Paliya Bible
उबजणाय कीताप 21
ईसाक नी पयदावारी
यहोवा सारा ने संयबरकत आप्यो, जीसम के तीहयो वायदो करलो हतो। सारा अब्राहम सी भारेपोगे हय्न तीना डायावारा मे तीहयी टेम पोर जे भगवान ठेरावलो हतो, एक सोरो पयदा हयो।1 अब्राहम आह़फा ना सोरा नु नाम जे सारा सी पयदा हयलो हतो ईसाक पाड़्यो। अने जत्यार तीनो सोरु ईसाक आंठ दाड़ा नो हयो, ता तीहयो भगवान ना हुकम ना अनसारे तीनु खतनु कर्यो।2 जत्यार अब्राहम नो सोरो ईसाक पयदा हयो ता तीहयो एक ह़ोव साल नो हतो। अने सारा केदी, “भगवान मने खुसी अने हाही आपलो से। जे बी आना बारा मे ह़मळहे तीहयो मार ह़ाते हाह्हे।” अळतेण तीहयो आहयु बी केदो, “ह़ु कोय कदी अब्राहम सी की सकतु हतु, के सारा सोराम ने दुद पीवाड़हे? पण देखो, मारी सी तीना डायावारा मे एक सोरु पयदा हयु।”
अने तीहयु सोरु मोटु हयु अने तीनु दुद सोड़ाया; अने ईसाक ने दुद सोड़ाव्वा ना दाड़े अब्राहम माणहु ने वारु खाणु खवाड़्यो।
हाजीरा अने ईस्माएल ने नीकाळणु
तत्यार सारा ने मीस्र नी हाजीरा नो सोरो, जे अब्राहम सी पयदा हयलो हतो, ईसाक ह़ाते रमत्लो देखाव पड़्यो। आहया कारण सी सारा अब्राहम ने केदी, “आहयी पावर्याण अने हीना सोरा भेळ नीकाळ दे: काहाके आहयी बयर ना सोरा ने तारा धन मे गेथो कंय बी वाटो नी जड़वा जोवे, मारा सोरा ईसाक ने जे तारो वारीसदार से जड़वा जोवे।”3 आहयी वात अब्राहम ने आह़फा ना सोरा ना कारण वारु नी लागी। तत्यार भगवान अब्राहम ने केदो, “हीय्या सोरो अने तारी पावर्याण ना कारण तने बुरु नी लागे; जे वात सारा तने केय, तीने मान, काहाके जे तारी अवल्यात केवायहे तीहयी ईसाक सीत चालहे। 4 पावर्याण ना सोरा नी लारे बी मे एक राज्य पयदा करही काहाके तीहयो बी तारी अवल्यात से।” एतरे अब्राहम ह़वारे वेगोत उठीन रोट्ला अने पाणी सी भरली चामड़ा नी ठेली हाजीरा ने आप्यो, अने तीना खांदा पोर मेक्यो, अने तीना सोरा ने बी खांदे बहाड़्यो अने मोकल्यो। तीहया जत र्या अने बेर्सेबा ना जंगल मे फीरता र्या। जत्यार ठेली मे नु पाणी खुट ज्यु, ता तीहयी सोरा ने एक झाड़ नी तळे सोड़ देदी। अने आह़फीत तीनी सी एक ह़ोव मीटर5 सेटी जाय्न तीनी अगळ आहयु सोचीन बह जी, “मने सोरा नी मोत देखवा नी पड़े।” ता तीहयी तीनी भणी मोडु फीरवीन बहीन आड़ी-आड़ीन रड़वा बाज जी।
भगवान तीहयु सोरु नी रड़वा नी अवाज ह़मळ्यो; अने तीनो दुत ह़रग मे गेथो हाजीरा ने आड़ीन केदो, “ए हाजीरा तने ह़ु हयु? ना बीहे; काहाके जां तारो सोरो से तां गेथी तीनी अवाज भगवान ह़मळी लेदलो से। उठ तारु सोरु ने उठाड़ अने तीने भाळ; काहाके मे तीनी लारे एक मोट्लु राज्य बणावही।” तत्यार भगवान तीना डोळा उगाड़ देदो, अने तीने एक कुवो देखाव पड़्यो; ता तीहयी जाय्न ठेली पाणी भरीन सोरु ने पीयाड़ी। अने भगवान तीहयु सोरु ह़ाते र्यो; अने जत्यार तीहयु मोटु हयु, ता तीहयु परान नाम ना उजाड़ी बड़ा मे रेतु हतु अने एक वारु सीकारी बण ज्यु। तीहयो पारान नाम ना जंगल मे रेतो हतो। अने तीनी आह्य तीनी जुगु मीस्र देस गेथी एक बयर मंगाड़ी।
