Paliya Bible
ईफीसीयो 1
पोलुस ने तां गेथी जे भगवान नी मरजी सी ईसु मसी नो नेवताळो से, तीहया चोखला अने मसी ईसु मे भरहो करवा वाळा माणहु ना नामे जे ईफीसुस ह़ेर मे से:
अमारा बाह भगवान अने मालीक ईसु मसी नी भणी गेथा तमने संयबरकत अने सांती जड़ती रेय।
मसी मे आत्मा नी बरकत
अमारा मालीक ईसु मसी ना भगवान अने बाह ने घणो वारु से केम के तीहयो आमने मसी मे ह़रग वाळी आखा भाती नी आत्मा नी बरकत आपलो से। जीसम तीहयो आपणु ने कळी ने बणाव्वा नी पेले तीनी मे आपणु ने टाळ लेदलो के आपणु तीनी ह़ाते मोंग मे चोखला अने वण-गुनाळ्ळा रीया। अने आह़फा नी मरजी ना भला मकसत नी अनसारे आमु ने आह़फा जुगु पेले गेथो टाळ्यो के ईसु मसी नी लारे आमु तीना सोरा बणवा करीन टाळलो से। के तीनी तीहयी संयबरकत नी बड़ाय नी बड़ाय हये, जीने तीहयो आमने तीना मोंगाळ्ळा सोरा नी लारे घण-जबर आप्यो। 2आमने तीनी मे तीना लोय नी लारे छुटकारो, मतलब गुना नी माफी, तीनी तीहयी संयबरकत ना धन नी अनसारे जड़ली से,3 जीने तीहयो आखी अक्कल अने ह़मज भेळ अमारी पोर घण-जबर कर्यो। काहाके तीहयो आह़फा नी मरजी नी ह़तायली वात तीहया भली मरजी नी अनसारे आमने देखाड़्यो, जीने तीहयो आह़फा मे ठान लेदलो हतो। भगवान नी योजना नी अनसारे, टेम पुरी हयवा पोर, जे कंय ह़रग मे अने जे कंय धरती पोर ना जागा मे से, आखु कंय तीहयु मसी मे एकठु करे।
मसी मे आमु बी तीनीत के आमु, जे मसी पोर पेले गेथा आह लगाड़ र्या हता, तीना बड़ाय ना बड़ाय नो कारण हये।
अने तीनी मे तमारी पोर बी, जत्यार तमु सच्चाय नो बोल ह़मळ्या जे तमारा छुटकारा नी खुस-खबर से अने जीनी पोर तमु भरहो कर्या, वायदो करली चोखली आत्मा नो सीलटप्पो लाग्यो। आत्मा आहयी वात नी गारन्टी से के आमने तीहयी जड़हे जे भगवान आपणा माणहु सी वायदो करलो से, अने आहयु आमने भरहो करावे के भगवान तीहया माणहु ने पुरो छुटकारो आपहे जे तीना से। के आमु तीना बड़ाय नी बड़ाय करया।
पोलुस नी वीन्ती
आहया कारण सी, मे बी तीहया भरहा नी खुस-खबर ह़मळीन जे तमारी मे मालीक ईसु पोर से4 अने आखा चोखला माणहु पोर मोंग उजन्तो से, तमारी जुगु भगवान ने घणो वारु से केवा नी सोड़तो, अने मारी वीन्ती मे तमने फोम कर्या करु। के अमारो मालीक ईसु मसी नो भगवान जे बड़ाय नो बाह से, तीहयो तमने आह़फा नी ओळखाण नी अने अक्कल नी आत्मा आप सके के तमु तीने अळी वारु रीती सी जाण सको। अने तमारा मन ना डोळा चोखला हये के तमु जाण लेवो के तीनी बोलाव्वा नी आह ह़ु से, अने भगवान ना माणहु मे तीनी पंगात ना बड़ाय नु धन केवु से। अने तीनी ताखत अमारी मे जे भरहो करे, केतरी मोटी से, तीनी सक्ती ना बदलाव ना तीहया काम नी अनसारे से। जे तीहयो मसी मे कर्यो के तीने मरला मे गेथो जीवाड़ीन ह़रग ना जागा मे जमणी ह़ोड़5 बहाड़ र्यो। मसी आखा ह़रग वाळा मुखी, हकदार्या, ताखत, अने डायला पोर राज करे; जे नी नीस्तो आहयी कळी मे पण आव्वा वाळी कळी मे बी तीनु नाम लेहे। 6अने आखु कंय तीना पोगु तळे कर देदो;7 अने तीने आखी चीज पोर डायलो ठेरावीन मंडळी मे आप देदो, आहयी मंडळी तीनु डील से, अने तीनुत आखु कंय से, अने जे आखु मे आखु कंय पुरु करे।8
Source notes (8)
- Cross-reference नेवताळा ना काम 18:19-21; 19:1
- Cross-reference कुलुस्यो 1:14
- Cross-reference कुलुस्यो 1:14
- Footnote नीता तमारो मोंग जे आखा चोखला माणहु ह़ाते से
- Cross-reference भजन सहीता 110:1
- Cross-reference कुलुस्यो 1:18
- Cross-reference भजन सहीता 8:6
- Cross-reference कुलुस्यो 1:18
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.