Paliya Bible
उबजणाय कीताप 23
सारा नी मोत अने गाड़वा
सारा ते एक ह़ोव सत्तावीस वरहु नी उमर हय जी; अने जत्यार सारा नी आतरी उमर हयी; तत्यार तीहयी कीर्यतर्बा मे मर जी। आहयु ते कनान देस मे से, अने हेब्रोन बी केवाये। एतरे अब्राहम सारा नी लेदे रड़वा-कलपवा तां ज्यो।
ता अब्राहम धोड़ नी ह़ाते तां गेथो उठीन हीत्तीम ने केवा बाज ज्यो, “मे तमारी वचमे पोरणो अने अंजाणलो से; मने तमारी वचमे मड़ाट्या नी आसवी जागा आलो जे मारी हय जाय, के मे मारी लाडी ना धोड़ ने गाड़ीन मारा डोळा गेथी छेटी करु।”1
हीत्ती माणहु अब्राहम ने केदो, “ए अमारा मालीक, अमारी वात ह़मळ; तु अमारी वचमे मोट्लो मुख्या से। अमारा मड़ाट्या मे जे तने गमे तीनी मे तारी लाडी ने गाड़; अमारी मे सी कोय बी तने अमारा मड़ाट्या लेवा सी नी रोके, के तु तारी लाडी ने गाड़ नी सके।”
तत्यार अब्राहम उबो हयो, अने हीत्तीयो नी अगळ, जे तीहया देस ना रेवा वाळा हता, पोगे पड़ीन केवा बाज ज्यो, “कदीम तमारी आहयी मरजी हय के मे मारी लाडी ने गाड़ीन मारा डोळा सी छेटी करु, ता मारी वीन्ती से के सोहर ना सोरा एप्रोन सी मारी लेदे रावण्या करो, के तीहयो खुद नो मकपेला वाळो दोर, जे तीनी जागा नी काकड़ पोर से; तीनो पुरो दाम लीन मने आल देय, के तीहयी तमारी वचमे मड़ाट्या नी लेदे मारी जागा हय जाय।”
एप्रोन ते तां हीत्तीयो नी वचे बह र्यो हतो, एतरे जेतरा हीत्ती तीना ह़ेर ना झापले हय्न मोय जता हता, तीहया आखाम नी अगळ तीहयो अब्राहम ने जपाप आप्यो, “ए मारा मालीक, ईसम नी, मारी ह़मळ; तीहयी जागा मे तने आलु, अने तीनी मे जे दोर से, तीहयी बी मे तने आलु; आञे मारा माणहु नी अगळ मे तीने तने आल देम; काहाके तु तारी लाडी ने मड़ाट्या मे गाड़ सके।”
तत्यार अब्राहम तीहया देस ना हीत्ती माणहु ना अगळ पोगे पड़ीन वांद्यो। अने तीमने ह़मळतेत एप्रोन ने केदो, “कदी तु आसम चाहे, ता मारी ह़मळ तीहयी जागा नो जे दाम हय, तीहयो मे आपवा हींड र्यो; तीने मार सी ली ले, ता मे मारी मरली लाडी ना धोड़ ने मे तां गाड़ही।”
एप्रोन अब्राहम ने आहयो जपाप आप्यो, “ए मारा मालीक, मारी वात ह़मळ; तीहयी जागा नु दाम ते च्यार ह़ोव चांद ना सीक्का से; पण मारी अने तारी वच मे ह़ु से? तु धोड़ ने गाड़ दे।” अब्राहम एप्रोन नी मानीन तीने तेतरा सीक्का तोल देदो, जेतरु तीहयो हीत्तीयो नी ह़मळते केदलो हतो, मतलब च्यार ह़ोव चांदी ना सीक्का जे वेपारु करे तीमना मापे तोलीन आप्यो।
आहयी रीते एप्रोन नी जागा, जे मम्रे नी ह़ाते मकपेला मे हती, तीहया दोर भेळ, अने तीहया आखा झाड़ु भेळ जे तीनी मे अने तीना च्यारो-मेर अने काकड़ पोर हता, जेतरा हीत्ती तीना ह़ेर ना झापले सी हय्न मोय जता हता, तीहया आखाम नी अगळ अब्राहम ना हक मे पक्की कर देदा।
आनीन बाद अब्राहम आह़फा नी लाडी सारा ने तीहयी मकपेला वाळी जागा मे ना मोट्ला दोर मे जे मम्रे ना मतलब हेब्रोन नी अगळ कनान देस मे से, गाड़ देदो। आहयी रीते तीहयी जागा मोट्ला दोर भेळ, जे तीनी मे हती, हीत्तीयो नी भणी गेथी मड़ाट्या नी लेदे अब्राहम ना हक मे पक्की आय जी।
Source notes (1)
- Cross-reference ईब्रानीयो 11:9,13; नेवताळा ना काम 7:16
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.