Paliya Bible
उबजणाय कीताप 10
नुह ना सोरा नो कुळीवेलो
(1 ईतीहास 1:5-23)
नुह ना सोरा सेम, हाम, अने येपेत हता; तीमना सोरा मुसळ-धार्या पाणी नी अळतेण पयदा हया: तीमनो कुळीवेलो आहयो से।
येपेत ना सोरा: गोमेर मागोग, मादे, यावान, तुबल, मेसेक, अने तीरास हया। गोमेर ना सोरा: असकनज, रीपत, अने तोगर्मा हया। अने यावान नी अवल्यात मे एलीसा अने तर्सीस, अने कीत्ती, अने दोदानी माणहु हया। ईमनी अवल्यात आड़जात्या ना बरप ना बड़ा ना देसु मे ईसम वटाय ज्या के तीहया भाती-भाती नी बोली मे, कुळीम, अने राज्य नी लारे अलग-अलग हय ज्या।
अळी हाम ना सोरा: कुस, मीस्र, पुत अने कनान हया। अने कुस ना सोरा सबा, हवीला, सबता, रामा अने सबुतका हया। अने रामा ना सोरा सबा, अने ददान हया। कुस नी अवल्यात मे नीम्रोद बी हयो; धरती पोर पेल्लो ताखत वाळो जीकवा वाळो तीहयोत हयो। तीहयो यहोवा नी नींगा मे ताखत वाळो सीकार खेलवा वाळो बण्यो, आनी सी आहयु कवाड़ो चाल्यो। “नीम्रोद नी अगळ यहोवा नी नींगा मे ताखत वाळो सीकार खेलवा वाळो।” तीना राज्य नी सुरुवात सीनार देस मे बेबीलोन, एरेख, अक्कद, अने कलने सी हयी। तीहया देस सी तीहयो नकळीन अस्सुर देस भणी ज्यो, अने नीनवे, रहोबोतीर अने कालह ने, अने नीनवे अने कालह नी वचे जे रेसेन से, तीने बी वहाड़्यो; मोट्लु ह़ेर आहयुत से।
मीस्र नी अवल्यात मे लुदी, अनामी, लहाबी, नप्तुही, अने पत्रुसी, कसलुही, अने कप्तोरी माणहु हया, कसलुहीयो मे सी ते पलीस्ती माणहु नीकळ्या।
कनान नी अवल्यात मे मोट्लो सोरो सीदोन, तत्यार हीत्त, यबुसी, एमोरी, गीर्गासी, हीव्वी, अर्की, सीनी, अर्वदी, समारी, अने हमाती माणहु बी हया; अळी कनानीयो नी अवल्यात बी फेल ज्यी। अने कनानीयो नी काकड़ सीदोन सी लीन गरार नी वाट सी हय्न गाजा तक अने अळी सदोम अने अमोरा अने अदमा अने सबोयीम नी वाट सी हय्न लासा तक हयु। हाम नी अवल्यात मे आहयात हया; अने आहया अलग-अलग घोराणा, बोली मे, देसु, अने जातीम नी अनसारे अलग-अलग हय ज्या।
अळी सेम, जे आखा एबेर नी अवल्यात नो मुख्यो माणेह हयो, अने जे येपेत नो मोट्लो भाय हतो, तीना बी सोरा पयदा हया। सेम ना सोरा: एलाम, अस्सुर, अर्पक्सद, लुद अने अराम हया। अराम ना सोरा: उस, हुल, गेतेर अने मस हया। अने अर्पक्सद सेलह ने अने सेलह एबेर ने पयदा कर्यो। अने एबेर ना बे सोरा पयदा हया, एक नु नाम पेलेग आहया कारण पाड़्या के तीना दाड़ा मे धरती वटाय जी, अने तीना भाय नु नाम योक्तान हतु। अने योक्तान अल्मोदाद, सेलेप, हसरमावेत, येरह, हदोराम, उजाल, दीक्ला, ओबाल, अबीमाएल, सबा, ओपीर, हवीला, अने योबाब ने पयदा कर्यो: आहयात आखा योक्तान ना सोरा हया। ईमनो रेवा नो जागो मेसा गेथो लगाड़ीन सपारा, जे उगवणु एक बड़ा वाळु देस से, तीनी वाट्ये तक हयु। सेम ना सोरा आहयात हया; अने आहया अलग-अलग घोराणा, भासाम, देसु अने राज्य नी लारे अलग-अलग हय ज्या।
नुह ना सोराम ना घोरु आहयात से: अने तीमनु राज्य नी लारे तीमनो कुळीवेलो आहयोत से; अने मुसळ-धार्या पाणीन अळतेण धरती पोर नु राज्य ईमनीत मे सी हय्न वटाय ज्यु।
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.