Skip to content
BibleKenya

Paliya Bible

उबजणाय कीताप 25

अब्‌राहम नो अळी बीजो कुळीवेलो

(1 ईतीहास 1:32-33)

तत्‌यार अब्‌राहम एक अळी लाडी ली आयो जीनु नाम कतुरा हतु। तीनी सी जीम्‌रान, योक्‌सान, मदना, मीद्‌यान, यीसबाक, अने सुह पयदा हया। योक्‌सान सी सबा अने ददान पयदा हया; अने ददान नी अवल्‌यात मे अस्‌सुरी, लतुसी, अने लुम्‌मी माणहु हया। मीद्‌यान ना सोरा एपा, एपेर, हनोक, अबीदा, अने एल्‌दा हया, आहया आखा कतुरा ना सोरा हया।

ईसाक ने ते अब्‌राहम आह़फा नु आखु कंय आप्‌यो। पण आह़फा नी पावर्‌याण ने तीने राख र्‌यो हतो 1 ना सोराम ने, कंय-कंय आपीन आह़फा ना जीवते आह़फा ना सोरा ईसाक ने तां गेथा उगवणा देस मे मोकली देदो।

अब्‌राहम नी मोत

अब्‌राहम नी आखी उमर एक ह़ोव पीचोत्‌तर साल नी हयी। अब्‌राहम नी ढेरेत उमर हयवा ना कारण पुरा डायावारा नी टेम मे मर ज्‌यो; अने तीहयो तीमना मरला माणहु मे जीन भेसकाय ज्‌यो। तीना सोरा ईसाक अने ईस्‌माएल, हीत्‌ती सोहर ना सोरा एप्‌रोन नी मम्‌रे नी उगणली धेड़ वाळी जागा मे, जे मकपेला नो मोट्लो दोर हतो, तीनी मे तीने गाड़ देदा। मतलब जे जागा अब्‌राहम हीत्‌तीयो नी पांह वेचाती लेदलो हतो; तीनी मे अब्‌राहम, अने तीनी लाडी सारा, बेम ने गाड़ देदा।2 अब्‌राहम ने मरवा नी अळतेण भगवान तीना सोरा ईसाक ने जे लहेरोय नाम ना कुवान्‌तां रेतो हतो, बरकत आप्‌यो।

ईस्‌माएल नो कुळी वेलो

(1 ईतीहास 1:28-31)

अब्‌राहम नो सोरो ईस्‌माएल जे सारा नी मीस्‌री पावर्‌याण हाजीरा सी पयदा हयलो हतो, तीनो कुळी वेलो आहयो से। ईस्‌माएल ना सोराम ना नाम अने कुळी वेलो आहयो से: मतलब ईस्‌माएल नो मोट्‌लो सोरो नबायोत, अळतेण केदार, अदबेल, मीबसाम, मीस्‌मा, दुमा, मस्‌सा, हदद, तेमा, यतुर, नापीस, अने केदमा। ईस्‌माएल ना आहयात सोरा हया, अने ईमना नामु नी लारे ईमना गामु, अने पड़ावा नु नाम बी पड़्‌या; अने आहयात बारे आह़फा-आह़फाम ना कुळी ना मुख्‌या बण्‌या। ईस्‌माएल नी आखी उमर एक ह़ोव संयतीस साल नी हयी; तत्‌यार तीहयो मर ज्‌यो, अने तीहयो आह़फा ना मरला आड़ा-बुड़ा माणहु मे जीन भेसकाय ज्‌यो। अने तीनी अवल्‌यात हवीला गेथी सुर तक, जे मीस्‌री नी उगवणी धेड़ अस्‌सुर नी वाट्‌ये से, वह ज्‌या; अने तीमनो वाटो तीमना आखा भाय-बोंदुम नी ह़ाते पड़्‌यो।

