Paliya Bible
वेवस्थावीवरन 16
फसह नो तीवार
(नीरगमन 12:1-20)
“अबीब मयना ने फोम करीन आह़फा ना भगवान यहोवा नी लेदे फसह नो तीवार मनावजो। आहयी तीहया मयना नी एक रात हती जत्यार तीहयो तमने मीस्र देस सी बचाड़ीन लावलो हतो। एतरे जे जागो यहोवा आह़फा ना नाम नो रेवा नो ठेराव्वा नी लेदे टाळ लेय, तांत आपणा भगवान यहोवा नी लेदे गाडरा-बोकड़ा अने गाय-बोळद्या तीवार वाळीन बादा करजे। जत्यार तु आहयु खाणु खाय ता खमीर ना रोट्ला नी खाजे; ह़ात दाड़ा लग वण-खमीर ना रोट्ला जे दुख ना रोट्ला से खाया करजे; काहाके तु मीस्र सी उतवाळ करीन नीकळ्ळो हतो; आहयी रीते तु आह़फा नी आखी जीवाय तीहया दाड़ा ने फोम राखही, ह़ात दाड़ा लग आखा देस मे तारी पांह खमीर नी देखाव पड़े; अने जे जानवर ने तु पेला दाड़ान ह़ांत्ली टेमे बादा करे तीनु माह ह़वारे लग नी मेकजे।
“फसह ना तीवार ना दाड़े तारा ह़ेर नी मोय तारो भगवान जे जानवर तने आपे तीने बादा नी करजे। तु तीवार ना जानवर ने ठीक दाड़ु बुडवा नी टेमे जत्यार तु मीस्र देस गेथो बारो नीकळ्ळो हतो तीहया जागा पोर बादा चड़ावजे, जीने तारो भगवान यहोवा टाळहे। तत्यार तीनु माह तीहया जागा मे रांदीन खाजे जीने यहोवा टाळहे; अळतेण ह़वारे उठीन आह़फा-आह़फाम ना डेरा मे पाछा आवती रेजो। तु छोव दाड़ा लग वण-खमीर ना रोट्ला खाया करजे अने ह़ातवा दाड़े तारा भगवान यहोवा नी लेदे मोट्ली सबा राखजे; ते दाड़े कानी भाती नु काम-काज नी करजे।
हप्ता नो तीवार
(नीरगमन 34:22; लेव्यवेवस्था 23:15-21)
“अळतेण जत्यार तु खेतर मे दातळा वेर उबली मेर वाडवा चालु करे, तत्यार सुरु करीन ह़ात हप्ता गणजे। तत्यार आपणा भगवान यहोवा नी बरकत नी अनसारे तीनी जुगु आपणी मरजी नी बादा चड़ावीन हप्ता-हप्ता नो तीवार मनावजो; तु भगवान नी हजुरी मे आपणा सोरा-सोरी, पावर-पावर्याण भेळ अने तारा ह़ेर ना मोय जे लेवी हय, अने जे-जे बीजा देस वाळा, अने नमल्या, अने रंडायला जे तारी वचे हय, तीहया आखा के आखा आपणा भगवान यहोवा नी सामने खुसी मनावे जीने तारो मालीक भगवान आह़फोत टाळहे अने आह़फा ना नाम ने मोटु करहे। अने फोम राखजे के तु बी मीस्र मे गुलामी मे हतो; एतरे आहया नेम ने चेतीन रीन मानजे।
छापरी नो तीवार
(लेव्यवेवस्था 23:33-43)
“जत्यार तु आपणा खळा अने अंगुर ना रोह ना कुंडा मे सी आखु कंय एक्ठु कर लेदलु हय, तत्यार छापर्या नो तीवार ह़ात दाड़ा लग मनावतो रेजे। अने आपणा आहया तीवार मे आपणा-आपणा सोरा-सोरी, पावर-पावर्याण भेळ अने जे लेवी, अने बीजा देस वाळा, अने नमल्या अने रंडायला जे तारा ह़ेर नी मोय हय तीहया बी खुसी करे। जे जागो तारो भगवान यहोवा टाळ लेय तीनी मे तु आपणा भगवान जुगु ह़ात दाड़ा लग तीवार वाळता रेजो; काहाके तारो भगवान यहोवा तारी आखी मेर मे अने तारा आखा कामु मे बरकत आपहे तीनी मे तु खुसीत मनावजे।
“तारा देस ना आखा माणहु साल मे तीन कावा आपणा भगवान नी ह़ाते तीहया जागा मे हजुर हयहे, जीने तीहयो आह़फो टाळहे: वण-खमीर ना रोट्ला ना तीवार पोर, हप्ता ना तीवार पोर, अने छापर्या ना तीवार पोर। ठारला हाते यहोवा ने मोडु नी देखाड़जे। आखा माणहु आपणी कमाय, अने तीहयी बरकत नी अनसारे जे तारो भगवान यहोवा तने आपलो से, आप्या करो।
नीयाव अने हकदार्या
“हरेक ह़ेर मे नीयाव करवा वाळा ने अने अदीकार्या ने ठेरावे, जीने तारो भगवान तने आपवा बाज र्यो, जे माणहु नो नीयाव खराय सी कर्या करहे। तमु नीयाव नी बगाड़जो; तु नी ते एक बीजा नो भेद-भाव करजे; अने नी ते पय्हा लेजे, काहाके पय्हा अक्कल वाळा ना डोळा आंदळा कर देय, अने खरला माणहु नी वात बदल देय। तु हमेसा कोय नी वगे नी हयजे अने नीयाव वगे रेजे जीनी सी तु जीवत्लो रेय, अने जे देस तारो भगवान यहोवा तने आपे तीनो हकदार्यो बणीन रेय।
“जे वेदी तु आपणा भगवान नी लेदे बणावही, तीनी ह़ाते कानी बी भाती नी लाकड़ा नी बणली असेरा नी मुरती ने उबी नी करजे। तु भक्ती नी लेदे कोय खम्बो नी उबो करजे। तीनी सी तारो भगवान यहोवा ह़ीगी करे।
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.