Paliya Bible
नीरगमन 5
मीस्र ना राजा नी अगळ मुसो अने हारुन
ता मुसो अने हारुन जाय्न फीरोन ने केदा, “ईस्रायल नो भगवान यहोवा आसम केय: ‘मारा माणहु ने जवा दे के तीहया जंगल मे मारी जुगु तीवार वाळे।’” फीरोन केदो, “यहोवा कोय से के मे तीनो बोल मानीन ईस्रायली माणहु ने जवा देम? मे यहोवा ने नी जाणतो अने मे ईस्रायली माणहु ने नी जवा देम।” तीहया केदा, “ईब्रानीम नो भगवान आमने भेटलो से; एतरे आमने जंगल मे तीन दाड़ा नी वाटे जवा दे, के अमारा भगवान यहोवा जुगु बादा चड़ावया, आसम नी हय जाय के तीहयो अमारी मे मोट्ली गरा फेलावे नीता तलवार चलाड़े।” मीस्र नो राजो तीमने केदो, “ए मुसा, ए हारुन, तमु ह़ुका माणहु ने काम-धंदो छोड़ाव्वा हींड र्या, तमु जावो तमारु काम करो।” अने फीरोन केदो, “ह़मळो, आहया देस मे तीहया माणहु घणा हय जेला से, तमु ईमने काठी मेहनत सी अराम अपाड़वा हय र्या ह़ु!” फीरोन तीहयात दाड़े तीहया काठी मेहनत कराव्वा वाळा ने जे तीमनी सी उपर हता, अने तीमना डायलाम ने आहयो हुकम आप्यो, “तमु जे हाव ईटड़ा बणाव्वा माणहु ने चारो आप्या करता हता, हाव अगा गेथा कोय नी आपजो; तीहया आह़फात जाय्न तीमनी जुगु चारो एक्ठा करहे। ते बी जेतरा ईटड़ा तीमने पेले बणाव्वा पड़ता हता तेतरा अगा बी बणाय मांगजो, ईटड़ा नी गणती थोड़ीक बी कम नी करजो; काहाके तीहया ओगज्या से, करीन तीहया कारण सी आहयु कीन आड़े, ‘आमु जाय्न अमारा भगवान जुगु बादा चड़ावया।’ तीहया माणहु पांह अळी बी जादा काठी काम करावो के तीहया तीनी मे काठी मेहनत करता रेय अने झुटी वात पोर धीयान नी लगाड़े।”
ता माणहु ने काठी मेहनत कराव्वा वाळा अने डायला बाहर जाय्न केदा, “फीरोन आसम केय, ‘मे तमने चारो नी आपु। तमुत जाय्न जां कंय चारो जड़े तां गेथो ली आवो; पण तमारु काम कंय बी कम नी हये।’” एतरे तीहया आखा माणहु मीस्र देस मे तीतर-बीतर हया के चारा ना बदले खापा एक्ठा करे। काठी मेहनत कराव्वा वाळा आहयु की-कीन तीमने उतवाळ करावता र्या के जेम तमु चारो लीन कर्या करता हता तीहयी रीते तमु हाव बी तमारु दाड़ीक नु काम पुरु करो। अने ईस्रायली माणहु मे गेथा जे डायला ने फीरोन ना काठी मेहनत कराव्वा वाळा तीमनो अदीकार्यो ठेरावला हता, तीमने ठोकीन, तीमने पुछ्या, “ह़ु कारण से के तमु तमारी ठेरावली ईटड़ा नी गणती नी अनसारे पेलेन तेम काले अने आज पुरा नी कराया?”
ता ईस्रायल ना डायला जाय्न फीरोन ने रावण्या करीन आहयु केदा, “तु तारा पावर्या ह़ाते आवो वेहवार ह़ुका करे? तारा पावर्या ने ते चारो आपेत नी अने तीहया आमने कीया करे, ‘ईटड़ा बणावो,’ अने तारा पावर्या मार खाय र्या, पण वाक ते तारात माणहु नो से।” फीरोन केदो, “तमु ओगज्या से, ओगज्या; करीनेत केवो के आमने यहोवा जुगु बादा चड़ाव्वा जवा दे। हाव जाय्न तमारु काम करो; अने चारो तमने नी जड़े, पण ईटड़ा नी गणती पुरी करवा पड़हे।” जत्यार ईस्रायल ना डायला आहयी वात ह़मळ्या के तीमनी ईटड़ा नी गीनती कम नी हये, अने दाड़ीक तेतरुत पुरु काम करवा पड़हे, ता तीहया जाण ज्या के तीमना काठ्ला दाड़ा आय ज्या। जत्यार तीहया फीरोन अगळ गेथा बारा नीकळ आया ता मुसो अने हारुन, जे तीमने भेटवा करीन उबा हय र्या हता, तीमने भेट्या; अने तीहया मुसा ने अने हारुन ने केदा, “यहोवा तमारी पोर नींगा नाखीन नीयाव करे, काहाके तमु आमु ने फीरोन अने तीना चाकर्या नी नींगा मे गलत ठेरावीन आमने मारवा करीन तीमना हात मे तलवार आप देदला से।”
मुसो भगवान ने सीकायत करे
ता मुसो पासो जाय्न यहोवा ने केदो, “ए मालीक, तु आहया माणहु ने वेला ह़ुका पाड़ र्यो? अने तु मने आञे ह़ुका मोकल्यो? जत्यार गेथो मे तारा नाम सी फीरोन ने तां वात करवा करीन ज्यो तत्यार गेथो तीहयो आहया माणहु ह़ाते गलतेत वेहवार करलो से, अने तु तारा माणहु नो कंय बी छुटकारो नी कर्यो।”
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.