Paliya Bible
उबजणाय कीताप 29
याकुब नु लाबान ने भेटणु
अळतेण याकुब आह़फा नी वाट्ये लाग्यो, अने उगवणा देस मे आयो। तीहयो नींगा करीन ह़ु देख्यो के चोवगान मे एक कुवो से, अने तीनी ह़ाते गाडरा-बोकड़ा ना तीन टोळा बह र्या; काहाके जे दगड़ो तीहया कुवा ना मोडा पोर मेकलो रेतो हतो, जीनी मे सी टोळाम ने पाणी पीवाड़ता हता, तीहयो भारो हतो। अने जत्यार आखा टोळा तां एक्ठा हय ता गुवाळ्या तीहया दगड़ा ने कुवा ना मोडा पोर सी ढबळावीन गाडरा-बोकड़ाम ने पाणी पीवाड़त्ला, अने बाद मे दगड़ा ने कुवा ना मुंडा पोर जेम हतो तेम मेल देता हता।
पण याकुब गुवाळ्या ने पुछ्यो, “ए मारा भायु, तमु का वाळा से?” तीहया केदा, “आमु हारान ह़ेर ना से।”
तत्यार तीहयो तीमने पुछ्यो, “ह़ु तमु नाहोर ना सोरा ना सोरा लाबान ने जाणो?” तीहया केदा, “होव, आमु तीने जाणया।”
अळतेण तीहयो तीमने पुछ्यो, “ह़ु तीहयो वारलो से?” तीहया केदा, “होव, वारलो से” अने ह़ेली “देख तीनी बेटी राहेल गाडरा अने बोकड़ाम ने लीन आव्वा बाज री।”
याकुब केदो, “हजु ते दाड़ु ढेरेत से, जानवरु ने एक्ठा हयवा नी टेम नी हय; एतरे गाडरा अने बोकड़ाम ने पाणी पीवाड़ीन अळी ली जाय्न चारो।”
तीहया केदा, “आमु हमणे ईसम नी कर सकता, जत्यार आखा टोळा एक्ठा हये ता दगड़ा ने कुवा ना मोडा पोर गेथो ढबळाय देत्ला से, अने तत्यार आमु गाडरा अने बोकड़्या ने पाणी पीवाड़त्ला।”
तीमनी आहयी वात हय री हती के राहेल, जे जानवरु चार्या करती हती, आह़फा ना बाह ना गाडरा अने बोकड़ा ने लीन आय लागी, याकुब आह़फा ना मामा लाबान नी सोरी राहेल ने, अने तीना गाडरा-बोकड़ा ने देखीन कुवा नी ह़ाते ज्यो, अने तीना मोडा पोर मेकला मोट्ला दगड़ा ने ढबळाय देदो अने आह़फा ना मामा लाबान ना गाडराम ने पाणी पीवाड़्यो। तत्यार याकुब राहेल ने गोळो देदो, अने ज्योरेत रड़्यो। अने याकुब राहेल ने देखाड़्यो के तीहयो तीना बाह ना कुम नो रीबका नो सोरो से। ता राहेल दवड़ीन जीन आह़फा बाह ने केदी। आह़फा भाणजे याकुब नी खबर जड़तेत लाबान तीने भेटवा करीन दवड़ीन ज्यो, अने तीने गळे लगाड़ीन गोळो देदो, अळतेण तीने आह़फा ना घोर लीन आयो। अने याकुब तीने आह़फी आखी वात ह़मळायो। तत्यार लाबान याकुब ने केदो, “तु ते ह़ाचलीनेत मारी हाटकी अने मांह से।” अने याकुब एक मयनो तीनी ह़ाते र्यो।
राहेल अने लीया जुगु याकुब नी सेवा
तत्यार लाबान याकुब ने केदो, “कुटुम वाळो हयवा ना कारण तने फीरी मे काम कराव्वा मारी वाटु वारु नी हय; आनीन करीन तु के चाकरी नी बदले मे तने ह़ु आपु?” लाबान नी बे सोरी हती, तीमनी मे सी मोट्ली नु नाम लीवा अने नान्ली नु नाम राहेल हतु। लीवा ना ते धुदळा डोळा हता, पण राहेल रुपाळी अने घटाळी हती।
