Paliya Bible
नीरगमन 1
मीस्र मे ईस्रायली माणहु नी काठी हालत
ईस्रायल मतलब याकुब ना सोरा ना नाम, जे आह़फा-आह़फाम ना घोराणा ने लीन बाह नी ह़ाते मीस्र देस मे आवला हता, तीहया आहया से:1 रुबेन, सीमोन, लेवी, यहुदा, ईस्साकार, जबुलुन, बीन्यामीन, दान, नप्ताली, गाद अने आसेर। अने युसुफ ते मीस्र मे पेलेत आवती रेलो हतो। याकुब ना आह़फा ना घोराणा मे जे पयदा हया तीहया सत्तर2 जणा हता। युसुफ अने तीना आखा भाय अने तीहयी पीड़ी ना आखा माणहु मर ज्या। पण ईस्रायल नी अवल्यात फुलवा-फालवा लागी, अने तीहया घण जबर ताखत वाळा बणता ज्या, अने एतरा जादा ढेरका हय ज्या के आखु देस तीमनी सी भराय ज्यु।3
मीस्र देस मे एक नवलो राजो गादी पोर बह्यो जे युसुफ ने नी जाणतो हतो।4 तीहयो आह़फा ना माणहु ने केदो, “देखो, ईस्रायली माणहु अमारी सी गणती मे अने ताखत मे जादा ढेरका हय जेला से। एतरे आवो आपणु तीमनी ह़ाते चलाकी सी वेहवार करया, कदीम आसम नी हय जाय के तीहया जत्यार घणा ढेरका हय जाय अने कदीम झुमायवा नी टेम आय जाय, ता अमारा वेरी ह़ाते मळीन अमारी ह़ाते झुमाय अने आहया देस सी नीकळ जाय।”5 एतरे तीहया तीमनी पोर अदीकार करवा वाळा ने टाळ्या के तीहया तीमनी पोर बोज नाखी-नाखीन तीमने वेला पाड़्या करे; अने तीहया फीरोन जुगु पीतोम अने रामसेस ह़ेर मे ह़मान मेलन्या गोदाम बणाया। पण जेम-जेम तीहया तीमने वेला पाड़ता ज्या, तेम-तेम तीहया बड़ता अने फेलता ज्या; करीन तीहया ईस्रायली माणहु सी घण जबर बीह ज्या अने ह़ीगी करवा बाज ज्या। ते बी मीस्र देस वाळा माणहु ईस्रायली माणहु ने वातड़ा रीन सेवा कराया। अने तीमनी जीवाय ने ईटड़ा बणाव्वा ना गारा अने खेती, ना भाती-भाती ना काम नी काठी सेवा सी जीव्वा काठु कर देदा; जे बी काम मे तीहया तीमने सेवा करावता हता तीनी मे तीहया काठो वेहवार करता हता।
सीप्रा अने पुवा नाम नी बे ईब्रानी ह़ोयाणी ने मीस्र नो राजो हुकम आप्यो, “जत्यार ईब्रानी बयरा पोखड़ाये ता तमु धीयान सी देखजो, कदीम सोरो हय ता मार नाखजो, अने सोरी हय ता जीवत्ली रेवा देजो।” पण तीहयी बेम ह़ोयाणी भगवान नी बीक मान्ती हती, एतरे मीस्र ना राजा ना हुकम ने नी मानीन सोरा ने बी जीवत्ला रेवा देती हती। ता मीस्र नो राजो तीमने बोलावीन पुछ्यो, “तमु सोरा ने जीवत्ला छोड़ देवो, तमु ईसम ह़ुका कर र्या?”
ह़ोयाण्या फीरोन ने जपाप आप्या, “ईब्रानी बयरा मीस्री बयरा ह़रका नी हय; तीहया एतरा उतवाळ्या से के ह़ोयाणी ने पुगवा सी पेतेल तीमना सोरा पयदा हय जाय।” एतरे भगवान ह़ोयाणीम नी ह़ाते भलाय कर्यो, अने तीहया माणहु बड़ीन घणा ताखत वाळा हय ज्या। अने आनीन करते के ह़ोयाणी भगवान नी बीक मान्ती हती, तीहयो तीमना घोरु वह़ाड़्यो।6 ता फीरोन राजो आह़फा ना आखा माणहु ने हुकम आप्यो, “ईब्रानी माणहु ना जेतरा बी सोरा हये तीमने तमु नील नंदी मे नाख देजो, अने आखा सोर्या ने जीवत्ला रेवा देजो।”7
Source notes (7)
- Footnote उबजण्यो चापड़ो 46:8-27
- Footnote सत्तर थोड़ाक जुन्ला चापड़ा मे पीच्योतर जणा लीखलु से,
- Footnote नेवताळा ना काम 7:17
- Footnote नेवताळा ना काम 7:18
- Footnote नेवताळा ना काम 7:19
- Footnote मुल मे, तीमना घोरु बणायो
- Footnote नेवताळा ना काम 7:19
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.