्यो, पण याकुब गीलीयाद 4पाड़्यो। लाबान केदो, “आहयो ढेर मारी अने तारी वचे गवाय रेहे।” आहया कारण तीनु नाम गीलीयाद पाड़्यो, अने मीस्पा 5बी; काहाके तीहयो केदो, “जत्यार आमु एक बीजा सी सेटा रेय” तत्यार यहोवा मारी अने तारी देख-भाळ करतो रेय। कदी तु मारी सोरीम ने वेला पाड़े, “नीता तीमने रेवा दीन बीजा बयरा ह़ाते वेवा करे, ता आपणी ह़ाते कोय माणेह ते नी रेय; पण देख मारी अने तारी वच मे भगवान गवा रेहे। अळतेण लाबान याकुब ने केदो, आहया ढेर ने देख अने आहया खम्बा ने बी देख, जीने मे मारी अने तारी वचमे उबो करलो से। आहयो ढेर अने आहयो खम्बो बेम आहयी वात नो गवा रेय के नुकसान करवा ना वीच्यार सी, नी ते मे आहया ढेर ने पार करीन तारीन्तां आवु, नी ते तु आहया ढेर अने आहया खम्बा ने पार करीन मारीन्तां आवजे। अब्राहम अने नाहोर अने तीनो बाह; तीनोव नो जे भगवान से, तीहयोत आपणु बेम जणा नी वचे नीयाव करहे।” तत्यार याकुब तीनी ह़ाम खादो जीनी बीक तीनो बाह ईसाक मान्तो हतो; अने याकुब तीहया बड़ा पोर एक जानवर नी बादा चड़ायो, अने आह़फा ना भाय-बंदुम ने खाणु खावा करीन बोलायो; तत्यार तीहया खाणु खाय्न बड़ा पोरेत र्या। ह़वारे लाबान उठ्यो अने आह़फा ना सोरा-सोरीम ने गोळो दीन अने बरकत आपीन चाल पड़्यो, अने आह़फा ना जागे पासो आवती र्यो।
Source notes (5)
- Cross-reference उबजणाय कीताप 28:18-22
- Footnote मोट्ली नंदी फरात नंदी
- Footnote यज्रसहादुथा मतलब अरामी भासा मे, गवा नो ढेर
- Footnote गीलीयाद मतलब, ईब्रानी भासा मे, गवा नो ढेर
- Footnote मीस्पा जां रीन देख-भाळ हये
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.