Paliya Bible
नीरगमन 3
धपत्लु झाड़
मुसो आह़फा ना ह़ाह़रा यीत्रो नाम ना मीद्यान देस ना पुंजारा ना गाडरा अने बोकड़ा चारतो हतो; अने तीहयो तीमने जंगल नी बुडणली ह़ोड़ होरेब नाम ना भगवान ना बड़ान्तां ली ज्यो। अने भगवान नो दुत एक काटावाळा झाटवा ना वचे आक्ठा नी आच मे दरसन आप्यो; अने तीहयो डोळा उचा करीन देख्यो के झाटवु धपवा बाज र्यु, पण रोखड़ो नी बणतु। तत्यार मुसो सोच्यो, “में हींखर जीन आहयु मोट्लु वहराड़न्यु काम ने देखही के तीहयु झाटवु ह़ुका नी धपतु।”
जत्यार यहोवा देख्यो के मुसा झाटवु देखवा करीन वळीन आव्वा बाज र्यो ता भगवान झाटवा नी वचे रीन तीने केदो, “ए मुसा, ए मुसा!” मुसा केदो, “होव मे आञे से।”
तीहयो केदो, “आंखर ह़ाते ना आवे; काहाके जे जागा पोर तु उबो हय र्यो तीहयी चोखली जागा से।” अळतेण तीहयो केदो, “मे तारा बाह नो भगवान, अने अब्राहम नो भगवान, ईसाक नो भगवान, अने याकुब नो भगवान से।” तत्यार मुसा जे भगवान भणी देखवा सी बीह ज्यो, अने आह़फा नु मोडु ढाक लेदो।
अळतेण यहोवा भगवान केदो, “मे मारा माणहु ने जे मीस्र मे से, तीमना दुख ने पक्को देखला से; अने तीमनु जे आड़नु काम कराव्वा वाळा नी कारण सी हये तीने बी मे ह़मळ्ळो से, अने तीमनी वेला पोर मे मन लगाड़लो से; एतरे हाव मे उतरीन आवलो से के तीमने मीस्र वाळा ना वस मे गेथो सोड़ावु, अने तीहया देस सी नीकाळीन एक वारला अने मोट्ला देस, एवा देस मे जां दुद अने मोद ना झोरु वये, मतलब कनानी, हीत्ती, एमोरी, परीज्जी, हीब्बी, अने यबुसी माणहु ना जागा मे पुगाड़ु।1 करीन हाव ह़मळ, ईस्रायलीम नु आड़नु मने ह़मळाय पड़लु से, अने मीस्री माणहु नु तीमने वेला पाड़नु बी मने देखाव पड़लु से। करीन, आव मे तने फीरोन ने तां मोकलु के तु मारा ईस्रायली माणहु ने मीस्र मे गेथा नीकाळ ली आवे।”
पण मुसो भगवान ने केदो, “मे कोय से जे फीरोन ने तां जाम, अने ईस्रायल ने मीस्र मे गेथो नीकाळ लावु?”
भगवान केदो, “पक्को मे तारी ह़ाते रेही; अने आहयी वात नो के तारो मोकलवा वाळो मे से, तारी जुगु आहयी सेलाणी रेहे के जत्यार तु तीहया माणहु ने मीस्र मे गेथो नीकाळ लावही, ता तमु आहयात बड़ा पोर मारी भक्ती करहु।”
मुसो भगवान ने केदो, “जत्यार मे ईस्रायलीम ने तां जाय्न तीमने केम, ‘तमारा बाह नो भगवान मने तमारीन्तां मोकल्लो से,’ ता कदीम तीहया मने पुछे, ‘तीनु ह़ु नाम से?’ ता मे तीमने ह़ु कीही?”2
भगवान मुसा ने केदो, “मे जे से तीहयो से।” अळतेण तीहयो केदो, “तु ईस्रायलीम ने केजे, ‘जीनु नाम मे से3 तीहयोत मने तमारीन्तां मोकल्लो से।’”4 अळतेण तीहयो केदो, “तु ईस्रायली माणहु ने आहयु केजे, ‘तमारा बाहु नो भगवान, मतलब अब्राहम नो भगवान, ईसाक नो भगवान, अने याकुब नो भगवान, यहोवा, तीहयोत मने तमारीन्तां मोकल्लो से। सदा तक मारु नाम आहयुत रेहे, अने आखी पीड़ी मे मारी फोम आनी सीत हया करहे।’ करीन हाव जाय्न ईस्रायली डायलाम ने एक्ठा कर, अने तीमने के, ‘तमारा बाहु अब्राहम, ईसाक, अने याकुब नो भगवान, मने दरसन आपीन केदो के मे तमारी पोर अने तमारी ह़ाते जे वेहवार मीस्र मे करे तीनी पोर धीयान लगाड़लो से; अने मे ठाण लेदलो से के तमु ने मीस्र मे ना दुख मे गेथो नीकाळीन कनानी, हीत्ती, एमोरी, परीज्जी, हीब्बी, अने यबुसी माणहु ना देस मे लीन जही, जे एवु देस से के जीनी मे दुद अने मोद ना झोरु वये।’”
ता तीहया तारी मानहे; अने तु ईस्रायली डायलाम ने ह़ाते लीन मीस्र ना राजान्तां जाय्न तीने आहयु केजे, “ईब्रानीम ना भगवान, यहोवा ह़ाते अमारी भेट हयी; करीन हाव आमने तीन दाड़ा नी चाल नी वाट पोर जंगल मे जवा दे के अमारा भगवान यहोवा ने भेट चड़ावया।” मे जाणु के मीस्र नो राजा तमने तत्यार तक जवा नी देय, जत्यार तक मारा जोरभर्या हात नी सक्ती देख नी लेय। करीन मे हात बड़ाय्न तीहया आखा वहराड़न्या काम सी, जे मीस्र नी वच मे करही, तीहया देस ने मारही; अने आनीन अळतेण तीहयो तमने जवा देहे।
“ता मे मीस्री माणहु ने मारा माणहु पोर दया करावही; अने जत्यार तमु नीकळहु ता ठारला हाते नी नीकळो।5 मतलब तमारी एक-एक बयर आह़फा-आह़फाम नी आड़े-धेड़े वाळी, अने तीमना घोर मे रेवा वाळी पांह ह़ोनु-चांदी नु वजन, अने लुगड़ा मांग लेहे, अने तमु तीमने तमारा सोरा अने सोर्या ने पेरावजो; आहयी रीते तमु मीस्री माणहु ने लुटहु।”
Source notes (5)
- Cross-reference उबजणाय कीताप 15:19-21
- Cross-reference नीरगमन 6:2,3
- Footnote जीनु नाम मे से मे यहोवा से
- Cross-reference परकासीतवाक्य 1:4,8
- Cross-reference नीरगमन 12:35,36
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.