Paliya Bible
वेवस्थावीवरन 17
“तु आपणा भगवान यहोवा जुगु कोय बोळद्यो नीता गाडरा-बोकड़्या नी बादा नी करजे, जीनी मे कानी रीती सी मांदलु नीता कोय खोट हय; काहाके आसम करवा तारा भगवान यहोवा नी ह़ाते ह़ीगी वाळी से।
“जे ह़ेर तारो भगवान यहोवा तने आपे, कदी तीनी मे कोय अदमी नीता बयर आसवा जड़े, जे तारा भगवान यहोवा नो वायदो तोड़ीन आसम काम कर्या हय, जे तीनी नींगा मे बुरु से, मतलब भगवान ना हुकम ने नी मानीन बीजा देवताम नी, नीता दाहड़ु, नीता चांद, नीता ह़रग ना तारा मे सी कोय नी भक्ती कर्या हय, नीता तीमने वांद्या हय, अने आहयी वात तने देखाड़े अने तारी ह़मळवा मे आवे; तत्यार वारु रीती सी पुसतास करजे, अने कदी आहयी वात ह़ाचली हय अने ईस्रायल मे आसवु गलत काम करलु से, ता जे अदमी नीता बयर आसवु बुरु काम करला हय, तीहया अदमी नीता बयर ने ह़ेर गेथा बारा ली जाय्न दगड़ाटजो के तीहया मर जाय। जे अदमी पोर मोत नो डंड नो गुनो हय, तीने बे नीता तीन माणहु नी गवाय पोर मोत नो डंड आपवा जोवे, एक गवा नी गवाय पोर मोत नो डंड नी आपवा जोवे। तीने मार नाखवा नी लेदे पेले गवा माणहु देय,अने अळतेण बीजा आखा माणहु देय। आसमेत तमु आपणी वचे सी बुराय ने सेटी करजो।
“कदी तारा ह़ेर ना मोय झगड़ा नी वात हय, मतलब आह़फा-आह़फा मे खुन, नीता झगड़ो, नीता देवा झुमायवा नो कोय मुकदमो हये, अने तीनो नीयाव करवा तारी जुगु जादा काठु मालम पड़े, ता तीहया जागा मे जाय्न जे तारो भगवान यहोवा टाळ लेहे; लेवी पुंजाराम नी पांह अने तीहया दाड़ा मे नीयाव करन्यान तां जाय्न पुसतास करजे, के तीहया तने नीयाव नी वात देखाड़े। तु तीहया नीयाव नी अनसारे काम करजे, जे तीहयो तीहया जागा सी जीने तारो मालीक टाळे अने तने देखाड़े, तीहयी अनसारे करजे; अने जे कायदा तीहयो तने आपे तीनीत अनसारे चेतीन रीन चालजे; कायदा नी जे वातु तीहया तने देखाड़े, अने नीयाव नी जे वात तीहयो तने केय, तीनीत अनसारे करजे; जे वात तीहयो तने देखाड़े तीनी सी नी ते जमणी धेड़े नी ते डाखरी धेड़े वळजे। अने जे माणेह मोटाय करीन तीहया पुंजारा नी ,जे तां तारा भगवान यहोवा नी चाकरी करवा करीन हजुर रेय, नी माने, नीता तीहया नीयाव करन्या नी ह़मळे, ता तीहया माणहे ने मार नाखवा जोवे; आहयी रीते तु ईस्रायल मे सी आसवी बुराय ने सेटी कर देजे। आनी सी आखा माणहु ह़मळीन बीह जहे, अने अळी मोटाय नी करे।
राजा ना बारा मे
“जत्यार तु तीहया देस मे पुगे जीने तारो भगवान यहोवा तने आपे, अने तीनो हकदार्यो हये, अने तीनी मे बहीन केवा बाज जाय, के च्यारो-मेर ना आखा देस ना माणहुन तेम में बी अमारी उपर एक राजो ठेरावही; तत्यार जीने तारो भगवान यहोवा टाळ लेय पक्को तीने राजा ठेरावजे। तु आपणा भायुम मे सीत काना ने आपणी उपर राजा ठेरावजे; काना बीजा देस वाळा ने जे तारो भाय नी हय तु तीने आपणी उपर राजा नी ठेराय सकतो। अने तीहयो ढेरेत घोड़ा नी राखे, अने नी आहया मन सी आह़फा ना माणहु ने मीस्र मे मोकले के तीमनी पांह बी ढेरेत घोड़ा हय जाय, काहाके यहोवा तने केदलो से, के तमु तीहयी वाट सी अळी कदी नी जाय। अने तीहयो जादा बयरा बी नी राखे, आसम नी हये के तीनु मन यहोवा भणी गेथु फीर जाय; अने तीहयो मालदार बणवा करीन ह़ोनु नीता चांदी भेळु नी करे। अने जत्यार तीहयो राज्य नी राजगादी पोर बठहे तत्यार आहया कायदा नी कीताप ने, जे लेवी पुंजाराम नी पांह रेय, तीनीन तेवी एक कीताप बणाय लेय। अने तीहयो तीने आपणी पांह राखे, अने आह़फा नी आखी जीवाय मे तीने भण्या करे, जीनी सी तीहयो आपणा भगवान यहोवा नी बीक मानवा, अने आहया कायदा अने आहया नेम नी आखी वातु मानवा मे चोकसी करवा ह़ीके। जीनी सी तीहयो आपणा मन मे मोटाय करीन आपणा भायुम ने हेटा नी जाणे, अने आहया हुकमु सी नी ते जमणी धेड़े वळे अने नी डाखरी धेड़े; जीनी सी तीहयो अने तीनी अवल्यात ना माणहु ईस्रायल ना माणहुम नी वचे ढेरेत दाड़ा लग राज करता रेय।
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.