Paliya Bible
उबजणाय कीताप 2
आहयी रीते ह़रग अने धरती अने जे कंय तीनी मे से तीमने बणावणु खत्तम हय ज्यु। अने भगवान आह़फा नु काम जीने तीहयो करतो हतो ह़ातवा दाड़े पुरु कर्यो, अने तीहयो आह़फा ना करला आखा काम सी ह़ातवा दाड़े अराम कर्यो।1 अने भगवान ह़ातवा दाड़ा ने बरकत आप्यो अने चोखलो ठेरायो; काहाके तीहया दाड़े तीहयो धरती बणाव्वा ना आह़फा ना आखा कामु सी नवराय्न अराम करलो।
माणहु नु घड़ायणु
ह़रग अने धरती उबजवा ना बारा मे आहयु से के जत्यार तीहया उबज्या मतलब जे दाड़े यहोवा भगवान धरती अने ह़रग ने बणायो: तत्यार धरती पोर कानु बी झाड़ नी हतु, अने धरती ना जागा मे हतु, काहाके यहोवा भगवान धरती पोर पाणी नी पाड़्यो हतो, अने धरती पोर खेती करवा नी लेदे माणेह बी नी हतु; ते बी धुवरु धरती पोर गेथु उडतु हतु जीनी सी आखी जागा भीगी जती हती।
तत्यार यहोवा भगवान माणेह2 ने धरती ना कादा सी बणायो, अने तीना नखरा मे जीवाय नी ह़ाह़ फुक देदो; अने तीहयो माणेह एक जीवत्लो माणेह बण ज्यो।3
अने यहोवा भगवान उगवणु अदन मे एक बगीचो लगाड़्यो, अने तां आदम ने जीने तीहयो बणावलो हतो, मेक देदो। अने यहोवा भगवान धरती सी आखा भाती ना झाड़, जे देखवा मे घटाळा अने जीना फोळ खावा मे वारु से, उगाड़्यो, अने बगीचा ना वच मे जीवाय ना झाड़ ने अने भला अने बुरा ग्यान नु झाड़ बी लगाड़्यो।
तीहया बगीचा मे पाणी देवा नी लेदे एक मोट्ली नंदी अदन सी नीकळी अने तां गेथी अगी जाय्न च्यार नंदी मे वटाय जी।4 पेली नंदी नु नाम पीसोन से; आहयी तीहयी से जे हवीला नाम ना आखा देस ने घेरवी री, जां ह़ोनु जड़े।
तीहया देस नु ह़ोनु चोखु रेय; तां मोती अने सुलेमानी दगड़ा बी जड़े। बीजी नंदी नु नाम गीहोन से; आहयी तीहयी से जे कुस ना आखा देस ने घेरवी री। तीसरी नंदी नु नाम हीदकेल से; आहयी तीहयी से जे अस्सुर नी उगवणी ह़ोड़ वये। अने चोवथी नंदी नु नाम फरात से।
तत्यार यहोवा भगवान माणेह ने लीन अदन ना बगीचा मे मेल देदो, के तीहयो तीनी मे काम करे अने तीनी रखवाळी करे। अने यहोवा भगवान माणेह ने आहयो हुकम आप्यो, “तु बगीचा ना आखा झाड़ ना फोळ ने सण्का कर्या वगर खाय सके, पण भला नीता बुरा ग्यान नु जे झाड़ से तीनो फोळ तु नी खाजे; काहाके जे दाड़े तु हीनो फोळ खाही, ते दाड़े तु पक्को मर जही।”5
अळतेण यहोवा भगवान केदो, “माणेह नु एखलु रेवा वारु नी हय; मे हीनी जुगु एक एवो मदत करन्यो बणावही जे हीनी सी मेळ खाय।” अने यहोवा भगवान धरती मे गेथा आखा जाती ना बणला जानवरु, अने ह़रग ना आखी भाती ना चड़ा ने बणावीन माणेह ने तां ली आयो अने देखे के तीहयो तीमनु ह़ु-ह़ु नाम पाड़े; अने जे-जे जीवत्ला जानवरु नु जे-जे नाम माणेह पाड़्यो तीहयुत तीमनु नाम हय ज्यु।6 अने आदम आखी जाती ना घोर ना जानवरु, अने ह़रग ना चड़ा, अने आखी जाती ना बणला जानवरु नु नाम पाड़्यो; पण आदम जुगु कोय ईसम मदत करवा वाळु नी जड़्यु जे तीनी सी मेळ खाय सके। तत्यार यहोवा भगवान आदम ने भारी नींदर मे ह़ुवाड़ देदो, अने जत्यार तीहयो ह़ुय ज्यो तत्यार तीहयो तीनी पाहळी नकाळीन तीनी जागा पोर माह भर देदो। अने यहोवा भगवान तीहयी पाहळी ने जीने आदम मे गेथी नीकाळ्ळी हती, बयर बणाय देदो; अने तीने आदम ने तां ली आयो। तत्यार आदम केदो, “हाव आहयी मारा हाकटा मे नी हाटकी अने मारा माह नु माह से; एतरे आहयी बयर केवायहे; काहाके आहयी माणेह मे गेथी नीकाळ्ळी से।”7 एतरे माणेह आह़फा आह्य-बाह ने छोड़ीन आह़फा नी लाडी ह़ाते रेहे, अने तीहया एकीत डील बणीन रेहे।8 आदम अने तीनी लाडी बेम नांगरला हता, पण लजवायता नी हता।
Source notes (8)
- Cross-reference ईब्रानीयो 4:4,10
- Footnote माणेह
- Cross-reference 1 कुरन्थी 15:45,47
- Cross-reference यहेजकेल 47:11
- Cross-reference रोमीयो 6:23
- Cross-reference भजन सहीता 8:6
- Cross-reference उबजणाय कीताप 29:14; 2 समुवेल 5:1; 1 कुरन्थी 11:8; 1 तीमुथीयुस 2:13
- Cross-reference मत्ती 19:5; 1 कुरन्थी 6:16; ईफीसीयो 5:31
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.