Paliya Bible
उबजणाय कीताप 18
ईसाक ना पयदा हयवा नो वायदो
अब्राहम मम्रे ना चोखला वांज्या झाड़ु नी वचमे वीजी-वीजी तोप नी टेमे तम्बु ना झापला पोर बह र्यो हतो, तत्यार यहोवा भगवान तीने दर्सन आप्यो: तीहयो डोळा उचा करीन नजर नाख्यो ता ह़ु देख्यो, के तीन अदमी तीनी अगळ उबा हय र्या। जत्यार तीहयो तीमने देख्यो ता तीहयो तीमनी सी भेट करवा करीन तम्बु ना झापले गेथो दवड़्यो, अने भुय्मे पड़ीन वांद्यो अने केवा बाज ज्यो,1 “ए मालीक, कदीम मारी पोर तारी दया नी नींगा से ता मे वीन्ती करु, के आह़फा पावर्या नी ह़ाते गेथो जती नी रेजे। मे थोड़ुक पाणी लावु अने तु आह़फा पोगु धोवीन आहया झाड़ ना साहळे आराम करे। अळतेण मे एक कटको रोट्लो ली आवु, अने तीने तमु खाय्न तारा जीव ने ठंडो करे; ता तीनीन अळतेण अगा जत रेजो काहाके तमु आह़फा पावर्या नी तांह आवला से।” तीहया केदा, “जीसम तु केय तेमेत कर।”
तत्यार अब्राहम ममार तम्बु मे सारान्तां ज्यो अने केदो, “दह कीलो मेदो लीन कुहण ले अने तीना रोट्ला बणाय ले।” अळतेण अब्राहम गाय अने बोळद्या ना टोळा मे दवड़ीन ज्यो, अने एक नानु अने वारु वाछड़ु लावीन आह़फा पावर्या ने आप्यो, अने तीहयो तीने ममार रांद्यो। तत्यार तीहयो दुद, अने आखरलु दुद, अने वाछड़ा नु रांदलु माह, लावीन तीमनी अगळ मेल देदो; अने आह़फो तीमने ह़ाते खाता लग झाड़ नी हेटो उबो र्यो।
तीहया तीने पुछ्या, “तारी लाडी सारा कां से?” तीहयो केदो, “तीहयी ते तम्बु मे से।”
तीहयो केदो, “में आज गेथो नव मयना बाद तारीन तां अळी आवही; अने तारी लाडी सारा नो एक सोरो पयदा हयहे।” सारा तम्बु ना झापला पोर जे अब्राहम ना पसळ हती ह़मळी री हती।2 अब्राहम अने सारा बेम घणा डाया हता; अने सारा नो मयनो आव्वा नु बी बंद हय जेलु हतु। करीन सारा मन मे मुरखाय्न आहयु केवा बाज जी, “मे ते डोकरी से, अने मारो धणी बी डोकरो से, ता ह़ु में हाव बी सवसार नो मजो ली सकु?”3
तत्यार यहोवा अब्राहम सी केदो, “सारा आहयु कीन काहा ह़ाही, के ह़ु मारा, जे मे आसवी डायली हय जेली से, ह़ाचलीन एक सोरो पयदा हयहे? ह़ु यहोवा जुगु काना काम काठु से? ठेरावली टेम मे, मतलब आज गेथो नव मयनान अळतेण, मे तारीन्तां अळी आवही, अने सारा नो सोरो पयदा हयहे।”4
तत्यार सारा आह़फी वात सी नीकारो करी; काहाके तीहयी बीह जी हती। तीहयी केदी “में नी ह़ाही।” मालीक केदो, “नी तु हाहली ते हती।”
अब्राहम सदोम ह़ेर जुगु वीन्ती करे
