Paliya Bible
उबजणाय कीताप 3
माणेह भगवान नो हुकम नी माने
यहोवा भगवान जेतरा जंगली जानवरु बणावलो हतो, तीमनी आखा मे गड़हो चलाक हतो; तीहयो बयर ने केदो, “ह़ु ह़ाचलीन भगवान केदलो से के तमु बगीचा ना काना बी झाड़ नो फोळ नी खाजो?”1
बयर गड़हा ने जपाप आपी, आमु बगीचा ना झाड़ नु फोळ खाय सकीया। “पण भगवान केदलो से, बगीचा ना वचे लागला झाड़ नु फोळ नी खाजो, अने नी छीमजो, नीता तमु मर जहु।”
तत्यार गड़हो बयर ने केदो, तमु पक्का नी मरो। भगवान जाणे के जे दाड़े तमु तीनो फोळ खाहु तत्यार तमारा डोळा उगड़ी जहे, अने तमु भला अने बुरा ग्यान ने जाणीन भगवान ने तेवा बण जहु।2
एतरे जत्यार बयर देखी के तीहया झाड़ नु फोळ खावा जुगु वारु से, अने देखवा मे मन गमता, अने अक्कल आपवा जुगु चाहवा लायक बी से, तत्यार तीहयी तीनु फोळ तोड़ी, अने तीने खादी, अने आह़फी ना लाडा ने बी आपी, अने तीहयो बी खादो। तत्यार बेम जणा ना डोळा उगड़ी ज्या, अने तीमने मालम पड़्यु के तीहया नांगरला से; एतरे तीहया अंजीर ना पान्टा ह़ीवीन कस्टु बणाय लेदा।
जत्यार ह़ांत्ली टेमे तीहया बगीचा मे यहोवा भगवान ने चालतो-फीरतो ह़मळ्या ता आदम अने तीनी लाडी बगीचा ना झाड़ु ना वचे ह़ताय ज्या। तत्यार यहोवा भगवान आदम ने आड़ीन पुछ्यो, तु कां से?
तीहयो केदो, मे बगीचा मे तारी अवाज ह़मळीन बीह ज्यो, काहाके मे नांगरलो हतो; एतरे मे ह़ताय ज्यो।
“तीहयो केदो, कोय तने देखाड़्यु के तु नांगरलो से? जे झाड़ नु फोळ मे तने नी खावा करीन केदलो, ह़ु तु तीनु फोळ खादलो से?”
आदम केदो, “जे बयर ने तु मारी ह़ाते रेवा करीन आपलो से, तीहयीत तीहया झाड़ नु फोळ मने आपी, अने मे खादो।”
तत्यार यहोवा भगवान बयर ने केदो, तु आहयु ह़ु करी? बयर केदी, गड़हो मने बहकाड़ देदो, ता मे खादी।
भगवान नो नीयाव
तत्यार यहोवा भगवान गड़हा ने केदो, तु जे आहयु करलो से एतरे तु आखा घोर ना जानवरु, अने आखा जंगली जानवरु सी जादा सरापीत से, तु पेट ना भरहे चाल्या करही, अने हमेसा कादो चाटतो रेही: अने मे तारा अने आहयी बयर ना वचमे, अने तारी अवल्यात अने आनी अवल्यात ना वचमे झगड़ो पयदा करही; तीहयो तारा मुंडा ने कचरी देहे, अने तु तीना पोग नी पाटली ने डसही।3
अळी बयर ने भगवान केदो, “में तारी वेला अने तारा भारेपोगे हयवा ना दुख ने ढेरेत वदाड़ देही; तु मांदी हय्न सोरु पयदा करही; अने तारी मरजी तारा लाडा भणी हयहे, अने तीहयो तारी पोर हक करहे।”
अने आदम सी भगवान केदो, “तु जे आह़फा नी लाडी नी वात ह़मळ्यो, अने जे झाड़ ना फोळ ना बारा मे तमने मे हुकम आपलो हतो के तु तीने नी खाजे, तीने तु खादलो से एतरे धरती तारा कारण गरा वाळी से। तु तीनु अन जलम दुख ह़ाते खाया करही; अने तीहयी तारी जुगु काटा अने गोखरा काटा उगाड़हे, अने तु खेतर नु अन खाही; अने आपणा पसीना ना रोट्ला खाया करही, अने आखरी मे कादा मे भेसकाय जही काहाके तु तीनी मे गेथो पयदा हयलो से; तु कादो ते से अने कादा मे पासो भेसकाय जही।”
आदम आह़फा नी लाडी नु नाम हव्वा पाड़्यो; काहाके जेतरा माणेह जीवत्ला से तीहया आखा नी सुरु नी आह्य तीहयी हयी। अने यहोवा भगवान आदम अने तीनी लाडी नी लेदे चामड़ा ना लुगड़ा बणावीन तीमने पेराय देदो।
आदम अने हव्वा ने बगीचा मे गेथु नीकाळणु
अळी यहोवा भगवान केदो, “माणेह भला अने बुरा नो ग्यान हात करीन अमारी मे एक ने तेम बण जेलो से: एतरे हाव ईसम नी हये के तीहयो हात बड़ावीन जीवाय ना झाड़ नु फोळ बी तोड़ीन खाय लेय अने जलम जीवत्लो रेय।” एतरे यहोवा भगवान आदम ने अदन ना बगीचा मे गेथो नीकाळ देदो के तीहयो तीहयी जागा मे खेती करे, जीनी मे गेथो तीने बणावलो हतो। एतरे आदम ने भगवान नीकाळ देदो अने जीवाय ना झाड़ नी वाट नी रखवाळी करवा करीन अदन ना बगीचा नी उगवणी वखे करुबाम4 ने, अने च्यारो मेर फीरवा वाळी होळो-होळो धपत्ली तलवार ने टाळ्यो।5
Source notes (5)
- Cross-reference परकासीतवाक्य 12:9; योएल 2:24; परकासीतवाक्य 20:2
- Cross-reference यहेजकेल 28:2
- Cross-reference परकासीतवाक्य 12:17
- Footnote करुबाम खास भाती नो ह़रगदुत, मतलब जीना पाखड़ा रेय
- Cross-reference यहेजकेल 28:16
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.