Paliya Bible
उबजणाय कीताप 19
सदोम ना भुंडला कामु
ह़ांती वेळा तीहया बे दुत सदोम नी तां आया; अने लुत सदोम ना झापला ह़ाते बह र्यो हतो। तीमने देखीन तीहयो तीमनी सी भेट करवा करीन उठ्यो; अने मोडा ना भरहे ढुंगो वळीन वांदीन केदो; “ए मारा मालक्या, आह़फा पावर्या ना घोर मे आव, अने आखी रात अराम कर, अने आह़फा ना पोगे धोव, अळतेण ह़वारे उठीन आह़फा ना वाट्ये जजे।” तीहया केदा, “आमु चोवराया मेत रात वीताड़हु।”
अने तीहयो तीमनी सी घणी वीन्ती करीन तीमने राजी कर्यो; करीन तीहया तीनी ह़ाते चालीन तीना घोर मे आया; अने तीहयो तीमनी जुगु खाणु तीयार कर्यो, अने वण-खमीर ना रोट्ला बणावीन तीमने खवाड़्यो।
तीमने ह़ुव्वा नी सी पेले, सदोम ह़ेर ना माणहु, जवान सी लीन डायला लग, अने च्यारो-मेर ना आखा माणहु आवीन तीहया घोर ने घेरवी लेदा; अने लुत ने आड़ीन केवा बाज ज्या, “जे माणेह आज राते तारीन्तां आवला से तीहया कां से? तीमने अमारीन्तां बारथो लीन आव, के आमु तीमनी सी सीनाळु करीया।”1
तत्यार लुत तीमनी ह़ाते झापला नो बारो ज्यो, अने झापला ना आपणी पसळ बंद करीन केदो, “ए मारा भाय्हु, मे तमारी सी हात जोड़ु। आवु बुरु काम ना करो। ह़मळो, मारी बे सोरी से जे हमणे तक अदमी नु मुंडु नी देखी, मरजी हय ता मे तीमने तमारीन्तां बारी लीन आवु, अने तमने जीसम वारु लागे तेम वेहवार तीमनी सी करो: पण आहया अदमीम ने कंय नी करो; काहाके आहया मारी छत तळे आवला से।”
तीहया केदा, “सेटो हय जा!” अळतेण तीहया केवा बाज ज्या, “तु एक परदेसी हय्न आञे रेवा करीन आवलो पण हाव नीयाव करन्यो बण जेलो से; करीन हाव आमु तीमनी सी बी जादा तार ह़ाते बुराय करहु।” अने तीहया ते अदमी लुत ने घणा दबाव देवा बाज ज्या, अने झापलु तोड़वा करीन ह़ाते आया। तत्यार तीहया पोरणा हात अगा करीन लुत ने तीमनी ह़ाते घोर मे मोय हापकी लेदा, अने झापला ने बंद कर देदा। अने तीहया ह़ु नान्ला, ह़ु मोट्ला, आखा अदमीम ने जे घोर ना झापला पोर हता आंदळा कर देदा, पण तीहया झापलु ह़ोदता-ह़ोदता थाक ज्या।
लुत नु सदोम सी बचीन नीकळणु
अळतेण तीहया पोरणा लुत ने पुछ्या, “आञे तारु अळी कोय-कोय से? जमाय, सोरा, सोर्या, अने ह़ेर मे तारु जे कोय हय, तीहया आखाम ने लीन आहया जागा मे सी नीकळीन जत रे। काहाके आमु आहया जागा ने खत्तम करवा वाळा से, काहाके के आनी बुराय यहोवा नी तां पुग जेली से; अने यहोवा आमु ने आने खत्तम करवा करीन मोकल्लो से।”
तत्यार लुत आह़फा घोर सी नीकळीन आह़फाम ना जमाय ने, जीमनी ह़ाते तीनी सोर्याम नी ह़गाय हय जेली हती, ह़मजाड़ीन केदो, “उठो, आहया जागा मे सी नीकळीन चालो; काहाके यहोवा आहया ह़ेर ने खत्तम करवा वाळा से।” पण तीमना जमाय ह़मज्या के आहयो मजाक कर र्यो।
जत्यार परगड़ फाटवा बाज ज्यु, तत्यार दुत लुत सी ममार जावो करीन केदो अने केदो, “उठ, तारी लाडी अने बेम सोर्याम ने जे आञे से ली जा: नी ता तु बी आहया ह़ेर नी बुराय ह़ाते खत्तम हय जही।” पण तीहयो वार लगाड़तो र्यो, ता तीहया अदमी तीनो अने तीनी लाडी, अने बेम सोर्याम ना हात धर्या; अने तीमने नीकाळीन ह़ेर सी बारा कर देदा: काहाके यहोवा नी दया तीमनी पोर हती।2 अने आसम हयु के जत्यार तीहया तीमने बारा नीकाळ्या, तत्यार तीमने केदो, “आह़फा नो जीव लीन नाह जा; पासो फीरीन नी भाळजे, अने घाटी मे नी उबो रेजे; ह़ेला बड़ा पोर नाह जजे, नी ता तु बी खत्तम हय जही।”
