Skip to content
BibleKenya

Paliya Bible

नीरगमन 15:2

Verse 2 is marked below, with the whole chapter around it. Read from the start

मुसा नु गीत

ता मुसो अने ईस्‌रायली माणहु यहोवा जुगु आहयु गीत गाया।1 तीहया केदा, “मे यहोवा नु गीत गावही, काहाके तीहयो ताखत वाळो ठेरलो से; घोड़ा भेळ बहण्‌या ने तीहयो दर्‌या मे डुबाड़ नाखलो से। यहोवा मारी ताखत अने रखवाळ्‌यो से, अने तीहयोत मने बचाड़लो से; मारो भगवान तीहयोत से, मे तीनीत बड़ाय करही, मारा आड़ा-बुड़ा नो भगवान तीहयोत से, मे तीनी बड़ाय नु गीत गावही,2 यहोवा झुमायण्‌यो से; अने तीनु नाम यहोवा से। फीरोन ना घोड़ागाड्‌या अने सेना ने तीहयो दर्‌या मे नाख देदो; अने तीना अने वारला सी वारला घोड़ागाड्‌या ने अने अदीकार्‌या ने बी रात्‌ली दर्‌या मे डुबाड़ नाख्‌यो। उन्‌डलु पाणी तीमने ढाक लेदु; तीहया दगड़ान तेम उन्‌डला पाणी ना जागा मे डुब ज्‌या। ए यहोवा, तारो जमणो हात ताखत मे जोरभर्‌यो हयो; ए यहोवा, तारो जमणो हात वेरी ने दळ देय। तु तारा वीरोदी ने आह़फा ना जोर सी पाड़ देय; तु तारी रीह ने भड़कावे, अने तीहया भुसान तेम रोखड़ो बण जाय; तारी नोखरु नी ह़ाह़ सी पाणी एक्‌ठु हय ज्‌यु, पाणी ढेर ने तेम उबु री ज्‌यु; दर्‌या नी वचमे उन्‌डलु पाणी जम ज्‌यु। दुस्‌मन केदलो हतो, ‘मे पसळ आवही, मे जाय्‌न धर लेही, मे लुटीन माल ने वाट लेही, ईनी सी मारो जीव आफरी जहे। मे मारी तलवार हापकतेत मारा हात सी तीमने खत्‌तम कर देही।’ तु तारी ह़ाह़ सी वाहळु वयाड़्‌यो, ता दर्‌या तीमने ढाक लेदी; तीहया घण जबर पाणी मे लुहड़ुन तेम डुब ज्‌या। ए यहोवा, देवताम नी मे तारीन तेवु कोय से? तु ते चोखलापणा ना कारण सी ताखत वाळो, अने तारी बड़ाय करवा वाळाम नी बीक नी लायक, अने वहराड़न्‌या काम करन्‌यो से। तु तारो जमणो हात नाम्‌बो कर्‌यो, अने धरती तीमने गळ जी। तारी दया सी तु तारा माणहु नी अगवाय करलो से, अने आह़फा नी ताखत सी तारा छोड़ावला माणहु ने आह़फा ना चोखला रेवा ना जागा मे ली जाय र्‌यो। देस-देस ना माणहु ह़मळीन काप उठहे; पलीस्‌ती माणहु बीह ज्‌या। एदोम ना पुडारी नुर पाणी उतार लेहे; मोवाब ना मुख्‌या कापवा बाज जहे; अने आखा कनान मे रेवा वाळा नु मन काचु पड़ जहे। तीमनी मे बीक अने घबराट भराय जहे; तारा खांदा नी ताखत सी तीहया दगड़ान तेम बोबड़ा बण जहे। जत्‌यार तक ए यहोवा, तारा माणहु नीकळ नी जाय, जत्‌यार तक तारा माणहु जीमने तु वेचाता लेदलो से पार नी नीकळ जाय। ए यहोवा, तु तारा तीहया बड़ा पोर, तारा तीहया जागा पोर, जीने तु तारो रेवा नो जागो बणावलो से, तीमने पुगाड़ही। ए मालीक तारा चोखला जागा पोर, जीने तारा हातु बणावला से, तु तीमने रोपही। यहोवा जलमको राज करहे।”

मरीयम नु गीत

आहयु गीत गाव्‌वा नो कारण आहयो से, के फीरोन ना घोड़ा, घोड़ागाड्‌या अने घोड़ा पोर बहण्‌या भेळ दर्‌या मे जत र्‌या, अने यहोवा तीमनी पोर दर्‌या नु पाणी पासु ली आयो; पण ईस्‌रायली दर्‌या नी वचमे ह़ुकला जागा पोरेत हय्‌न जत र्‌या। ता हारुन नी बेनेह जीनु नाम मरीयम हतु, अने जे भगवान वगे गेथी वात केवा वाळी हती आह़फी ना हात मे डफ लेदी; अने आखा बयरा बी डफ लीन नाचता-नाचता तीनी पसळ चाल पड़्‌या।3 अने मरीयम तीमनी ह़ाते आहयु गीत गावती जी: “यहोवा नु गीत गावो, काहाके तीहयो सेलभात्‌याण रीती सी जीकलो से; घोड़ा भेळ बहण्‌या ने तीहयो दर्‌या मे नाख देदलो से।”

कड़वलु पाणी

ता मुसो ईस्‌रायली माणहु ने रात्‌ली दर्‌या गेथो अगो ली ज्‌यो, अने तीहया सुर नाम ना जंगल मे आया; अने तीन दाड़ा तक जंगल मे चालता र्‌या, पण तीमने पीवा करीन पाणी नी जड़्‌यु। अळतेण मारा नाम ना एक जागा मे पुग्‌या, तां नु पाणी कड़वलु हतु, तीहयु पाणी ने तीहया पी नी सक्‌या, करीन तीहया जागा नु नाम मारा4 पड़्‌यु। ता तीहया आहयु कीन मुसा ना वीरोद मे कंय-कंय केवा बाज ज्‌या, “आमु ह़ु पीया?” ता मुसो यहोवा ने आड़्‌यो, अने यहोवा तीने एक झाड़ देखाड़ देदो, जत्‌यार तीहयो झाड़ नी डाळ पाणी मे नाख्‌यो, ता तीहयु पाणी गळ्‌ळु हय ज्‌यु। तांत यहोवा तीमनी जुगु एक रीती अने नेम बणायो, अने तांत तीहयो आहयु कीन तीमनी पारख कर्‌यो, “कदीम तु तमारा भगवान यहोवा नो बोल तन-मन सी ह़मळे, अने जे तीनी नींगा मे वारलु से तीहयुत करही, अने तीन हुकम पोर कान्‌टा लगाड़ही, अने तीनी आखी रीती ने मान, ता जेतरा रोग मे मीस्‌री माणहु पोर मोकल्‌लो से तीमनी माय्‌न एक बी तारी पोर नी मोकलु; काहाके मे तारो आरगो करन्‌यो यहोवा से।” ता तीहया एलीम नाम ना जागे आया, जां ह़ारीक पाणी ना बारे झोर अने सत्‌तर खजुरा ना झाड़का हता; अने तां तीहया पाणी नी धेड़े पड़ावो नाख्‌या।

Source notes (4)
  1. Cross-reference परकासीतवाक्‌य 15:3
  2. Cross-reference यसाया 12:2; भजन सहीता 18:14
  3. Cross-reference 1 समुवेल 18:6
  4. Footnote कड़वलु

Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.