Paliya Bible
उबजणाय कीताप 30
जत्यार राहेल देखी के याकुब नी लेदे मारी सी कोय अवल्यात नी हयती, ता तीहयी आह़फी नी बेनेह सी डहवाय करवा बाज जी अने याकुब सी केदी, “मने बी अवल्यात आप, नीता मे मर जही।”
तत्यार याकुब राहेल ने खीजवाय्न केदो, “ह़ु मे भगवान से? तारी कोख ते तीहयोत बंद कर र्यो।”
राहेल केदी, “वारु, मारी पावर्याण बील्हा हजुर से; तीनीन्तां जा, तीहयी मारा मांडा पोर सोरु पयदा करहे, अने तीनी लारे मारु बी घोर वह्हे।” तत्यार तीहयी तीने आह़फी नी पावर्याण बील्हा ने आपी के तीहयी तीनी लाडी हये; अने याकुब तीनी ह़ाते ज्यो। अने बील्हा भारेपोगे हयी अने याकुब सी तीने एक सोरो पयदा हयो। तत्यार राहेल केदी, “भगवान मारो नीयाव कर्यो अने मारी ह़मळीन मने एक सोरो आप्यो।” एतरे तीहयी तीनु नाम दान1 पाड़ी। राहेल नी पावर्याण बील्हा अळी भारेपोगे हयी अने याकुब सी एक सोरो अळी पयदा हयो। तत्यार राहेल केदी, “मे मारी बेनेह नी ह़ाते घणी मेहनत करीन मोडे-मोडे लड़ायवा मे अने हाव मे जीक जी।” तत्यार तीहयी तीनु नाम नप्ताली2 पाड़ी।
जत्यार लीवा देखी के मारा सोरा पयदा हयवा बंद हय जेला से, ता तीहयी आह़फी नी पावर्याण जील्पा ने लीन याकुब नी लाडी हयवा करीन आप देदी। अने लीवा नी पावर्याण जील्पा नु बी याकुब सी एक सोरु पयदा हयु। ता लीवा केदी, “ओहो मारो कीस्मत!” एतरे तीहयी तीनु नाम गाद3 पाड़ी। अळतेण लीवा नी पावर्याण जील्पा ना याकुब सी एक अळी सोरु पयदा हयु। तत्यार लीवा केदी, “मे जुगाळी से; पक्का बयरा मने जुगाळी केहे।” एतरे तीहयी तीनु नाम आसेर4 पाड़ी।
गम ना काटवा ना दाड़ा मे रुबेन ने चोवगान मे दुदाफोळ5 जड़्या, अने तीहयो तीने आह़फी आह्य लीवा नी तां ली ज्यो। तत्यार राहेल लीया ने केदी, “आह़फा ना सोरा ना दुदाफळु मे सी थोड़ाक मने आप दे।”
तीहयो तीमने केदो, “तु जे मारा लाडा ने ली लेदली से ह़ु आहयी नान्ली वात से? हाव ह़ु तु मारा सोरा ना दुदाफोळ बी लेवा हींड री?” राहेल केदी, “वारु, तारा सोरा ना दुदाफळु ना बदले तीहयो आज राते तार ह़ाते ह़ुवहे।”
ह़ांती टेमे जत्यार याकुब चोवगान मे गेथो आव्वा बाज र्यो हतो, ता लीवा तीनी सी भेट करवा नीकळी, अने केदी, “तने मारीन्तां आवा पड़हे, काहाके मे मारा सोरा ना दुदाफोळ आपीन तने ह़ाचलीन वेचातो लेदी।” तत्यार तीहयो ते राते तीनी ह़ाते ह़ुयो।
तत्यार भगवान लीवा नी ह़मळ्यो, अने तीहयी भारेपोगे हयी अने याकुब सी तीनो पांचवो सोरो पयदा हयो। तत्यार लीवा केदी, “में जे मारा घोरवाळा ने मारी पावर्याण आपली से, करीन भगवान मने मारी दाड़की आपलो से।” करीन तीहयी तीनु नाम ईस्साकार पाड़ी लीवा अळी भारेपोगे हयी अने याकुब सी तीनो छटवो सोरो पयदा हयो। तत्यार लीवा केदी, “भगवान मने वारलु दान आपलो से; हाव मारो घोरवाळो मारी ह़ाते रेहे, काहाके तीनी सी मारा छोव सोरा पयदा हयला से।” करीन तीहयो तीनु नाम जबुलुन पाड़्यो। तीनी बाद तीनो एक सोरी बी हयी, अने तीहयी तीनु नाम दीना पाड़ी।
भगवान राहेल नी बी खबर लेदो, अने तीनी वीन्ता ह़मळ्यो अने तीनी बी कोख खोल देदो। एतरे तीहयी भारेपोगे हयी अने तीहयी एक सोरा ने पयदा करी, अने “भगवान मारी बुराय करवा सेटी कर्यो। एतरे तीहयी आहयु कीन तीनु नाम युसुफ6 पाड़ी, मालीक मने एक सोरो अळी बी आपहे।”
याकुब नो लाबान ह़ाते ह़मजोतो
जत्यार राहेल सी युसुफ पयदा हयु, तत्यार याकुब लाबान ने केदो, “मने वळाय दे के मे मारा देस अने मारा घोर जाम। मारा बयरा अने मारा सोरा, जीमनी लेदे मे तारी चाकरी करलो से, तीमने मने आल दे के मे जत रेम; तु ते जाणे के मे तारी कीसम चाकरी करलो से।”
लाबान तीने केदो, “कदी तारी नींगा मे में दया हात करलो से, ता आञे री जा; काहाके मने मालम पड़ जेलु से के यहोवा तारा कारण सी मने बरकत आपलो से।” अळी तीहयो केदो, “तु वारु वात देखाड़ के मे तने ह़ु आपु, अने मे तीने आपही।”
याकुब तीने केदो, “तु जाणे के मे तारी कीसम चाकरी कर्यो, अने तारा जानवरु मारी पांह कानी रीते र्या। मारी आव्वा सी पेले तीहया केतरा हता, अने हाव केतरा हय जेला से; अळी यहोवा मारा आव्वा पोर तने बरकत आपलो से। पण मे अमारा घोर नु काम कत्यार करही?”
