Paliya Bible
उबजणाय कीताप 26
ईसाक नु गरार मे रेणु
तीहया देस मे काळ पड़्यो, आहयो तीहया पेल्ला काळ गेथो अलग हतो जे अब्राहम ना दाड़ा मे पड़लो हतो। एतरे ईसाक गरार ना पलीस्तीयो ना राजा अबीमेलेक नी तां ज्यो। तां यहोवा तीने दरसन आपीन केदो, “मीस्र मे ना जाय; जे देस मे तने देखाड़ही तीहया देस मे रेजे। तु आहया देस मे रे, अने मे तारी ह़ाते रेही, अने तने बरकत आलही; अने आहया आखा देस मे तने अने तारी अवल्यात ने आपही; अने जे ह़ाम ने तारा बाह अब्राहम ह़ाते खादलो हतो, तीने मे पुरी करही।1 मे तारी अवल्यात ने ह़रग ना तारान तेम बड़ावही; अने मे तारी अवल्यात ने आहया आखा देस आपही, अने धरती पोर ना आखा माणहु तारी अवल्यात ना कारण आह़फाम ने जुगाळा मानहे। काहाके अब्राहम मारी मान्यो, अने जे मे तीने ह़ोपलो हतो तीने अने मारा हुकम, रीती अने कायदा नो पालन कर्यो।”
एतरे ईसाक गरार मे री ज्यो। जत्यार तां वाळा माणहु तीनी लाडी ना बारा मे पुछ्या, ता तीहयो आहयु सोचीन बीहतो हतो के कदी मे हीने मारी लाडी केही ता आञे वाळा माणहु रीबका ना कारण जे घणी घटाळी से मने मार नाक्खे, ता तीहयो जपाप आप्यो, “तीहयी ते मारी बेनेह से।”2 जत्यार तीने तां रेत्लो ढेरेत दाड़ा वीत ज्या, ता एक दाड़ो पलीस्तीयो नो राजा अबीमेलेक खीड़की मे सी छापीन ह़ु देख्यो के ईसाक आह़फी लाडी रीबका ह़ाते मोंग करवा बाज र्यो। तत्यार अबीमेलेक ईसाक ने बोलावीन केदो, “ह़ेली ते पक्की तारी लाडी से; ता तु ह़ु का तीने तारी बेनेह केदो?” ईसाक जपाप आप्यो, “मे वीच्यार करलो हतो के आसम नी हये के हीना कारण मारी मोत हये।”
“अबीमेलेक केदो, तु अमारी ह़ाते आहयु ह़ु कर्यो? ईसम ते माणहु मे कोय बी तारी लाडी ह़ाते आराम सी गलत काम कर सके, अने तु आमने पाप मे फसाड़े।” एतरे अबीमेलेक आह़फा ना आखा माणहु ने हुकम आप्यो, “जे कोय ह़ेला माणेह ने नीता ह़ेली बयर ने छीमहे, तीने पक्को मार नाक्खे।”
अळतेण ईसाक तीहया देस मे खेतर मे अनाज वेर्यो, अने तीहया साल मे ह़ोव गुणा मेर पाकी; अने यहोवा तीने बरकत आप्यो, अने तीनु धन वद्यु अने तीनी बड़ोत्री हयती जत री, आञे तक के तीहयो घणो मोटो माणेह बण ज्यो। जत्यार तीना गाडरा-बोकड़ा, गाय-बोळद्या, अने ढेरेत पावर-पावर्याण हयी; ता पलीस्ती माणहु तीनी ह़ाते डहवाय करवा बाज ज्या। एतरे जेतरा कुवा तीना बाह अब्राहम ना पावर्या अब्राहम ने जीवत्लो रेते खोदला हता, तीमने पलीस्ती कादा सी भर देदा।
ता अबीमेलेक ईसाक ने केदो, “अमारी ह़ाते गेथो जत रे; काहाके तु अमारी गेथो जादा पोमतो हय ज्यो।” एतरे ईसाक तां गेथो जत र्यो, अने गरार ना बड़ा मे आह़फा नु तम्बु उबो करीन रेवा बाज ज्यो। तत्यार जे कुवा तीना बाह अब्राहम ना मरवान अळतेण पलीस्ती भर देदला हता, तीमने ईसाक अळी खोदाड़्यो; अने तीमना तेत नाम पाड़्यो, जे तीनो बाह पाड़लो हतो।
