Paliya Bible
उबजणाय कीताप 27
ईसाक नु याकुब ने बरकत आपणु
जत्यार ईसाक डायो हय ज्यो, अने तीना डोळा आसम धुंदळा पड़ ज्या के तीने देखायतु नी हतु, तत्यार तीहयो तीना मोट्ला सोरा एसाव ने बोलावीन केदो, “ए मारा सोरा एसाव,” एसाव जपाप आप्यो, “बाह, ह़ु वात से।”
तीहयो केदो, “ह़मळ, मे डायो हय जेलो से, अने नी जाणतो के मारी मोत नो दाड़ो कत्यार हयहे: एतरे हाव तु तारी धंदली अने बीलखी लीन बड़ा मे जा, अने मार जुगु सीकार करीन लाव। तत्यार मने गमे एवु ह़वादु खाणु बणावीन मारीन्तां ली आवजे, के मे तीने खाय्न मरवा सी पेले जीव भरीन बरकत आपु।”
तत्यार एसाव सीकार करवा करीन बड़ा मे ज्यो। जत्यार ईसाक एसाव ह़ाते आहयी वात करवा बाज र्यो हतो, तत्यार रीबका ह़मळवा बाज री हती। एतरे तीहयी आह़फा ना सोरा याकुब ने केदी, “ह़मळ, मे तारा बाह ने तारा भाय एसाव ने आहयु केते ह़मळली से तु मारी जुगु सीकार करीन तीनु ह़वादु खाणु बणाव, के तीने खाय्न अने मरवा सी पेले यहोवा नी अगळ तने बरकत आलु। एतरे हाव, ए मारा सोरा, मारी वात ह़मळ, अने आहयो हुकम मान, के तु बोकड़ा ना वाड़ा मे जा अने बोकड़ा ना वारु-वारु बे बच्चा लीन आव; अने मे तारा बाह जुगु तीनु गमतु बच्चा नु माह नु खाणु रांदही। तत्यार तु तीने तारा बाह ने ता लीज्जे, के तीहयो तीने खाय्न मरवा सी पेले तने बरकत आले।”
याकुब आह़फा नी आह्य रीबका ने केदो, “ह़मळ, मारो भाय एसाव ते रुह वाळो माणेह से, अने मे रुह वाळो माणेह नी हय। कदीम मारो बाह मने पुपाळहे, ता मे तीनी नींगा मे झुटो ठेरही; अने संयबरकत नी बदले सराप कमायही।”
तीनी आह्य तीने केदी, “ए मारा सोरा, सराप तारी पोर नी पण मारी पोर पड़े, तु मारीत मारी ह़मळ, अने जाय्न ह़ेला बच्चा मारी पांह लीन आव।” तत्यार याकुब जाय्न गाडरु आह़फा नी आह्य ने तां ली आयो, अने आह्य तीना बाह ने गमे तीनी लारे ह़वादु खाणु बणाय देदी। तत्यार रीबका आह़फा ना पेल्ला सोरा एसाव ना घटाळा लुगड़ा, जे तीनी पांह घोर मे हता, लावीन तीना नान्ला सोरा याकुब ने पेराय देदी; अने बोकड़ा ना बच्चा नी खालु ने तीना हातु मे अने तीना गळा मे वीटाळ देदी; अने तीहयु ह़वादु खाणु अने तीना रांदला रोट्ला बी आह़फा ना सोरा याकुब ना हात मे आप देदी।
तत्यार तीहयो आह़फा ना बाह ने तां ज्यो अने केदो, “ए मारा बाह,” तीहयो केदो, “ह़ु वात से? ए मारा सोरा, तु कोय से?”
याकुब आह़फा ना बाह ने केदो, मे तारो मोट्लो सोरो एसाव से। मे तारा हुकम नी लारे करलो से; एतरे उठ अने मारा सीकार ना माह मे गेथु खा, के तु तारी पुरा मन सी मने बरकत आले।
ईसाक आह़फा ना सोरा ने केदो, “ए मारा सोरा, ह़ु कारण से के सीकार तने साटोत जड़ ज्यो?” तीहयो जपाप आप्यो, “तारो भगवान यहोवा तीने मारी अगळ कर देदो।”
अळी ईसाक याकुब ने केदो, “ए मारा सोरा, ह़ाते आव, मे तने पुपाळीन जाणु के तु ह़ाचलीन मारो सोरो एसाव से के नी।” तत्यार याकुब आह़फा ना बाह ईसाक नी ह़ाते ज्यो, अने तीनो बाह तीने पुपाळीन केदो, “तारु बोल ते याकुब नी तेवो से, पण तारा हात ते एसाव ना हात नी तेवात से।” अने तीहयो तीने नी ओळख्यो, काहाके तीना हात तीना भाय एसाव ने तेवा रुह वाळा हता; एतरे तीहयो तीने बरकत आल्यो। अने तीहयो पुछ्यो, “ह़ु तु ह़ाचलीन मारो सोरो एसाव से?” तीहयो केदो, “होव, मेत से।”
तत्यार ईसाक ने केदो, “खाणु मने खावा आप, मे मारा सोरा ना सीकार ना माह मे गेथु खाय्न, तने मारा पुरा मन सी बरकत आपु।” ता तीहयो तीने खाणु खावा आप्यो, अने तीहयो खादो; अने तीहयो तीनीन्तां अंगुर नो रोह बी लायो, अने तीहयो पीदो। तत्यार तीनो बाह ईसाक तीने केदो, “ए मारा सोरा, ह़ाते आवीन मने गोळो आप।” तीहयो ह़ाते जाय्न तीने गोळो देदो; अने तीहयो तीना लुगड़ा नी गंद गंदीन तीने आहयी बरकत आप्यो, “देख, सोरा नी गंद जे आसवा खेतर नी से जीनी पोर यहोवा संयबरकत आपलो हय; भगवान तने ह़रग सी धुवरु, अने धरती नी वारु सी वारु मेर अने ढेरेत दाणा अने नवलो अंगुर नो रोह आपे। राज्य-राज्य ना माणहु तारा हक मे हय, अने देस-देस ना माणहु तने वांद्या करे। तु आह़फा ना भायु नो मालीक हये, अने तारी आय्ह ना सोरा तने वांद्या करे। जे तने सराप आपे तीहया आह़फात सरापीत हये, अने जे तने बरकत आपे तीहया संयबरकत हात करे।”1
