Paliya Bible
ईफीसीयो 3
आड़जात्या मे पोलुस नी सेवा
आना कारण सी मे पोलुस जे तमु आड़जात्या जुगु मसी ईसु नो धरायलो से कदीम तमु भगवान नी तीहयी संयबरकत नी जुगाड़ नी खुस-खबर ह़मळ्या हय, जे तमारी जुगु मने आपली से, मतलब आहयु के तीहयी ह़तायली वात मारी पोर वीजाळु नी लारे उजन्ती हयी, जीसम मे पेलेत कम करीन लीख नाखलो से, 1जीनी सी तमु भणीन जाण सकत्ला के मे मसी नी तीहयी ह़तायली वात कां तक ह़मजु। वीतली टेम मे माणहु ने आहयी खास वात नी देखाड़लु हतु, पण भगवान आत्मा नी लारे हाव तीना चोखला नेवताळा अने भगवान वगे गेथा खबर लावण्या पोर उजन्तो करलो से। खास वात आहयी से के मसी ईसु मे खुस-खबर नी लारे आड़जात्या माणहु भगवान नी बरकत मे युहदी माणहु ह़ाते अने वायदा ना साजल्या से।2
मे भगवान नी तीहयी संयबरकत ना दान नी अनसारे, जे तीनी ताखत ना बदलाव नी अनसारे मने आपलो से, तीहयी खुस-खबर नो चाकर्यो बण्यो। मारी पोर जे आखा चोखला माणहु मे सी नान्ला मे सी नान्लो से, आहयी संयबरकत हयी के मे आड़जात्या ने मसी नु वीणछेव्यु धन नी खुस-खबर ह़मळावु, अने आखा पोर आहयी वात उजन्ती करु के तीहयी ह़तायली योजना ने कीसम लागु करवा। जे आखा नो बणाव्वा वाळो भगवान से, तीहयो हमेसा नी योजना गेथोत खास वात ने ह़ताड़ीन राखलो से। के हाव मंडळी नी लारे, भगवान नी भात-भाती नी अक्कल ने तीहया मुख्या अने हकदार्या पोर जे ह़रग ना जागा मे से, तीमने देखाड़ सको। हमेसा नी योजना ना अनसारे आसम कर्यो, जे तीहयो आपणा मालीक ईसु मसी मे टाकलो हतो। जीनी मे आमने तीनी पोर भरहो करवा सी हीम्मत अने भरहो भेळ भगवान नी ह़ाते जवा नो हक से। करीन मे रावण्या करु के जे दुख तमारी जुगु मने हय र्या, तीमना कारण सी हीम्मत ना सोड़ो, काहाके तीमनी मे बड़ाय तमारी से।
मसी नो मोंग
मे आहयात कारण सी तीहया बाह अगळ मांडा टेकु, जीनी सी ह़रग अने धरती पोर ना जागा मे, एक-एक3 घोराणा ना नाम पाड़े, मे वीन्ती करु के तीहयो आह़फा ना बड़ाय ना धन ना अनसारे तमने आहयु दान आपे के तमु तीनी आत्मा सी आपणा मोय वाळा माणेह मे ताखत हात करीन जोरभर्या हयता जावो; अने भरहा नी लारे मसी तमारा मन मे वहे। अने मे वीन्ती करु के तमु मोंग मे जेड़ धरीन अने नीव नाखीन, आखा चोखला माणहु ह़ाते आखी भाते ह़मजवा नी सक्ती हात करो के तीनी चवड़ाय, अने लम्बाय, अने उचाय, अने उन्डाय केतरी से। के तमु मसी ना तीहया मोंग ने जाण सको जे अमारी ह़मज सी बाहर से, अने एतरे तमने पुरी रीती सी भगवान ना सोभाव सी भराय्न रेवु जोवे।
हाव जे एवो ताखत वाळो से के अमारी वीन्ती अने ह़मज सी कंय जादा काम कर सके, तीहयी ताखत ना अनसारे जे अमारी मे काम करे, मंडळी मे अने मसी ईसु मे तीनी बड़ाय जलमकी हयती रेय। आमीन।
Source notes (3)
- Cross-reference कुलुस्यो 1:26,27
- Footnote कुलुसीयो 1:26,27
- Footnote नीता आखा
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.