याकुब अने एसाव नी पयदावारी

अब्‌राहम ना सोरा ईसाक नी कुळी वेलो आहयो से: अब्‌राहम सी ईसाक पयदा हयो; अने ईसाक चाळीह साल नो हय्‌न रीबका ने, जे पदनराम ना रेवा वाळा, अरामी बतुएल नी सोरी, अने अरामी कुळ ना लाबान नी बेनेह हती, वेवा कर लेदो। ईसाक नी लाडी ते वांज्‌याण हती, एतरे ईसाक तीनी लाडी जुगु यहोवा पांह रावण्‌या कर्‌यो; अने यहोवा तीनी रावण्‌या ह़मळी लेदो, आहयी रीते तीनी लाडी रीबका भारेपोगे हयी। सोरा तीनी गरब मे आह़फा चोटाय्‌न एक बीजा ने देवा बाज ज्‌या। ता तीहयी केदी, “मारी जे आसमेत हालत रेहे ता मे कीसम जीवत्‌लो रेही?” अने तीहयी यहोवा मरजी पुछवा जी।

तत्‌यार यहोवा तीने केदो, “तारा गरब मे बे जाती से, अने तारी कोख गेथा नीकळतेत बे राज्‌य ना माणहु अलग हयहे, अने एक राज्‌य ना माणहु बीजा सी जादा सक्‌ती वाळा हयहे अने मोट्‌लो सोरो नान्‌ला ना हक मे हयहे।”3

जत्‌यार तीना सोरा पयदा हयवा नी टेम आवी, ता ह़ु उजन्‌तु हयु, के तीना गरब मे जोवळ्‌या सोरा से। पेलो जे पयदा हयो तीहयो रात्‌लो नीकळ्‌यो, अने तीनु आखु डील चादरान तेम रुह वाळु हतु; एतरे तीनु नाम एसाव पाड़्‌या। पछळ तीनो भाय आह़फा ना हात सी एसाव ना पोग नो पोट धरीन पयदा हयो; अने तीनु नाम याकुब पाड़्‌या। जत्‌यार रीबका तीमने पयदा करी ता ईसाक4 साट साल नो हतो।

एसाव नी लारे पेलो हयवा नो हक वेचणु

अळतेण सोरा मोटा हयवा बाज ज्‌या अने एसाव ते बड़ा मे रेवा वाळो एक हुस्‌यार सीकारी बण्‌यो, पण याकुब ह़ुदलो माणेह हतो, अने तम्‌बु मे रेतो हतो। ईसाक एसाव ना सीकार नु माह खाया करतो हतो, एतरे तीहयो तीने मोंग करतो हतो; पण रीबका याकुब ने मोंग करती हती।

एक दाड़े याकुब खावा करीन थोड़ीक दाळ रांदतो हतो; अने एसाव बड़ा मे गेथो थाकलो आयो। ता एसाव याकुब ने केदो, “ह़ेली जे रात्‌ली चीज से, तीहयी चीज मे गेथु मने कंय खवाड़, काहाके मे थाकलो से।” आहया कारण तीनु नाम एदोम बी पड़्‌यु।

याकुब केदो, “तारो पेल्‌लो हयवा नो हक आज मारा हात मे वेच दे।”

एसाव केदो, “देख, मे ते हाव मरवा पोर से एतरे पेल्‌लो हयवा सी मारो ह़ु फायदो हयहे?”

याकुब केदो, “मार सी हमणे ह़ाम खा,” ता: तीहयो तीनी सी ह़ाम खादो, अने आह़फा नो मोट्‌लो हयवा नो हक याकुब ना हात मे वेच देदो।5 आनी पोर याकुब एसाव ने रोटा अने रांदली मसुर नी दाळ आप्‌यो; अने तीहयो खादो पीदो, ता उठीन जत र्‌यो। आहयी रीते एसाव आह़फा नो पेल्‌लो हयवा नो हक कंय नी ह़मज्‌यो।

Source notes (5)
  1. Footnote पावर्‌याण ने तीने राख र्‌यो हतो हाजीरा अने कतुरा
  2. Cross-reference उबजणाय कीताप 23:16
  3. Cross-reference रोमीयो 9:12
  4. Footnote ईसाक बीजा ने सेटो करीन हक राखवा वाळो
  5. Cross-reference ईब्‌रानीयो 12:16

Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.