Paliya Bible
उबजणाय कीताप 20
अब्राहम अने अबीमेलेक
अळतेण अब्राहम तां गेथो नीकळीन कनान ना दखणाव देस ना नेगेब ईलाका मे आवीन कादेस अने सुर ना वच मे उबो र्यो, अने गरार मे रेवा बाज ज्यो। अने अब्राहम आह़फा नी लाडी सारा ना बारा मे केवा बाज ज्यो, “तीहयी मारी बेनेह से,” करीन गरार नो राजा अबीमेलेक दुत ने मोकलीन सारा ने बोलाय लेदो।1 राते भगवान ह़पना मे अबीमेलेक ने तां आवीन केदो, “ह़मळ, जे बयर ने तु राख लेदलो से, तीना कारण सी तु मर जही, काहाके तीना वेवा पेले हय जेला से।”
पण अबीमेलेक हमणे तक सारान्तां नी जेलो हतो; एतरे तीहयो केदो, “ए मालीक ह़ु तु वण-गुनाळ्ळा माणेह ने बी मार नाखही? ह़ु अब्राहम आह़फो मने नी केदो, ‘तीहयी मारी बेनेह से?’ अने ‘तीहयी बयर बी आह़फी मने केदी, तीहयो मारो भाय से,’ मे ते आपणा मन नी खराय अने आपणा वेहवार नी सच्चाय सी आहयु काम करलो से।”
भगवान तीना ह़पना मे केदो, “होव मे बी जाणु के तु तारा मन नी खराय सी तु आहयु काम करलो से अने मे तने रोक बी राख्यो के तु मारा वीरोद मे पाप नी करे; आहया कारण मे तने तीने सीमवा बी नी देदो। एतरे हाव तीहया अदमी नी लाडी ने तीने पासी आल दे; काहाके तीहयो भगवान वगे गेथी वात केवा वाळो से, अने तारी जुगु वीन्ती करहे, अने तु जीवतो रेही पण तु तीने पासी नी आले ता जाण ले, के तु, अने तारा जेतरा माणहु से, आखा ह़ाचलीन मर जहे।”
अबीमेलेक ह़वारे वेगोत उठीन आह़फा ना आखा अदीकार्या ने बोलावीन आहयी आखी वात ह़मळायो; अने तीहया माणहु घणा बीह ज्या। तत्यार अबीमेलेक अब्राहम ने बोलावीन केदो, “तु अमारी ह़ाते आहयु ह़ु कर्यो? अने मे तारु ह़ु बगाड़लो हतो के तु मारी अने मारा राज्य उपर एसवो मोट्लो पाप नाख देदो? तु मारी ह़ाते तीहयु काम कर्यो जे वारु नी हतु।” अळी अबीमेलेक अब्राहम ने पुछ्यो, “तु ह़ु ह़मजीन एसवु काम करलो?”
अब्राहम केदो, “मे आहयु सोचलो हतो के आहया जागा मे भगवान नी कंय बी बीक नी हहे; एतरे आहया माणहु मारी लाडी ना कारण सी मने मार नाखहे। अने ह़ाचलीन तीहयी मारी बेनेह से, तीहयी मार बाह नी सोरी ते से पण मारी आह्य नी सोरी नी हय; अळतेण तीहयी मारी लाडी बण जी। अने ईसम हयु के जत्यार भगवान मने मारा बाह नु घोर सोड़ीन नीकळवा नो हुकम आप्यो, ता मे तीने केदो, ‘तु एतरी दया मार पोर करजे के आमु बेम जां-जां जीया तां-तां तु अमारा बारा मे केजे के आहयो मारो भाय से’।”
तत्यार अबीमेलेक गाडरा अने बोकड़ा, गाय अने बोळद्या, अने पावर अने पावर्याण ने लीन अब्राहम ने आप्यो अने तीनी लाडी सारा ने बी तीने पासी आप देदो। अने अबीमेलेक केदो, “देख, मारु देस तार अगळ से; जां तने गमे तां रे।” अने सारा ने तीहयो केदो, “देख, मे तारा भाय ने एक हजार चांदी ना सीक्का आपलो से। आनी सी तु तारा माणहु मे वण-गुनाळ्ळी गणायही, अने जे आखा तारी ह़ाते से जाणहे के तु कंय बी गलत काम नी करी।”
तत्यार अब्राहम यहोवा पांह वीन्ती कर्यो, अने यहोवा अबीमेलेक, अने तीनी लाडी, अने पावर्याण ने वारु कर्यो अने तीमना बी सोरा पयदा हयवा बाज ज्या।
काहाके यहोवा अब्राहम नी लाडी सारा ना कारण सी अबीमेलेक ना घोर ना आखा बयरा नी कोख पुरी रीती सी बंद कर देदलो हतो।
Source notes (1)
- Cross-reference उबजणाय कीताप 12:13; 26:7
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.