अब्राहम अने अबीमेलक नी वच मे वायदो
तीहया दाड़ा मे ईसम हयु के अबीमेलेक आह़फा नी सेना ना मुख्या पीकोल ने ह़ाते लीन अब्राहम ने केवा बाज ज्यो, “जे कंय तु करे तीनी मे भगवान तारा ह़ाते रेय;6 एतरे हाव मारी ह़ाते आञे आहया बारा मे भगवान नी ह़ाम खा के तु नी ते मार ह़ाते धोको करे, अने नी कदी मारी अवल्यात ह़ाते करे, पण जीसम दया मे तार पोर करलो से, तेमेत तु मार पोर अने आहया देस पोर बी, जीनी मे तु रेय, करही।”
अब्राहम केदो “मे ह़ाम खाम।”
अने अब्राहम अबीमेलेक ने एक कुवा ना बारा मे जे तीना पावर्या कब्जो कर लेदला हता, तीना बारा मे केदो। तत्यार अबीमेलेक केदो, “मे नी जाणतो के कोय आहयु काम कर्यु; अने तु बी मने नी देखाड़्यो, अने नी ते मे बी आज सी पेले आना बारा मे कंय ह़मळ्यो।” तत्यार अब्राहम गाडरा अने बोकड़ा, अने गाय अने बोळद्या अबीमेलेक ने आप्यो; अने तीहया बेम जणा एक-बीजा ह़ाते वायदो कर्या। अब्राहम गाडरा ना ह़ात गाडरी बच्चा ने टोळा मे गेथो अलग करीन राख्यो। तत्यार अबीमेलेक अब्राहम ने पुछ्यो, “आहया ह़ात बच्चा ने, जे तु अलग करीन मेकलो से, ह़ु मतलब से?”
तीहयो केदो, “तु आहया ह़ात बच्चा ने आहयी वात नो गवा जाणीन मारा हात सी ली ले के मे आहयो कुवो खोदलो से।” तीहया बेम जणा तीहया जागा मे एक बीजा ह़ाते ह़ाम खादा, आहया कारण सी तीनु नाम बेर्सेबा7 पड़्यु।
जत्यार तीहया बेर्सेबा मे आहयो वायदो कर्या, तत्यार अबीमेलेक अने तीनी सेना नो मुख्यो पीकोल, तां गेथा उठीन पलीस्तीयो ना देस पासा जत र्या। तत्यार अब्राहम बेर्सेबा मे एक झाव नु झाड़8 चोप्यो, अने तां यहोवा पांह जे जलमको भगवान से नी भक्ती कर्यो।9 अब्राहम पलीस्तीयो ना देस मे ढेरेत दाड़ा तक परदेसी बणीन र्यो।
Source notes (9)
- Cross-reference ईब्रानीयो 11:11
- Cross-reference उबजणाय कीताप 1:12; नेवताळा ना काम 7:8
- Cross-reference गलातीयो 4:29-30
- Cross-reference रोमीयो 9:7
- Footnote बीलखी देय अने पड़े एतराक नाम्बे
- Cross-reference उबजणाय कीताप 26:26
- Footnote बेर्सेबा गाडरा नो कुवो मतलब ह़ाम नो कुवो
- Footnote झाव नु झाड़ एसेल, आमली नु झाड़ ने तेवु देखायण्यु
- Cross-reference यसाया 40:28; 1 तीमुथीयुस 1:17
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.