लुत तीमने केदो, “ए मालीक, ईसम ना करे! देख, तारा पावर्या पोर तारी बरकत हयली से, अने तारी आनी मे ढेरेत दया देखाड़लो से, के मारा जीव ने बचाड़लो से; पण मे बड़ा पोर नाही नी सकतो, कंखर ईसम नी हये, के कानी वेला मारी पोर आय पड़े, अने मे मर जाम। देख, ह़ेलु ह़ेर ईसम ह़ाते से के मे तां जी सकत्लो, अने तीहयु नानु बी से। मने तां नाह जवा दे, ह़ु तीहयु ह़ेर नानु नी हय? अने मारो जीव बच जहे।”
दुत लुत ने केदो, “देख, आहया बारा मे बी तारा रावण्या मान्लो से, के जीना ह़ेर नी वात तु करलो से, तीने मे खत्तम नी करु। ममार तां नाह जा; काहाके जत्यार तक तु तां नी पुगे तत्यार तक मे कंय नी कर सकु।” आहया कारण सी तीहया ह़ेर नु नाम सोवर 3पड़्यु।
सदोम अने अमोरा नु खत्तम हयणु
लुत ने सोवर नी धेड़े पुगतेत दाहड़ु धरती पोर नीकळी आयु। तत्यार यहोवा आह़फी भणी गेथो सदोम अने अमोरा पोर ह़रग सी बारुद अने आक्ठु पाड़्यो;4 अने तीहया ह़ेरु ने आखी वारली जागा ने, अने ह़ेरु मे रेवा वाळा आखा माणहु ने, धरती नी आखी मेर भेळ खत्तम कर देदो। लुत नी लाडी जे तीनी पसळ हती पासी फीरीन भाळी, अने तीहयी खारलु मीठु नो खम्बो बण जी।5
ह़वारे अब्राहम उठीन तीहया जागा मे ज्यो, जां तीहयो यहोवा नी ह़ाते उबो हतो; अने सदोम, अने अमोरा, अने तीहया वारला जागा ना आखा देस नी भणी डोळा उचा करीन ह़ु देख्यो के तीहया देस मे सी धपत्ली भाटी ना धुकरान तेम उड र्यो। अने ईसम हयु के जत्यार भगवान तीहया वारला जागा ना ह़ेरु ने, जीमनी मे लुत रेतो हतो, उलट-पुलट करीन खत्तम कर्यो, तत्यार तीहयो अब्राहम ने फोम करीन लुत ने तीहयी घटना सी बचाड़ लेदो।
मोआबी अने अम्मोनी नी पयदावारी
लुत सोवर ने सोड़ देदो, अने बड़ा पोर आह़फा नी बेम सोरी भेळ रेवा बाज ज्यो; काहाके तीहयो सोवर मे रेवा सी बीहतो हतो; करीन तीहयो अने बेम सोर्या तां एक गुफा मे रेवा बाज ज्या। तत्यार मोट्ली सोरी नान्ली सोरी ने केदी, “अमारो बाह डायलो से, अने आखी धरती पोर कोय एवो अदमी नी हय जे कळी नी रीती नी अनसारे आपणी ह़ाते आवे अने सोरा पयदा करे। करीन आव, आपणु आपणा बाह ने अंगुर नो रोह पीवाड़ीन, तीनी ह़ाते ह़ुवया, जीनी सी आपणु आपणा बाह ना कुळ ने बचाड़ीन राखया।” अने तीहया तेत दाड़े रात नी टेमे आह़फा ना बाह ने अंगुर नो रोह पीवाड़्या, तत्यार मोट्ली सोरी तीना बाह ह़ाते जाय्न ह़ुय जी; पण तीहयो नी जाण्यो, के तीहयी कत्यार ह़ुयी, अने कत्यार उठ जी।
अने ईसम हयु के बीजा दाड़े मोट्ली सोरी नान्ली सोरी ने केदी, “देख, काले राते मे आपणा बाह ह़ाते ह़ुयी; करीन आज बी राते आपणु आपणा बाह ने अंगुर नो रोह पीवाड़या; तत्यार तु जाय्न तीनी ह़ाते ह़ुवजे के आपणु आपणा बाह नी लारे अवल्यात पयदा करया।” तत्यार तीहया ते दाड़े बी रात नी टेमे आह़फाम ना बाह ने अंगुर नो रोह पीवाड़्या, अने नान्ली सोरी जाय्न बाह ह़ाते ह़ुय जी; पण तीने तीनु बी ह़ुव्वा अने उठवा ना बारा मे पतो नी हतो। आहयी रीते लुत ना बेम सोर्या आह़फाम ना बाह सी भारेपोगे हयी। मोट्ली सोरी एक सोरो जणी अने तीनु नाम मोवाब पाड़्या; तीहयो मोआब6 नाम नी जाती नो जे आज तक से डायलो बाह हयो। अने नान्ली सोरी बी एक सोरो जणी, अने तीनु नाम बेनम्मी7 पाड़्या; तीहयो अम्मोन जातीम नो जे आज तक से डायलो बाह हयो।
Source notes (7)
- Cross-reference न्यायीयो 19:22,24
- Cross-reference 2 पतरस 2:7
- Footnote सोवर नानलो
- Cross-reference मत्ती 10:15; लुका 10:12; 2 पतरस 2:6
- Cross-reference लुका 17:32
- Footnote मोआब आह़फा ना बाह सी
- Footnote बेनम्मी मारो ह़गाय वाळा नो सोरो
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.