Paliya Bible
ईफीसीयो 2
मोत भणी गेथा जीवाय भणी
तीहयो तमने बी जीवाड़्यो, तमु आह़फा पाप अने गुना मे मरला हता, जीनी मे तमु पेले आहयी कळी नी रीती पोर, अने वादळा ना हकदार ना डायला मतलब तीहयी आत्मा नी अनसारे चालता हता, जे हजु बी हुकम नी मानवा वाळा मे काम करे। आमनी मे आपणु बी आखान-आखा पेले आपणा डील नी लालच मे दाड़ा काडता हता, अने डील अने मन नी मरजी पुरी करता हता, अने बीजा माणहुन तेवा वेहवार सीत रीह नी अवल्यात हता।
पण भगवान जे दया नो धनी से, आह़फा ना तीहया मोट्ला मोंग ना कारण सी तीहयो अमारी पोर मोंग कर्यो, जत्यार आमु गुना ना कारण सी मरला हता ता आमने मसी ह़ाते जीवाड़्यो दया सीत तमारो छुटकारो हयलो से।2 अने मसी ईसु मे तीनी ह़ाते बठो कर्यो, अने ह़रग ना जागा मे तीनी ह़ाते बहाड़्यो। के तीहयो आह़फा नी तीहयी दया सी जे मसी ईसु मे अमारी पोर से, आव्वा वाळी टेम मे आपणी दया नु गणाय नी एतरु धन देखाड़ सके। काहाके भरहा ना लारे दया सीत तमु बचला से, काहाके तमारी लारे नी हयु, पण आहयु भगवान नो ईलाम से, अने आहयु तमारा कामु नो फोळ नी हय, के कोय मोटाय करे। काहाके आमु तीना बणावला से, अने मसी ईसु मे तीहया भलाय ना कामु ने लेदे बणावला जीने भगवान पेले गेथो आमु करहु करीन तीयार करलो से।
मसी मे एक
करीन फोम करो के तमु जे डील नी रीती सी आड़जात्या से; अने जे माणहु डील मे हात वेर करला खतना सी खतना वाळा केवाड़े, तीहया तमने खतना वगर ना केय। तमु तीहयी टेमे मसी सी अलग, अने ईस्रायली नी पाल्टी ना वाटा ना जागा सी अलग करला, अने वायदा नी बोली वगर हता, आह वगर हता अने कळी मे भगवान वगर हता। पण हाव मसी ईसु मे तमु जे पेले सेटा हता, मसी ना लोय नी लारे ह़ाते हय जेला से। काहाके तीहयोत अमारो मेळ से, जे बेम ने एक कर लेदो अने अलग करवा वाळु भीतड़ु ने जे वच मे हतु ढबळाय नाख्यो। अने आह़फा ना डील मे वेरी, मतलब तीहया कायदा, जीना हुकम नेम नी रीती पोर हता, मीटाड़ नाख्यो के बेम सी आह़फा मे एक नवलु माणहे ने उबजाड़ीन मेळ कराय देय,3 अने ईसु कुरुस पोर आंबा-सांबा झगड़ा नी खार ने खत्तम करीन आनी लारे बेम ने एक डील बणावीन भगवान ह़ाते भेटाड़्यो।4 तीहयो आवीन तमने जे सेटा हता अने तीमने जे ह़ाते हता, बेमोव ने सांती नी खुस-खबर ह़मळायो अने बेमोव ने सांती जड़ी।5 काहाके तीनीत लारे आपणु बेम जणा ह़ाते एक आत्मा नी लारे बाह अमारीन्तां पुग्यो।
करीन तमु हाव बीजा देस वाळा अने अंजाण्या नी र्या, पण चोखला माणहु नी ह़ाते तीना देस वाळा अने भगवान ना घोराणा ना माणहु बण जेला से। तमु बी नेवताळा अने भगवान वगे गेथा खबर लावण्या नी नीव पोर बणला से, जीना खुणा नो दगड़ो खुद मसी ईसु से। जीनी मे आखु बणावणु मेळीन मालीक नी जुगु चोखलो मंदीर हयवा नी करते बड़ता जाय। जीनी मे तमु बी आत्मा नी लारे भगवान नो रेवा नो जागो बणवा करीन एक्ठा बणावला से।
Source notes (5)
- Cross-reference कुलुस्यो 2:13
- Cross-reference कुलुस्यो 2:13
- Cross-reference कुलुस्यो 2:14
- Cross-reference कुलुस्यो 1:20
- Cross-reference यसाया 57:19
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.