Paliya Bible
नीरगमन 4
भगवान नु मुसा ने घणी जुदी सक्ती आपणु
ता मुसो जपाप आप्यो, “तीहया मारो भरहो नी करे अने नी मारी ह़मळे, अने केहे, ‘यहोवा तने दरसन नी आप्यो।’”
यहोवा तीने केदो, “तारा हात मे हीय्यु ह़ु से?” तीहयो केदो, “लाकड़ी।”
तीहयो केदो, “ईने धरती पोर नाख दे।” जत्यार तीहयो तीने धरती पोर नाख्यो ता तीहयी गड़हो बण जी, अने मुसो तीनी अगळ गेथो नाह्यो। ता यहोवा मुसा ने केदो, “हात अगो करीन ईनी पुछड़ी धर ले, जत्यार तीहयो हात अगो करीन तीने धर्यो ता तीहयी तीना हात मे पासी लाकड़ी बण जी। अने तीहया माणहु आनी पोर भरहो करहे। काहाके तमारा आड़ा-बुड़ा नो भगवान, मतलब अब्राहम, ईसाक, अने याकुब नो भगवान, यहोवा तने दरसन आपलो से।”
अळतेण यहोवा तीने आहयु बी केदो, “आह़फा नो हात छाती पोर मेकीन ढाक।” अने तीहयो आह़फा नो हात छाती पोर मेकीन ढाक लेदो; अळतेण तीहयो हात सेटो कर्यो ता देख्यो के तीनो हात कुड़ावान हात ने तेवो बरप ने तेम धोळोबग हय ज्यो। ता तीहयो केदो, “तारो हात छाती पोर अळी मेकीन ढाक।” तीहयो आह़फा नो हात छाती पोर मेकीन ढाक लेदो; अने जत्यार तीहयो छाती पोर गेथो सेटो कर्यो ता ह़ु देखे के तीहयो आखु डील ने तेवो हय ज्यो। ता यहोवा केदो, “कदीम तीहया तारी वात नो भरहो नी करे, अने पेल्नी सेलाणी ने नी माने, ता बीजी सेलाणी पोर भरहो करहे। अने कदीम तीहया आहयी बेम सेलाणी नो भरहो नी करे अने तारी वात ने नी माने, ता तु नील नंदी मे गेथु थोड़ुक पाणी लीन ह़ुकला जागा पोर नाखजे; अने जे पाणी तु नंदी मे गेथु नीकाळही तीहयु ह़ुकला जागा पोर लोय बण जहे।”
मुसो यहोवा ने केदो, “ए मारा परभु, मे बोलवा मे वारु नी हय, अने नी ते पेले हतो, अने नी तां गेथो जत्यार गेथो तु तारा चाकर्या ह़ाते वात करवा बाज ज्यो। मे ते मोडु अने जीप नो बोबड़्यो से।”
यहोवा तीने केदो, “माणेह नु मोडु कोय बणावलु से? अने माणहु ने, गुंगा, अने बेरा, नीता देखवा वाळा, नीता आंदळा, मने यहोवा ने सोड़ीन कोय बणावे? ह़ु मे तीहयोत यहोवा नी हय? हाव जा, मे तने बोलवा मे मदत करही, अने जे तु केवा हहे तीहयु तने ह़ीकाड़तो जही।”
तीहयो केदो, “ए मारा मालीक, तु कोयने बीजात ने मोकल दे।”
ता यहोवा मुसा पोर खीजवाय्न केदो, “ह़ु तारो भाय लेवी घोराणा नो हारुन नी हय? मने पक्कु मालम से के तीहयो बोलवा मे वारु नी हय, अने तीहयो तने भेटवा करीन नीकळीन आवे; अने तने देखीन मन मे खुस हयहे। तु तीनी ह़ाते वात करजे अने तीने देखाड़जे के ह़ु करवा नु से, मे तीने अने तने बोलवा मे मदत करही, अने तमने ह़ु करवा नु से तीहयु ह़ीकाड़तो रेही। हारुन तारी भणी गेथो माणहु ह़ाते वात कर्या करहे, तीहयो तारी जुगु बोलवा वाळो अने तु तीनी जुगु भगवान ठेरही। अने तु आहयी लाकड़ी ने हात मे लीन जा अने आनीत सी आहया सेलाण्या ने देखाड़जे।”
