Paliya Bible
उबजणाय कीताप 12
भगवान भणी गेथु अब्राम ने बोलावणु
यहोवा अब्राम सी केदो, “आह़फा देस, अने आह़फा कुटुम, अने आह़फा बाह ना घोर ने छोड़ीन ह़ेला देस मे जत रे जे मे तने देखाड़ही।1 अने मे तारी लारे एक मोटु राज्य बणावही, अने तने संयबरकत आलही, अने तारु नाम मोटु करही, अने तु संयबरकत मे मुख्यो हयही। अने जे तने बरकत आले, तीमने मे संयबरकत आलही; अने जे तारी बुराय करे, तीमने मे सराप आलही अने धरती ना आखा कुळ तारी लारे संयबरकत हात करहे।”2
यहोवा ना आहया बोल नी लारे अब्राम चाल्यो; अने लुत बी तीनी ह़ाते चाल्यो; अने अब्राम हारान देम सी नकळ्यो तीहयी टेमे तीहयो पीचोत्तर साल नो हतो। आहयी रीते अब्राम आह़फा नी लाडी सारे, अने आह़फा भतरेजा लुत ने, अने जे धन तीहया एकठा करला हता, अने जे जानवरु तीहया हारान मे हात करला हता, आखाम ने लीन कनान देस मे जावा करीन चाल पड़्यो, अने तीहया कनान देस मे पुग ज्या। तीहया देस ना वचमे सी जता जीन अब्राम सकेम मे, जां मोरे नु चोखलु वांज्यु झाड़ से तां पुग्या। तीहयी टेमे तीहया देस मे कनानी माणहु रेता हता। तत्यार यहोवा अब्राम ने दर्सन आपीन केदो, “आहयु देस मे तारी अवल्यात ने आपही।” अने तीहयो तां यहोवा वाटु एक वेदी बणायो, जे तीने दर्सन मे आपलो हतो।3 अळी तां गेथो अगो जीन, तीहयो ते बड़ा पोर आयो, जे बेतेल ह़ेर नी उगवणी भणी से; अने आह़फु तम्बु तीहया जागा मे उबो कर्यो जीनी बुडवणी भणी बेतेल, अने उगवणी भणी ए से; अने तां बी यहोवा जुगु एक वेदी बणायो: अने यहोवा नी भक्ती कर्यो। अने अब्राम अगो जीन कनान ना नेगेब देस भणी जत र्यो।
मीस्र देस मे अब्राम
तीना देस मे काळ पड़्यो: करीन अब्राम मीस्र देस मे जत र्यो के तां परदेसी बणीन रेय काहाके देस मे घणो काळ पड़लो हतो। अळतेण आसम हयु के मीस्र देस नी ह़ाते पुगीन, तीहयो आह़फी लाडी सारे ने केदो, “ह़मळ, मने मालम से, के तु एक घटाळी बयर से; अने जत्यार मीस्री माणहु तने देक्खे, तत्यार केहे, ‘आहयी ह़ेला नी लाडी से,’ करीन तीहया मने ते मार नाखहे, पण तने जीवत्ली राख लेहे। पण तु आहयु केजे, ‘मे हीनी बेनेह से,’ जीनी सी तारीन करते मारु वारु हये अने मारो जीव तारीन करते बचे।”4 अळतेण आसम हयु के जत्यार अब्राम मीस्र देस मे आयो, तत्यार मीस्री माणहु तीनी लाडी ने देख्या के आहयी घणी घटाळी से। अने मीस्र नो राजा फीरोन ना मुख्या तीने देखीन फीरोन नी अगळ तीनी बड़ाय कर्या: करीन तीहयी बयर फीरोन नी हवेली मे पुगाड़ देदा। अने फीरोन तीनीन कारण अब्राम नी भलाय कर्यो; अने तीने गाडरा-बोकड़ा, गाय-बोळद्या, पावर-पावर्याण, गदड़ा-गदड़ी, अने उटड़ा जड़्या।
तत्यार यहोवा अब्राम नी लाडी सारे नी कारण फीरोन अने तीना घोराणा पोर मोटी-मोटी गरा नाख्यो। तत्यार फीरोन अब्राम ने बोलावीन केदो, “तु मार ह़ाते आहयु ह़ु कर्यो? तु मने ह़ुका नी देखाड़्यो के तीहयी तारी लाडी से? तु ह़ुका केदो के तीहयी तारी बेनेह से? मे हीने मारी लाडी बणाव्वा करीन लायो; पण हाव आह़फी लाडी ने लीन आञे गेथो जतरे।” अने फीरोन आह़फा माणहु ने तीनी बारा मे हुकम आप्यो अने तीने अने तीनी लाडी ने, आखा धन भेळ जे तीनु हतु, मोकली देदो।
Source notes (4)
- Cross-reference नेवताळा ना काम 7:2,3; ईब्रानीयो 11:8
- Cross-reference गलातीयो 3:8
- Cross-reference गलातीयो 3:17; नेवताळा ना काम 7:5
- Cross-reference उबजणाय कीताप 20:2–26:7
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.