अळतेण ईसाक ना पावर्याम ने बड़ा मे खोदते-खोदते वयत्लु पाणी नो एक कुवो जड़्यो। ता गरार ना गुवाळ्या ईसाक ना गुवाळ्या ह़ाते झगड़ो कर्या अने केदा, “आहयु पाणी अमारु से।” एतरे ईसाक तीहया कुवा नु नाम एसेक3 पाड़्यो; काहाके तीहया तीनी ह़ाते झुमायता हता।
अळतेण तीहया बीजो कुवो खोद्या, अने तीहया तीनी लेदे बी झगड़ो कर्या; एतरे ईसाक तीनु नाम सीत्रा4 पाड़्यो। ता तीहयो तां गेथो नीकळीन एक अळी कुवो खोदाड़्यो अने तीनी जुगु तीहया झगड़ो नी कर्या; एतरे तीहयो तीनु नाम आहयु कीन रहोबोत5 पाड़्यो, “हाव ते यहोवा अमारी जुगु ढेरेत जागो आपलो से, अने आमु आहया देस मे वदता-बड़ता जहु।”
तां गेथो ईसाक बेर्सेबा ज्यो। अने तेत दाड़े यहोवा राते तीने दरसन दीन केदो, “मे तारा बाह अब्राहम नो भगवान से, ना बीहे, काहाके मे तार ह़ाते से, अने मारा पावर्या अब्राहम ना कारण तने बरकत आपही, अने तारी अवल्यात ने बड़ावही।” ता तीहयो तां एक वेदी बणायो, अने यहोवा नी बड़ाय कर्यो, अने आह़फा नु तम्बु तांत उबो कर्यो; अने तां ईसाक ना पावर्या एक कुवो खोद्या।
ईसाक अने अबीमेलेक नी वचे वायदो
तत्यार अबीमेलेक आह़फा ना मंतरी अहुज्जत अने आह़फा ना सेना ना डायला पीकोल ने ह़ाते लीन, गरार गेथो तीनीन तां ज्यो।6 ईसाक तीने केदो, “तमु मार ह़ाते झगड़ो करीन आह़फाम नी वचमे गेथा नीकाळ देदला हता, हाव मारीन्तां ह़ुका आय र्या।”
तीहया केदा, “आमु ते चोखुझण देखला से के यहोवा तार ह़ाते रेय; एतरे आमु वीच्यार कर्या के तु ते यहोवा भणी गेथो जुगाळो से, एतरे: अमारी अने तारी वच मे ह़ाम खावो, अने आमु तार पांह आना बारा मे वायदो करावया, के जीसम आमु तने नी छीम्या, पण तारी ह़ाते नीस्ती भलायेत करला से, अने तने सांती सी वळावणी कर्या, तीनी लारे तु बी अमारी ह़ाते कंय बुराय नी करजे; हाव तु मालीक नी बरकत हात करलो माणेह से।” तत्यार तीहयो तीमने खाणु आप्यो अने तीहया खादा-पीदा। ह़वारे तीहया आखा वेगात उठीन एक बीजा ह़ाते ह़ाम खादा; तत्यार ईसाक तीमने वळायो, अने तीहया सांती सी तीमनीन्तां गेथा जत र्या।
तेत दाड़े ईसाक ना पावर्या आवीन आपणा तीहया खोदला कुवा ना बारा मे ह़मळावीन केदा, “आमु ने पाणी नो एक झोर जड़लो से।” तत्यार ईसाक तीनु नाम सीबा7 पाड़्यो; आहयात कारण सी तीहया ह़ेर नु नाम आज तक बेर्सेबा 8पड़लु से।
एसाव ना बीजा देस ना लाड्या
जत्यार एसाव चाळीह साल नो हयो, ता तीहयो हीत्ती बेरी नी सोरी यहुदीत, अने हीत्ती एलोन नी सोरी बासमत ह़ाते वेवा कर लेदो; अने आहया बयराम ना कारण सी ईसाक अने रीबका ना मन ने दुख लाग्यु।
Source notes (8)
- Cross-reference उबजणाय कीताप 22:16,18
- Cross-reference उबजणाय कीताप 12:13; 20:2
- Footnote एसेक झगड़ा नो
- Footnote सीत्रा वीरोदी नो
- Footnote रहोबोत चवड़ो जागो
- Cross-reference उबजणाय कीताप 21:22
- Footnote सीबा ह़ाम
- Footnote बेर्सेबा ह़ाम नो कुवो
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.