Paliya Bible
वेवस्थावीवरन 18
लेवी अने पुंजाराम नो वाटो
“लेवी पुंजाराम नो, मतलब आखा लेवी कुळ नो ईस्रायली माणहुम नी ह़ाते जागा नो कोय बी वाटो नी रेवा जोवे; अने तीहया यहोवा ने बली करलु अने बीजी बली नु खाणु खाया करहे। तीमनो आपणा भायुम नी वचे कोय हीस्सो नी रेवा जोवे; काहाके आपणा भगवान ना बोल नी अनसारे यहोवा तीमनो हीस्सो ठेरलो से। अने गाय-बोळद्या नीता गाडरा-बोकड़ा नी बादा चड़ावे, तीमने बादा करवा वाळा माणहुम नी भणी गेथो पुंजाराम नो आहयो हक से के तीहया तीमनो खबो अने बेम जबाड़्या अने पेट पुंजाराम ने आपे। तु तीने आपणी पेली मेर नु अन, नवलो अंगुर नो रोह, अने जेतुन नु तेल, अने गाडरा ना तीहया नीम्बाळा जे पेली कावा वाडला हय। काहाके तारो भगवान यहोवा तारा आखा कुळ मे सी तीनेत टाळ लेदलो से, के तीहयो अने तीनी अवल्यात हमेसा तीना नाम नी सेवा चाकरी करवा करीन हजुर हया करे। “अळतेण कदी कोय लेवी ईस्रायल ना काना बी ह़ेर मे सी, जां तीहयो बीजा देस वाळान तेम रेतो हय, तीहयो आपणी मरजी सी तीहया जागा पोर आय सके जे जागो यहोवा टाळलो से, ता आपणा आखा लेवी भायुम ने तेम जे तां आपणा भगवान यहोवा अगळ हजुर हय्न चाकरी करता हहे, अने तीहया बी तीना नाम सी चाकरी करे। अने आपणा आड़ा-बुड़ा ना हीस्सा ना पय्हा ने छोड़ीन तीमने खाणु ना हीस्सान तेम जड़्या करे।
मुर्ती पुजवा नी रीती सी चेतीन रेवा
“जत्यार तु तीहया देस मे पुगे जे तारो भगवान यहोवा तने आपे, तत्यार तां ना माणहुम ने तेम गलत काम करवा नी ह़ीकवा जोवे। तमारी मे कोय आसम नी हयवा जोवे जे आपणा सोरा-सोरी ने आक्ठा मे होम करीन चड़ाव्वा वाळा, नीता रासी देखाड़वा वाळा, नीता वारु नीता नी वारु मुहरत मानवा वाळा, नीता जादु, नीता जादुगर, जे मोहनी करवा जाणतो हय, नीता बड़वो हय, जे भुतड़ा नी आत्मा ने बोलावतो हय, जे मरला ने जगाड़तो हय। काहाके जेतरा आसम-आसम काम करे तीहया आखा यहोवा नी अगळ गलत से; अने आहया गलत कामु नी कारण तारो भगवान यहोवा तीमने तारी सामने सी नीकाळवा वाळो से। तु आपणा भगवान यहोवा नी ह़ाते वण-गुनाळ्ळो बणीन रेजे।
एक भगवान वगे गेथी वात केवा वाळा ने मोकलवा नो वायदो
“तीहया माणहु जीमनो अदीकारी तु हयवा वाळो से वारु-नीता नी वारु मुहरत मानवा वाळा अने रासी देखवा वाळा नी ह़मळ्या करे; पण तने तारो भगवान यहोवा आसम करवा नी देदो। तारो भगवान यहोवा तारी वचे सी, मतलब तारा भायु मे गेथो मारीन तेम एक भगवान वगे गेथी वात केवा वाळो उबो करहे; तु तीनीत ह़मळजे; आहयु तारी तीहयी वीन्ती नी अनसारे हयहे, जे तु होरेब बड़ान्तां सबा ना दाड़े आपणा भगवान यहोवा सी केदलो हतो, ‘मने नी ते आपणा भगवान यहोवा ना बोल अळी ह़मळावजे, अने नी तीहयु मोट्लु आक्ठु देखवा पड़े, कंखर माय्न आसम नी हये के में मर जाम।’ तत्यार यहोवा मने केदो, ‘तीहया जे कंय केय वारु केय। आनीन करते में तीमनी लेदे तीमना भायुम नी वचमे तमारीन तेम एक अगी हयवा वाळी वात केवा वाळा ने करही; अने आपणा बोल तीना मन मे नाखही; अने जे-जे वात नो मे हुकम आलही तीहयीत तीहयो तीमने कीन ह़मळावहे। अने जे माणेह मारा तीहया बोल जे तीहयो मारा नाम सी केहे, तीने नी माने, ता में तीनो हीसाब तीनी सी लेही। पण जे भगवान वगे गेथी वात केवा वाळो मोटाय करीन मारा नाम सी आसम बोल केय जीनो हुकम में तीने नी आप्यो हय, नीता बीजा देवताम ना नाम सी कंय केय, तीहया भगवान वगे गेथी वात केवा वाळा ने मार नाखवा जोवे।’
“अने कदी तु आह़फा ना मन मे केय, जे बोल यहोवा नी केदो, तीने आमु कानी रीती सी ओळखया?” ता तीनी आहयी ओळखाण से: जत्यार भगवान वगे गेथी वात केवा वाळो मालीक ना नाम सी कंय केय, अने बोल नी अनसारे काम नी हये, मतलब तीनो बोल ह़ाचलीन नी मनाये, तत्यार तीहया बोल ने मालीक नी केदलो हय, पण भगवान वगे गेथी वात केवा वाळो मोटाय सी केदलो हतो। तु तीनी सी नी बीहजे।
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.