अळतेण तीहया अदमी तां गेथा चालीन, सदोम भणी भाळ्या; अने अब्राहम तीमने वळाव्वा करीन तीमनी ह़ाते-ह़ाते चाल्यो। तत्यार यहोवा केदो, “आहयु जे मे करत्लो से तीने ह़ु अब्राहम सी ह़ताड़ीन राखु? अब्राहम नी लारे ते ह़ाचलीन एक मोट्लु जोर-भर्यु राज्य उबजहे, अने धरती ना आखा राज्य तीनी लारे संयबरकत ह़ात करहे। मे तीने टाळलो से के तीहयो आह़फा ना सोराम अने घोरल्याम ने, जे तीनीन अळतेण रेहे, ह़ीकापण आले के धरमपणा अने नीयाव ना काम करे अने मारा यहोवा नी वाट्ये चालता रेय। तत्यार मे तीहया बोल ने पुरो करही जे मे अब्राहम सी करलो से।”
यहोवा केदो, “सदोम अने अमोरा ना वीरोद मे आड़वा बड़ जेलु से, अने तीमना पाप घणा जादा हय जेला से। करीन मे उतरीन देखही, के तीहया आड़वा नी लारे काम हयु के नी हयु, जे मारीन तांह तक पुगली से। कदीम नी कर्या हय ता मे जान लेही।”
तत्यार तीहया अदमी तां गेथा पासा सदोम नी भणी जत र्या; पण अब्राहम यहोवा नी ह़ाते उबो र्यो। तत्यार अब्राहम तीनी ह़ाते जाय्न केवा बाज ज्यो, “ह़ु तु ह़ाचलीन वेरी ह़ाते धरमी ने बी खत्तम करही? कदी तीहया ह़ेर मे पचाह धरमी हय ता ह़ु तु ह़ाचलीन तीहया जागा ने खत्तम करही अने तीहया पचाह धरमीम ना कारण जे तां से नी माफ करे? आहयी रीते ना काम करवा तारी सेटा रेय के वेरी ह़ाते धरमी ने बी मार नाखे अने धरम अने वेरी बेम नी हालत हये। आहयु तार सी सेटु रेय। ह़ु आखी धरती नो नीयाव करवा वाळो नीयाव नी करे?”
यहोवा भगवान केदो, “कदी मने सदोम ह़ेर मे पचाह धरमी माणेह जड़्या, ता तीमनी कारण सी तीहया आखा जागा ने छोड़ देही।”
अळतेण अब्राहम केदो, “ए मालीक, ह़मळ मे ते कादो अने रोखड़ो से; ता मे बी एतरी हीम्मत कर्यो की तार ह़ाते वात करु। कदी तीहया पचाह धरमी मे पांच कम हय जाय; ता ह़ु तु पांचेत कम हयवा ना कारण तीहया आखा ह़ेर ने खत्तम करही?” मालीक केदो, “कदी मने तीमनी मे पेतालीस बी जड़्या, ता बी तीमने खत्तम नी करु।”
अळतेण अब्राहम केदो, “कदी तां चाळीह जड़्या ता।” ता तीहयो केदो, “ता मे चाळीह ना कारण बी ईसम नी करु।”
अब्राहम अळी केदो, ए मालीक, रीह ना करे, ता मे कंय अळी केम: “कदी तां तीस जड़्या ता।” ता तीहयो केदो, “कदी मने तां तीस बी जड़्या ता, ता बी ईसम नी करु।”
अब्राहम केदो, “ए मालीक ह़मळ, मे एतरी हीम्मत ते कर्यो के तार ह़ाते वात करु: कदी तीमनी मे वीह जड़्या ता।” तीहयो केदो, “मे वीह नी कारण बी तीमने खत्तम नी करु।”
तत्यार अब्राहम केदो, “ए मालीक, रीह ना करे, मे एकीत वार अळी केही: कदी तीमनी मे दह जड़्या ता।” तीहयो केदो, “ता मे दह ना कारण बी तीमने खत्तम नी करु।” जत्यार यहोवा अब्राहम सी वात कर लेदो, तत्यार जत र्यो: अने अब्राहम आह़फा ना घोर जत र्यो।
Source notes (4)
- Cross-reference ईब्रानीयो 13:2
- Cross-reference रोमीयो 9:9
- Cross-reference 1 पतरस 3:6
- Cross-reference लुका 1:37
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.