Paliya Bible
नीरगमन 2
मुसा नु पयदा हयणु
लेवी ना घोराणा नु एक माणेह एक लेवी घोराणा नी बयर ह़ाते वेवा कर लेदु। तीहयी बयर भारेपोगे हयी अने तीनो एक सोरो पयदा हयो; अने आहयु देखीन के आहयु सोरु घटाळु से, करीन तीने तीहयी तीन मयना लग ह़ताड़ीन राखी।1 जत्यार तीहयी तीने अळी जादा ह़ताड़ीन राख नी सकी ता दुंगळा नी एक टोपली लीन तीने डमर्यु चोपड़ी अने तीनी मे सोरु ने मेकीन नील नंदी नी धेड़े दुंगळा नी वचमे पाणी मे मेक आयी। तीहयु सोरु नी बेनेह सेटी उबी रीन देख री हती के तीनु ह़ु हये।
ता फीरोन नी सोरी उंगळवा करीन नंदी नी धेड़े आयी। अने तीनी पावर्याण सोर्या नील नंदी नी धेड़े फीरता र्या। ता तीहयी बरु नी वचमे टोपली ने देखी अने तीनी चाकर्याण ने टोपली लाव्वा करीन मोकली। जत्यार तीहयी तीने उगाड़ीन देखी के एक रड़त्लु सोरु से, ता तीने तीनी पोर दया आय जी अने तीहयी केदी, “आहयु ते काना ईब्रानी नु सोरु हहे।”
ता सोरु नी बेनेह फीरोन नी सोरी ने केदी, “ह़ु मे जाय्न ईब्रानी बयरा माय्न कानी बयर ने तारीन्तां बोलाय लावु, जे तारी जुगु आहयु सोरु ने दुत पीयाड़्या करे?”
फीरोन नी सोरी केदी, “जा।” ता सोरी जाय्न ते सोरु नी आय्ह ने बोलाय लायी। फीरोन नी सोरी तीने केदी, “तु आहयु सोरु ने लीजा अने मारी जुगु आने दुत पीयाड़्या कर, अने मे तने दाड़की आपही।” ता तीहयी बयर ते सोरु ने ली जाय्न दुत पीयाड़वा बाज जी। जत्यार सोरु थोड़ुक मोटु हयु ता तीहयी तीने फीरोन नी सोरीन्तां ली जी, अने तीहयो तीनो सोरो ठेर्यो; अने तीहयी आहयु कीन तीनु नाम मुसो2 राखी, “मे आने पाणी मे गेथो नीकाळली से।”
मुसा नु मीद्यान देस नाहणु
जत्यार मुसो जुवान हयो, ता तीहया दाड़ा मे तीहयो बाहर जाय्न आह़फा ना भाय-बेन्या ना दुख पोर नजर नाखवा बाज ज्यो; तत्यार तीहयो देख्यो के एक मीस्री माणेह तीना ईब्रानी भाय ने देवा बाज र्यु।3 तीहयो एथोन-एथो देख्यो के कोय नी हय, ता तीहयो मीस्री माणेह ने मार नाख्यो अने बालु रेवती मे ह़ताड़ नाख्यो।
अळतेण बीजा दाड़े तीहयो बाहर जाय्न देख्यो के बे ईब्रानी माणहु आह़फा-आह़फात झुमायवा बाज र्या। तीहयो गुनाळ्ळा ने केदो, “तु काहा तारा भाय ने देवा बाज र्यो?”
तीहयो केदो, “कोय तने अमारी पोर अदीकारी अने नीयाव करन्यो बणायु? जे भाते तु मीस्री ने मार्यो, ह़ु तु आहयीत रीते मने बी मार नाखवा हय र्यो?” ता मुसो आहयु सोचीन बीह ज्यो, “ह़ाचलीत आहयी वात उजन्ती हय जेली से।” जत्यार फीरोन आहयी वात ह़मळ्यो ता मुसा ने मार नाखवा नी योजना बणायो। पण मुसो फीरोन ने तां गेथो नाह ज्यो अने मीद्यान देस मे जाय्न रेवा बाज ज्यो; अने तीहयो तां एक कुवान्तां बह ज्यो।4 मीद्यान देस ना पुंजारा नी ह़ात सोरी हती; अने तीहयी तां आवीन तीमना बाह ना गाडरा ने अने बोकड़ा ने पाणी पीयाड़वा करीन टगारा मे पाणी भरवा बाज जी। पण बीजा गुवाळ्या आवीन तीहया सोर्या ने सेटा करवा बाज ज्या आहयु देखीन मुसो उबो हय्न तीहया सोर्या नी मदत कर्यो, अने गाडरा ने अने बोकड़ा ने पाणी पीवाड़्यो। जत्यार तीहया तीमना बाह रुयेल ने तां पासा आया, ता तीहयो तीमने पुछ्यो, “ह़ु कारण से के आज तमु साटा आवती र्या।”
तीहया केदा, “एक मीस्री माणेह आमने गुवाळ्या ना हात सी छोड़ायो, अने तीहयो अमारी जुगु गाडरा ने अने बोकड़ा ने पाणी नीकाळीन पीवाड़्यो।”
ता तीहयो आह़फा ना सोर्या ने केदो, “तीहयु माणेह कां से? तमु हीने काहा मेक आया? तीने बोलाय लावो के तीहयो खाणु खाय।”
अने मुसो तीहया माणेह ह़ाते रेवा तीयार हय ज्यो। तीहयो तीनी ह़ाते आह़फा नी सोरी सीप्पोरा ना वेवा कर देदो। तीनो एक सोरो पयदा हयो, ता मुसो आहयु कीन, “मे बीजा देस मे अंजाण्यो से,” तीनु नाम गेर्सोम पाड़्यो।
ढेरेत दाड़ा हय जवान अळतेण मीस्र नो राजो मर ज्यो। ईस्रायली माणहु काठी सेवा ना कारण सी नाम्बी-नाम्बी ह़ाह़ लीन कंजारता हता, अने आड़वा बाज र्या हता, अने तीमनी अवाज जे काठी सेवा ना कारण सी हयी तीहयी भगवान ने तां तक पुग ज्यी। भगवान तीमनु कंजारणु ने ह़मळीन आह़फा ना वायदा ने, जे तीहयो अब्राहम, ईसाक, अने याकुब ह़ाते करलो हतो, फोम कर्यो।5 अने भगवान ईस्रायली माणहु पोर नींगा नाखीन तीमनी पोर मन लगाड़्यो।
Source notes (5)
- Footnote नेवताळा ना काम 7:20; ईब्रानीयो 11:23
- Footnote मतलब पाणी मे गेथु नीकाळलु
- Footnote ईब्रानीयो 11:24; नेवताळा ना काम 7:23-28
- Cross-reference नेवताळा ना काम 7:29; ईब्रानीयो 11:27
- Footnote उबजण्यो चापड़ो 15:13,14
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.