Paliya Bible
उबजणाय कीताप 11
भासा मे गरबड़ी
आखी धरती पोर एकीत भासा, अने एकीत बोली हती। तीहयी टेमे माणहु उगवणा भणी चालता-चालता सीनार देस मे एक चोवगान देखीन तीनी मे वह ज्या। ता तीहया आह़फा मे केवा बाज ज्या, “आवो, आपणु ईटड़ा बणावी-बणावीन वारु रीते आक्ठा मे पकाड़्या।” अने तीहया दगड़ा ना जागा पोर ईटड़ा सी, अने चुना ना जागा पोर कादा ना गारा सी काम कर्या। अळी तीहया केदा, “आवो, आपणु एक ह़ेर अने एक मीनार बणाय लीया, जीनी चोटी ह़रग सी वात करे, आहयी रीती सी आखा आपणु नाम करे, आसम नी हये के आपणु ने आखी धरती पोर फेलवा पड़े।”
जत्यार माणहु ह़ेर अने एक मीनार बणाव्वा लाग्या; ता तीमने देखवा करीन यहोवा उतरी आयो। अने यहोवा केदो, “मे ह़ु देखु, के आखा एकीत टोळा ना से अने भासा बी तीमनी आखा नी एकीत से, अने तीहया एवुत काम बी सुरु कर्या; अने हाव जे कंय ते करवा नी कोसीत करहे; तीमनी मे सी कंय बी तीमनी जुगु काठु नी हये। करीन आवो, आपणु उतरीन ईमनी भासा मे मोटी गरबड़ी करया, के तीहया एक बीजा नी बोली नी ह़मज सके।” आहयी रीते यहोवा तीमने तां गेथो आखी धरती नी उपर फेलाड़ देदो; अने तीहया ते ह़ेर ने बणाव्वा छोड़ देदा। आहया कारण तीहया ह़ेर नु नाम बेबीलोन1 पड़्यु; काहाके आखी धरती नी भासा मे जे गरबड़ी से, तीहयी यहोवा तांत नाख्यो, अने तांत गेथी यहोवा माणहु ने आखी धरती पोर फेलाड़ देदो।
सेम नो कुळी वेलो
(1 ईतीहास 1:24-27)
सेम नी अवल्यात आहयी से। मुसळ-धार्या पाणी ना बे साल नी अळतेण जत्यार सेम एक ह़ोव साल नो हयो, ता तीनी सी अर्पक्सद पयदा हयो। अने अर्पक्सद ना पयदा हयवा नी अळतेण सेम पांच ह़ोव साल जीवत्लो र्यो; अने तीना अळी बी सोरा-सोरी पयदा हया।
जत्यार अर्पक्सद पंयतीस साल नो हयो, तत्यार तीना सी सेलह पयदा हयो; अने सेलह ना पयदा हयवा नी अळतेण अर्पक्सद च्यार ह़ोव साल अळी जीवत्लो र्यो, अने तीना अळी बी सोरा सोरी पयदा हया।
जत्यार सेलह तीस साल नो हयो, तत्यार तीनी लारे एबेर पयदा हयो; अने एबेर ना पयदा हयवा नी अळतेण सेलह च्यार ह़ोव तीन साल अळी जीवत्लो र्यो, अने तीना अळी बी सोरा सोरी पयदा हया।
जत्यार एबेर चोवतीस साल नो हयो, तत्यार तीनी लारे पेलेग पयदा हयो; अने पेलेग ना पयदा हयवा नी अळतेण एबेर च्यार ह़ोव तीस साल अळी जीवत्लो र्यो, अने तीना अळी बी सोरा सोरी पयदा हया।
जत्यार पेलेग तीस साल नो हयो, तत्यार तीनी लारे रु पयदा हयो; अने रु ना पयदा हयवा नी अळतेण पेलेग बे ह़ोव नव साल अळी जीवत्लो र्यो, अने तीना अळी बी सोरा सोरी पयदा हया।
जत्यार रु बत्तीस साल नो हयो, तत्यार तीनी लारे सरुग पयदा हयो; अने सरुग ना पयदा हयवान बाद, रु बे ह़ोव ह़ात साल अळी जीवत्लो र्यो, अने तीना अळी बी सोरा सोरी पयदा हया।
जत्यार सरुग तीस साल नो हयो, तत्यार तीनी लारे नाहोर पयदा हयो; अने नाहोर ना पयदा हयवा नी अळतेण सरुग बे ह़ोव साल अळी जीवत्लो र्यो, अने तीना अळी बी सोरा सोरी पयदा हया।
जत्यार नाहोर उन्तीस साल नो हयो तत्यार तीनी लारे तेरह पयदा हयो; अने तेरह ना पयदा हयवा नी अळतेण नाहोर एक ह़ोव उन्नीस साल अळी जीवत्लो र्यो, अने तीना अळी बी सोरा सोरी पयदा हया।
जत्यार तक तेरह सत्तर साल नो हयो, तत्यार तीनी लारे अब्राम अने नाहोर अने हारान पयदा हया।
तेरह नो कुळी वेलो
तेरह ना अवल्यात आहया से: तेरह सी अब्राम, अने नाहोर, अने हारान पयदा हया; अने हारान सी लुत पयदा हयो। अने हारान आह़फा ना बाह नी अगळेत, कसदीयो ना उर नाम ना ह़ेर मे, जे तीनी पयदावारी नो जागो हतो मर ज्यो। अब्राम अने नाहोर बेम जणा वेवा कर्या। अब्राम नी लाडी नु नाम सारे, अने नाहोर नी लाडी नु नाम मील्का हतु। आहयी तीहया हारान नी सोरी हती, जे मील्का अने यीस्का बेम नो बाह हतो। सारे वांज्याण हती; तीनी एक बी अवल्यात नी हयी।
अने तेरह आह़फा सोरा अब्राम, अने आह़फा सोरान सोरो लुत, जे हारान नो सोरो हतो, अने आपणी ववेह सारे, जे तीना सोरा अब्राम नी लाडी हती, आहया आखाम ने लीन कसदीयो ना उर ह़ेर मे गेथो नीकळीन कनान देस जवा करीन चाल्यो; पण हारान नाम ना देस मे पुगीन तांत रेवा बाज ज्या। जत्यार तेरह बे ह़ोव पांच साल नो हयो, तत्यार तीहयो हारान देस मे मर ज्यो।
Source notes (1)
- Footnote बेबीलोन गरबड़ी
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.