मुसा नु मीस्र देस पासु जाणु
ता मुसो आह़फा ना ह़ाह़रा यीत्रोन्तां ज्यो अने तीने केदो, “मने मोकल दे के मे मीस्र देस मे रेवा वाळा मारा भाय-बेन्यान्तां जाय्न देखु के तीहया हजु तक जीवत्ला से के नी।” यीत्रो केदो, “वारु सुक ना जीवे जा।”
अने यहोवा मीद्यान देस मे मुसा ने केदो, “मीस्र देस मे जत रे; काहाके जे माणहु तारा जीव ना तरहेला हता तीहया आखा मर जेला से।”1 ता मुसो आह़फा नी लाडी ने अने सोरु ने गदड़ु पोर बहाड़ीन मीस्र देस भणी भगवान नी आपली तीहयी लाकड़ी ने हात मे लीन पासो आयो।
ता यहोवा मुसा ने केदो, “जत्यार तु मीस्र मे पुगे ता धीयान राखजे के जे चमत्कार तारा हक मे करलो से तीहया आखा फीरोन ने देखाड़जे; पण मे तीनु मन ने एकहेट्यु करही, अने तीहयो मारा माणहु ने जवा नी देय। अने तु फीरोन ने केजे, ‘यहोवा आसम केय, ईस्रायल मारो आखा गेथो मोट्लो सोरो से,2 अने मे जे तने की देदलो से के मारा सोरा ने जवा दे के तीहयो मारी भक्ती करे; अने तु तीने हजु तक जवा नी देदो, करीन मे तारा मोट्ला सोरा ने मार नाखही।’”3
ता आसम हयु के वाट्ये धरमसाहळा मे यहोवा मुसा ने भेटीन तीने मार नाखवा हींड्यो।4 ता सीप्पोरा एक धार वाळो वातड़लो दगड़ो लीन आह़फा नु सोरु नी फतरी वाडीन खतनु करी, अने फतरी ने आहयु कीन मुसा ना पोग पोर नाखी, “ह़ाचलीनेत तु मारी जुगु लोय वयाड़वा वाळो मारो घोरवाळो से।” ता यहोवा तीने छोड़ देदो। तीहयी टेमे खतना ना कारण सी सीप्पोरा केदी, “तु लोय वयाड़वा वाळो मारो घोरवाळो से।”
ता यहोवा हारुन ने केदो, “मुसा ने भेटवा करीन जंगल मे जा।” तीहयो ज्यो अने भगवान ना बड़ा पोर तीने भेट्यो अने तीने गोळो देदो। ता मुसो हारुन ने आहयु देखाड़्यो के यहोवा ह़ु-ह़ु वात कीन तीने मोकल्लो से, अने काना-काना सेलाण्या देखाड़वा करीन तीने हुकम आपलो से। ता मुसो अने हारुन जाय्न ईस्रायली ना आखा डायला ने एक्ठा कर्या। अने जेतरी वात यहोवा मुसा ने केदलो हतो, तीहयी आखी वात हारुन तीमने ह़मळायो, अने माणहु ना डोळा अगळ तीहया सेलाण्या बी देखाड़्यो। अने तीहया तीमनो भरहो कर्या; आहयु ह़मळीन के यहोवा ईस्रायली माणहु नी फोम करलो से अने तीमना दुख पोर नींगा नाखलो से, अने तीहया मुंडु हेटु करीन वांद्या।5
Source notes (5)
- Cross-reference नेवताळा ना काम 7:34; मत्ती 2:20
- Cross-reference वेवस्थावीवरन 1:31; यीरम्या 31:9
- Cross-reference नीरगमन 12:29
- Cross-reference उबजणाय कीताप 17:14; 32:25
- Cross-reference नीरगमन 14:21; युहन्ना 2:11
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.