एतरे याकुब, जे राहेल सी मोंग करतो हतो, केदो, “मे तारी नान्ली सोरी राहेल नी लेदे सात साल तारी चाकरी करही।”
लाबान केदो, “तीने बीजा अदमी ने आपवा सी तने आपवा वारु हयहे; एतरे मारी पांह रे।” याकुब राहेल नी लेदे सात साल चाकरी कर्यो; अने तीहया तीने राहेल ना मोंग ना कारण थोड़ाक दाड़ा नी बराबर लाग्या।
तत्यार याकुब लाबान ने केदो, “मारी लाडी मने आप, अने मे तीनी ह़ाते जही, काहाके मारी टेम पुरी हय जेली से।” तत्यार लाबान तीहया जागा ना आखा माणहुम ने बोलावीन एक्ठो कर्यो, अने तीमने वेवा नु खाणु खवाड़्यो। ह़ांती वेळा तीहयो आह़फा नी सोरी लीवा ने याकुब ने तां ली ज्यो, अने तीहयो तीनीन्तां ज्यो। लाबान तीनी सोरी लीवा ने तीनी पावर्याण हयवा नी लेदे आह़फा नी पावर्याण जील्पा ने आप्यो। ह़वारे मालम हयु के आहयी ते लीवा से, एतरे तीहयो लाबान ने केदो, “आहयु तु मार ह़ाते ह़ु करलो से? मे तार ह़ाते रीन जे तारी चाकरी कर्यो, ता ह़ु राहेल नी लेदे नी कर्यो? तत्यार तु मार सी ह़ुका आसम धोको करलो से?”
लाबान केदो, “अमारीन्तां आवी रीती नी हय, के मोट्ली सी पेले बीजी ना वेवा कर देय। आनो हप्तो ते पुरो कर; अळतेण बीजी बी तने तीहयी चाकरी नी लेदे जड़हे जे तु मार ह़ाते रीन अळी सात साल लग करही।”
याकुब आसमेत कर्यो, अने लीवा ना हप्ता ने पुरो कर्यो; तत्यार लाबान तीने आह़फा नी सोरी राहेल बी आप्यो, के तीहयी तीनी लाडी हये। लाबान आह़फा नी सोरी राहेल नी पावर्याण हयवा नी लेदे आह़फा नी पावर्याण बील्हा ने आप्यो तत्यार याकुब राहेल नी ह़ाते बी ज्यो, अने तीनो मोंग लीवा सी जादा तीनी पोर हयो, अने तीहयो लाबान नी ह़ाते रीन सात साल अळी तीनी चाकरी कर्यो।
याकुब नी अवल्यात
जत्यार यहोवा देख्यो के लीवा सी कम मोंग करे, तत्यार तीहयो तीनी कोख खोल्यो, पण राहेल वांज्याण री। तत्यार लीवा भारेपोगे हयी, अने तीनु एक सोरु पयदा हयु, अने तीहयी आहयु कीन तीनु नाम रुबेन पाड़ी, “यहोवा मारा दुख पोर नींगा करलो से, हाव मारो घोरवाळो ह़ाते मोंग करहे।” अळतेण तीहयी अळी भारेपोगे हयी अने तीनो एक सोरो पयदा हयो; तत्यार तीहयी आहयु केदी, “आहयु ह़मळीन के मने कम मोंग करे यहोवा मने आहयो बी सोरो आप्यो।” एतरे तीहयी तीनु नाम सीमोन1 पाड़ी। अळतेण तीहयी अळी भारेपोगे हयी अने तीने एक अळी सोरु पयदा हयु; अळी तीहयी केदी, “हाव ते मारो घोरवाळो मार सी मोंग करहे, काहाके तीनी सी मारा तीन सोरा पयदा हया।” एतरे तीनु नाम लेवी पाड़्या। अने अळी तीहयी भारेपोगे हयी अने तीनु एक अळी सोरु पयदा हयु; अळी तीहयी केदी, “हाव नी वार ते मे यहोवा ने घणो वारु केही।” एतरे तीहयी तीनु नाम यहुदा पाड़ी; तत्यार तीनी कोख बंद हय जी।
Source notes (1)
- Footnote सीमोन ह़मळवा वाळो
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.