लाबान अळी केदो, “मे तने ह़ु आलु?” याकुब केदो, “तु मने कंय ना आपे; कदी तु मारी लेदे एक काम करे, ता मे अळी तारा गाडरा अने बोकड़्याम ने चारही, अने तीमनी रखवाळी करही। मे आज तारा आखा गाडरा अने बोकड़्या ना वचे हय्न नीकळही, अने जे गाडरु नीता बोकड़ी चीत्रा वाळी नीता चीतकाबरी हय, अने जे गाडरु काळु हय, अने जे बोकड़ी चीतकाबरी अने चीत्रा वाळी हय, तीमने मे अलग करीन मेकही; अने मारी दाड़की मे तीहयात ठेरहे। अने जत्यार अगी मारी दाड़की नी वात हये, तत्यार धरम नी आहयी गवा हयहे; बोकड़्याम मे सी जे कानी नीता चीत्रा वाळी नी चीतकाबरी हय, अने गाडराम मे सी जे कानी काळ्ळी नी हय, कदी मार पांह नीकळे, ता चोरी नी ठेरहे।”
तत्यार लाबान केदो, “तारा केवा नी अनसारे हये।” तत्यार तीहयो ते दाड़े आखा रेहटाळ्या अने चीतकाबर्या बोकड़ा, अने आखी चीत्रा वाळी अने चीतकाबरी बोकड़्याम ने, मतलब तीमनी मे कंय धोळ्ळा टीप्का हता, तीमने अने आखी काळ्ळा गाडराम ने बी अलग करीन आह़फा ना सोराम ना हात मे ह़ोप देदो। अळी तीहयो आह़फा अने याकुब नी वच मे तीन दाड़ा नी चाल नो गाळो राख्यो; अने याकुब लाबान ना गाडरा अने बोकड़्याम ने चारवा बाज ज्यो।
तत्यार याकुब चीनार, अने बदाम, अने अर्मोन झाड़ नी लील्ली-लील्ली ह़ोटी लीन, तीमना पोपड़ा कंय-कंय हेड़ीन तीमने तीखला बणाय देदो, आसवा के तीहया ह़ोट्या धोळ्ळा देखाव पड़े। अने तत्यार छोतरा हेड़ली ह़ोटीम ने गाडरा अने बोकड़्याम नी अगळ तीमना पाणी पीवा ना चाठड़ा मे उबो कर्यो; अने जत्यार तीहया पाणी पीवा करीन आया तत्यार गाबणा हय ज्या। ह़ोटीम नी अगळ गाबणा हय्न, गाडरा अने बोकड़्या, रेहटाळ्या, चीत्रा वाळा, अने चीतकाबर्या बच्चा जणी।
तत्यार याकुब गाडराम ना बच्चा ने अलग-गलक कर्यो, अने लाबान ना गाडरा अने बोकड़्या ना मोडा चीत्रा वाळा अने आखा काळ्ळा बच्चा भणी कर देदो; अने आह़फा ना टोळाम ने तीमनी गेथा अलग राख्यो, अने लाबान ना गाडरा अने बोकड़्याम नी मे भेसकायवा नी देदो।
अने जत्यार-जत्यार जबरा गाडरा अने बोकड़्या गाबणा हयता हता, तत्यार-तत्यार याकुब तीहयी ह़ोटीम ने चाठड़ा मे तीमनी अगळ मेल देतो हतो; जीनी सी तीहया ह़ोटीम ने देखता जाय्न गाबणा हय जाय। पण जत्यार हारला गाडरा अने बोकड़्या गाबणा हयता हता, तत्यार तीहयो तीमनी अगळ नी मेल्तो हतो। आनी सी हारली-हारली लाबान नी री, अने मात्ली-मात्ली याकुब नी हय जी। आहयी रीते तीहयो माणेह घणो मालदार हय ज्यो, अने तीना ढेरेत गाडरा अने बोकड़्या, अने पावर अने पावर्याण अने उटड़ा अने गदड़ा हय ज्या।
Source notes (6)
- Footnote दान नीयाव करवा वाळो
- Footnote नप्ताली मारी मेहनत
- Footnote गाद वारलो कीस्मत
- Footnote आसेर जुगाळी
- Footnote दुदाफोळ दुदाफोळ खावा सी भारेपोगे हयवा नी ताखत जड़े
- Footnote युसुफ अळी बी आपहे
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.