Paliya Bible
गलातीयो 6
आखा ह़ाते भलाय करो
ए भाय-बेन्या, कदीम कोय माणहे गुना मे धराय जाय, ता तमु जे आत्मा सी भरायला से, भोळाय भेळ एवा ने ह़माळो, अने आह़फाम नी बी देख-भाळ करो, के तमु बी पारख मे नी पड़ो। तमु एक-बीजा नो भार उचलो, अने आहयी रीते मसी ना कायदा ने पुरा करो। कदीम कोय कंय नी हयवा सी बी आह़फा ने कंय ह़मजे, ता आह़फा ने धोको दी र्यो। पण एक-एक जणा आपणा काम ने पारखी लेय, अने ता बीजा ना बारा मे नी पण आह़फात ना बारा मे तीने मोटाय करवा नो मोखो रेहे। काहाके एक-एक माणेह आह़फात नो बोजो झेलहे।
जे बोलु नी ह़ीकापण हात करे, तीहयो आखी वारली चीज मे ह़ीकाड़वा वाळा ने वाटो आपो।
धोको ना खावो, भगवान नी कोय हाही-ठट्टा नी उड़ाय सके, काहाके माणहे जे कंय वेरे, तीहयुत वाडहे। जे कोय आह़फा ना डील जुगु वेरे, तीहयो डील नी लारे मोत नी वाडणी वाडहे; अने जे आत्मा जुगु वेरे, तीहयो आत्मा नी लारे अमरकाय जीवाय नी वाडणी वाडहे। आमने भला काम करवा मे हीम्मत नी सोड़वा जोवे, काहाके आमु ढीला नी हयवा जोवे, ता वारु टेमे पोर वाडणी वडायहे। एतरे जां तक मोखो जड़े अमारी आखा ह़ाते भलाय करो; खास करीन भरहो करन्या भायु ह़ाते।
आखरी चेतावणी अने वारला से के केणु
देखो, मे कीकम मोट्ला-मोट्ला आकड़ा मे तमारी जुगु मारा हात सी लीखलो से। जेतरा माणहु डील नो दीखावो ह़ोदे तीहया खतना कराव्वा जुगु दबाव देय, आनीन करते के तीहया मसी ना कुरुस ना कारण सी वेला नी पाड़े। काहाके खतना कराव्वा वाळा आह़फा ते कायदा पोर नी चाले, पण तमारा खतना आनीन करते करवा हींडे के तमारा डील नी हालत पोर घमंड करे पण आसम नी हये, के मे अळी कानी वात नो घमंड करु, नीस्तो अमारा मालीक ईसु मसी ने कुरुस ना जीना लारे कळी मारी नींगा मे अने मे कळी नी नींगा मे कुरुस पोर चड़ावलो से। काहाके नी खतना, अने नी वण-खतना कंय से, पण नवली कळी खास से। अने जेतरा आहया कायदा पोर चालहे तीमनी पोर, अने भगवान ना ईस्रायल पोर, सांती अने दया हयती रेय।
चीट्ठी ने खत्तम करतो जाय्न मे तमारी सी वीन्ती करु के मने अळी कंय दुख ना आपो, काहाके के मे पेले सीत मारा डील पोर ईसु ना घाव ने वेठ र्यो।
ए भायु अने बेन्या, अमारा मालीक ईसु मसी नी दया तमारी ह़ाते रेय। आमीन।
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.