Paliya Bible
वेवस्थावीवरन 15
ह़ातवो साल: छुटकारा नो साल
(लेव्यवेवस्था 25:1-7)
“तु हरेक ह़ात साल ना आखरी मे आपणा कर्जा वाळा ने तीमना कर्जा सी छुटकारो आप देजे। आहयु आहयी रीते करजे; हरेक कर्जा वाळो तीहया कर्जा ने छोड़ देहे, जे तीहयो आह़फा धेड़े वाळा ने आपलो से। तीहयो आह़फा धेड़े वाळा नीता भाय सी तीने जबराण नी भरावे, काहाके यहोवा नी भणी गेथी करजो माफी नी वात पक्की हयली से। बीजा देस ना माणहु सी तीमनो करजो तु जबराण भराय सके,पण जे कंय तारा भाय पांह तारु हय तीने तु भराया वगर छोड़ देजे।
“यहोवा भगवान तमने तीहया देस मे बरकत आपहे जे तमने आपवा बाज र्यो। तां तमारो कानो बी माणेह गरीब नी रेय। आहयु तत्यार हयहे जत्यार तु आपणा भगवान यहोवा नी वात जे में आज तने ह़मळावु, तीने तु एक मन हय्न ह़मळे, अने आहया आखा हुकम ने मानवा मे चोकसी करे। तत्यार तारो भगवान यहोवा आह़फा ना बोल नी अनसारे तने बरकत आपहे, अने तु ढेरेत देसु ने उदारे आपही, पण तने उदारे लेवा नी पड़े; अने तु ढेरेत देसु पोर राज करही, पण तीहया तारी उपर राज नी कर सकहे।
“जे देस तारो भगवान यहोवा तने आपे तीहया काना बी ह़ेर ना मोय कदी तारा भायु मे सी कोय तारीन्तां गरीब हय, ता आपणा तीहया गरीब भाय नी जुगु आह़फा नु मन वातड़ु नी करजे, अने नी आह़फा नी मुठ बंद राखजे; जे चीज नी कमी तीने हय, तीने जेतरी जरवत हय तेतरु तीने जरुड़ आह़फा नु धन मे गेथु तीने उदारे आपो। तीने कंय उदार आपवा सी मना ना करो, के ह़ातवो साल जे कर्जा मापी नो साल से ह़ाते से, अने तु आपणा गरीब भायु ने बुराय नी नींगा सी देखवा लागे, अने कंय नी आपे, अने तीहयो तारा वीरोद मे यहोवा ने आड़हे, अने तने गुनाळ्ळो ठेरावहे। तु तीने जरुड़ आपजे, अने तीने आपती टेमे तारा मन ने बुरु नी लागे; काहाके आहयी वात नी कारण तारो भगवान यहोवा तारा आखा कामु मे जीने तु करही तने बरकत आपहे। तारा देस मे गरीब ते सदा जड़हे; एतरे में तने आहयो हुकम आपु, के तु आपणा देस मे आपणा दुखी-गरीब भाय्हु ने वारला मन सी आपणा धन मे सी जरुड़ दान आपजे।
पावर्या सी वेहवार
“कदी तारो कोय भाय, ईब्रानी बयर नीता अदमी, तारी पांह वेचातु आवे ता तीहयो छोव साल लग तारी चाकरी करहे, अने ह़ातवा साल तीने आह़फान्तां सी छुट्टो करीन जवा देजे। जत्यार तु तीने छुट्टो करीन आह़फान्तां सी जवा देय ता तीने ठारलो नी मोकलजे; पण तीने आह़फा ना गाडरा-बोकड़ा मे, अने खळा मे, अने अंगुर ना रोह ना कुंडा मे सी ढेरेत आपजे; तारो भगवान यहोवा तने जीसम बरकत आपलो से तीनीत अनसारे तीने बी आपजे। अने आहयी वात ने फोम राखजे के तु बी मीस्र देस मे गुलामी मे हतो, अने तारो भगवान यहोवा तने छोड़ाय लेदो; आहया कारण मे आज तने आहयो हुकम ह़मळावु। अने कदी तीहयो तारी सी अने तारा घोराणा सी मोंग राखे, अने तारी ह़ाते खुसी सी रेतो हय, अने आहया कारण तने केवा बाज जाय, ‘में तारी पांह सी नी जाम,’ ता तु एक ह़ोय लीन तीना कांटा आपणा घोर ना झापला पोर ली जाय्न कोर देजे, तत्यार तीहयो सदा तारो गुलाम बणीन रेहे। अने तु आसमेत पावर्याण ह़ाते बी करजे। जत्यार तु तीने आह़फान्तां सी छुट्लो करीन जवा देय, तत्यार तीने छोड़ देजे तने काठु नी मालम पड़े; काहाके तीहयो छो साल बे दाड़क्या ना बराबर तारी चाकरी करलो से। अने तारो भगवान यहोवा तारा आखा कामु मे तने बरकत आपहे।
आखा सी पेल्ला जानवरु ने ह़ोपवु
“तारी गायु अने गाडरा-बोकड़ा ना जेतरा पेल्ला बच्चा नर हय तीहया आखाम ने आपणा भगवान यहोवा नी लेदे चोखला राखजो; आपणी गायु ना पेल्ला वाछड़ा सी कंय बी काम नी लेजे, अने नी आपणा गाडरा-बोकड़ा ना पेल्ला बच्चा ना नीम्बाळा कातरजो। तीहया जागा पोर जे तारो भगवान यहोवा टाळ लेय तु यहोवा नी सामने आपणा-आपणा घोराणा भेळ हरेक साल तीमनु माह खाजे। पण कदी तीमनी मे कानी रीते कंय खोट हय, मतलब तीहयु भागड़ु नीता आंदळु हय, नीता तीनी मे कानी बीजी रीती सी बुराय नी खोट हय, ता तीने आपणा भगवान यहोवा नी लेदे बादा नी करजे। तु तीहया जानवर नु माह ने आह़फा ना ह़ेर ना मोय खाजे। जीसम तु ह़ींगड़ा वाळी हयणी अने हयणी नु माह खाय तेमेत चोखलु अने वीटळ्ळु माणेह बेम तीनु माह खाजो। पण तीनु लोय नी खाजो; तीने पाणी नी तेम भोय्मे पोखड़ी देजो।
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.