बरकत नी लेदे एसाव ना रावण्या
जेमेत आहयी बरकत ईसाक याकुब ने आप देदो, अने याकुब आह़फा ना बाह ईसाक नी अगळ गेथो नीकळ्ळोत हतो के एसाव सीकार लीन आय पुग्यो। तत्यार तीहयो बी ह़वादु खाणु बणावीन आह़फा ना बाह ने तां ली आयो, अने तीने केदो, “ए मारा बाह, उठीन आह़फा ना सोरा नु सीकार नु माह खा, काहाके मने तारा पुरा मन सी बरकत आपे।”
“तीनो बाह ईसाक पुछ्यो, तु कोय से?” तीहयो केदो, “मे तारो मोट्लो सोरो एसाव से।”
तत्यार ईसाक घणो थर-थर कापतो जीन केदो, “ता तीहयो कोय हतो जे सीकार करीन मारी पांह लीन आवलो हतो, अने मे तने आव्वा पेले आखु मे गेथु कंय-कंय खाय लेदो अने तीने बरकत आप्यो? हाव तीने संयबरकत लागली बी रेहे।”
आह़फा ना बाह नी आहयी वात ह़मळतेत एसाव घणो ज्योरेत अने दुखी हय्न आड़ीन आह़फा ना बाह ने केदो, “ए मारा बाह, मने बी बरकत आप।”
ईसाक केदो, “तारो भाय चलाकी सी आयो, अने तारी बरकत ने लीन जत र्यो।”
एसाव केदो, “ह़ु तीनु नाम याकुब वारुत पाड़लु हतु? तीहयो मने बे कावा रोक लगाड़्यो। मारो पेल्लो हयवा नो हक ते लीत लेदलो हतो; अने हाव देख, तीहयो मारी बरकत बी ली लेदलो से। अळी तीहयो केदो, ह़ु तु मारी लेदे बी कंय बरकत बचाड़ीन नी राख्यो?”
ईसाक एसाव ने जपाप आपीन केदो, “ह़मळ, मे तीने तारो मालीक ठेरावलो से, अने अळतेण आखा भायु ने तीना हक मे कर देदो, अने दाणा अने नवलो अंगुर नो रोह आपीन तीने पक्को बणाय देदलो से। एतरे हाव, ए मारा सोरा, मे तारी जुगु ह़ु करु?”
एसाव आह़फा ना बाह ने केदो, “ए मारा बाह, ह़ु तारा मन मे एकीत बरकत से? ए मारा बाह, मने बी बरकत आप,” अने आसम कीन कल्पी-कल्पीन रड़वा बाज ज्यो।2
तीनो बाह ईसाक तीने केदो, “ह़मळ, तारु रेणु मेर वाळी जागा सी नाम्बे हय, अने उपर गेथी ह़रग नी धुवरी तीनी पोर नी पड़े। तु तारी तलवार नी ताखत सी जीवत्लो रेही, अने आह़फा ना भाय ना हक मे ते रेय; पण जत्यार तु तारा भाय ना हक मे गेथो छुटवा झुमायही, ता तीना वळा ने आह़फा ना खांदा पोर गेथो तोड़ नाखे।”3
एसाव याकुब सी आह़फा ना बाह नी लारे आपला बरकत ना कारण दुस्मनी राख्यो; अने तीहयो सोच्यो, “मारा बाह ना मरवा ना दाड़ा ह़ातेत से, बाद मे मारा भाय याकुब ने मारही।”
जत्यार रीबका ने तीना पेला सोरा एसाव नी आहयी वात मालम पड़ी, तत्यार तीहयी आह़फा ना नान्ला सोरा याकुब ने बोलावीन केदी, “ह़मळ, तारो भाय एसाव तने मारवा करीन आह़फा ना मन मे ठान र्यो। एतरे हाव, ए मारा सोरा ह़मळ, अने हारान मे मारा भाय लाबान ने तां नाह जा; अने थोड़ाक दाड़ा तक तारा भाय नी रीह नी ओलाये तांह तक तीनीन तां रेजे। अळतेण जत्यार तारा भाय नी रीह तार पोर सी उतरे, अने जे काम तु तीनी ह़ाते करलो से तीहयो तीने भुल जाय; तत्यार मे तने तां गेथो बोलाव्वा मोकलही। ईसम ह़ुका हये के एकीत दाड़े मे तमु बेम जणा ने खोय देम?”
याकुब नु लाबान ने तां जाणु
अळतेण रीबका ईसाक ने केदी, “हीत्ती जाती नी ववेह नी करते मारो जीव घबराय ज्यो; कदी याकुब बी आहयी ववेह ने तेम आहया देस नी कानी हीत्ती जाती नी सोरी सी वेवा कर लेय ता मने आहया जीवाय सी ह़ु फायदो? मे मर जही।”
Source notes (3)
- Cross-reference उबजणाय कीताप 12:3
- Cross-reference ईब्रानीयो 12:17
- Cross-reference उबजणाय कीताप 36:8; 2 राजा 8:20
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.