Paliya Bible
उबजणाय कीताप 22
अब्राहम नु पारख मे पड़वा ना बारा मे
आहयी वात हयवान अळतेण आसम हयु के भगवान, अब्राहम ने आहयु कीन तीनी पारख कर्यो, “ए अब्राहम!” तीहयो केदो, “ए मालीक ह़ु केय, मे आञे से।”1
तीहयो केदो, “आह़फा ना सोरा ने मतलब एक खोल्या सोरा ईसाक ने, जीने तु मोंग करे, ह़ाते लीन मोरीय्या देस मे जतरे, अने तां तीने एक बड़ा नी उपर जे मे तने देखाड़ही होम बादा करीन चड़ावजे।”2
तत्यार अब्राहम ह़वारे वेगोत उठ्यो अने आह़फा नु गदड़ु पोर लाकड़ा बांदीन आह़फा ना बे पावर्या, अने आह़फा ना सोरा ईसाक ने ह़ाते लेदो, अने होम बादा नी लेदे लाकड़ा फोड़ लेदो; तत्यार नीकळीन तीहया जागा भणी चाल्यो, जीनी वात भगवान तीनी ह़ाते करलो हतो। तीसरा दाड़े अब्राहम डोळा उचा करीन तीहया जागा ने नाम्बे रीन देख्यो। अने तीहयो आह़फा ना पावर्याम ने केदो, “गदड़ा नी ह़ाते आञे उबा रेजो; आहयो सोरो अने मे ह़ेले तक जीन, अने वांदीन, अळी पासा आवती रेहु।”
तत्यार अब्राहम होम बादा ना लाकड़ा लेदो अने आह़फा ना सोरा ईसाक ना खांदा पोर मेल्यो, अने आक्ठु अने छुर्रो आह़फा ना हात मे लेदो; अने तीहया बेम एक्ठा चाल पड़्या। ईसाक आह़फा ना बाह अब्राहम ने केदो, “ए मारा बाह,” “तीहयो केदो, ए मारा सोरा, ह़ु वात से?” तीहयो केदो, “देख, आक्ठु अने लाकड़ा ते से; पण होम बादा जुगु गाडरु कां से?”
अब्राहम केदो, “ए मारा सोरा, भगवान होम बादा नु गाडरु ने आह़फोत ह़ोदहे।” अने तीहया बेम ह़ाते-ह़ाते अगा चालता ज्या।
जत्यार तीहया ते जागे जीने भगवान तीमने देखाड़लो हतो पुग्या; तत्यार अब्राहम तां वेदी बणावीन लाकड़ा टाळी-टाळीन मेल्यो, अने आह़फा सोरा ईसाक ने बांदीन वेदी पोर मेकला लाकड़ा नी उपर मेल देदो।3 अळतेण अब्राहम हात अगो करीन छुर्रो ली लेदो के आह़फा ना सोरा ने बादा चड़ावे। तत्यार यहोवा नो दुत ह़रग सी तीने आड़ीन केदो, “ए अब्राहम, ए अब्राहम!” तीहयो केदो, “ए मालीक ह़ु केय, मे आञे से।”
तीहयो केदो, “तीहया सोरु भणीन हात ना बड़ावे, अने नी हीने कंय करे; काहाके तु जे मारी ह़ाते आह़फा ना सोरा, अने आह़फा ना एक-खोळ्या सोरा ने बी, नी छोड़्यो; आनी सी मे जाण ज्यो के तु भगवान नी बीक माने।”
ता अब्राहम डोळा उचा कर्यो, अने ह़ु देख्यो, के तीनी पसळ एक गाडरो आह़फा ना ह़ींगड़ा वेर एक झाटवा मे फसलो से; तत्यार अब्राहम जाय्न तीहया गाडरा ने लायो, अने आह़फा ना सोरा ना जागा पोर तीने होम बादा करीन चड़ायो। अब्राहम तीहया जागा नु नाम यहोवा यीरे4 पाड़्यो, आनी अनसारे आज तक बी केय, “के यहोवा ना बड़ा पोर जड़त्लु से।”
अळी यहोवा नो दुत बीजी वार ह़रग मे गेथो अब्राहम ने आड़ीन केदो, “यहोवा नी आहयी अवाज से के मे मारीत ह़ाम खाम के तु जे आहयु काम करलो से के आह़फा ना सोरा, पण एक-खोळ्या सोरा ने बी, नी छोड़्यो;5 आहया कारण मे पक्को तने बरकत आलही; अने पक्को तारी अवल्यात ने ह़रग ना तारामंडळी, अने दर्या धेड़े ना रेळतुन तेम गीणाये नी एतरा करही, अने तारी अवल्यात तारा दुस्मन ना ह़ेर नो अदीकारी हय्हे;6 अने धरती ना आखा देस तारी अवल्यात नी लारे मारी सी बरकत हात करहे; काहाके तु मारु हुकम मानीन तीनु पालन कर्या।”7 तत्यार अब्राहम आह़फा ना पावर्यान्तां पासो आयो, अने तीहया आखा बेर्सेबा ह़ाते-ह़ाते ज्या; अने अब्राहम बेर्सेबा मे रेवा बाज ज्यो।
नाहोर नो कुळीवेलो
आहयी वात नी बाद आसम हयु के अब्राहम ने आहयी खबर जड़ी, “मील्का ने तारा भाय नाहोर सी सोरो पयदा हयलो से।” मील्का ना सोरा ते आहया हया, मतलब तीनो मोट्लो सोरो उस, अने उस नो भाय बुज, अने कमुएल, जे अराम नो बाह हयो। अळतेण केसेद, हजो, पील्दास यीद्लाप, अने बतुएल। आहया आंठोव ने मील्का अब्राहम ना भाय नाहोर ना लारे पयदा करी। अने बतुएल सी रीबका पयदा हयी। अळी नाहोर नी रुमा नाम नी एक पावर्याण हती तीने तीहयो राख र्यो हतो; जीनी सी तेबह, गहम, तहस, अने माका पयदा हया।
Source notes (7)
- Cross-reference ईब्रानीयो 11:17,19; उबजणाय कीताप 31:11; नीरगमन 3:4
- Cross-reference 2 ईतीहास 3:1
- Cross-reference याकुब 2:21
- Footnote यहोवा यीरे यहोवा जुगाड़ करे
- Cross-reference ईब्रानीयो 6:13,14
- Cross-reference ईब्रानीयो 11:12
- Cross-reference गलातीयो 3:16; नेवताळा ना काम 3:25
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.