Paliya Bible
वेवस्थावीवरन 14
वीखो करवा नी रीती
“तमु आपणा भगवान यहोवा ना सोरा से; एतरे तमु मरला माणहु नी लेदे आह़फाम ना डील ने नी चीरजो, अने नी आह़फाम ना नयणा ना नीम्बाळा ने बोड़ावजो। काहाके तु आपणा भगवान यहोवा नी लेदे एक चोखलु समाज से, अने यहोवा तने धरती पोर ना आखा देसु ना माणहु मे सी आह़फा ना खास माणहु ना रुप मे टाळ्ळो से।
चोखलु अने वीटळ्ळु जानवर
(लेव्यवेवस्था 11:1-47)
“आसवु कंय बी नी खाजो जे मालीक वीटळ्ळु ठेरावलो से। जे जानवरु तमु खाय सको तीहया आहया से, मतलब गाय-बोळद्या, गाडरा-बोकड़ा, हयणी, काबर्याण हयणी, बारे ह़ींगड़ा वाळी हयणी, जंगली बोकड़ा, ह़ामोर, नील-गाय, अने जंगली गाडरा। जानवरु मे सी जेतरा जानवर चीरायला खुर्या वाळा अने वगलवा वाळा रेय तीमनु माह तमु खाय सको। पण वगलवा वाळा नीता चीरायला खुर्या वाळा मे सी आहया जानवरु ने, मतलब उटड़ा, ह़ेहल्या, अने मोरचीता ने नी खाजे, काहाके आहया वगले पण चीरायला खुर्या ना नी रेय, आहया कारण तीहया तमारी जुगु वीटळ्ळा से। अळी ह़ुवर्यु, जे चीरायला खुर्या नु ते रेय पण वगले नी, आहया कारण तीहयु तमारी जुगु वीटळ्ळु से। तमु नी ते आनु माह खाजो, अने नी आना मरला डील ने सीमजो।
“तमु पाणी मे जेतरा बी भाती ना जीव माछला से खाय सको मतलब पाखड़ा वाळा अने खीलपड़ा वाळा। पण जेतरा नी पाखड़ा वाळा अने नी खीलपड़ा वाळा जन्तु हय तीमने तमु नी खाजो; काहाके तीहया तमारी जुगु वीटळ्ळा से।
“आखा चोखला चड़ा नु माह ते तमु खाय सको। पण आहया चड़ाम नु माह नी खाजो, मतलब मोट्ली घुवड़ नु, घुवड़ नु, मोर-घुवड़ नु, गरुड़ नाम नी घुवड़, रात्ली घुवड़ अने भाती-भाती घुवड़, अने भाती-भाती ना आखा ढांड्या; सुतरमुर्ग, तहमास नाम ना चड़ा, बोतकुकड़ा, अने भाती-भाती ना घुवड़्या; नान्ला अने मोट्ला बेम जाती ना ढुड्डाकणा, अने धोळ्ळो ढुड्डाकणो; काकणघारा, घुवड़, पानकुकड़ी; सारस नाम ना बगल्या, भाती-भाती ना बगल्या, हुद-हुद चड़ा1 अने वागळा।
“अने जेतरा पेट ना भरहे चालवा वाळा जीव से तीहया आखा तमारी जुगु वीटळ्ळा से; तीहया नी खाजो। पण आखा चोखला पाखड़ा वाळा चड़ा नु माह तमु खाय सकत्ला।
“जे आह़फात मर जाय तीमने नी खाजो; तीने आपणा ह़ेर नी मोय रेवा वाळा काना बीजा देस वाळा ने खावा करीन आप सको, नीता काना बीजा ना हात मे वेची सको; पण तु ते आपणा भगवान यहोवा नु चोखलु समाज से। तु बोकड़ी ना बच्चा ने तीनी आय्ह ना दुद मे नी रांदजे।
दहवा वाटा नो नेम
“तु हर साल खेतर मे बीज सी हयवा वाळी मेर नो दहवो वाटो अलग नीकाळीन मेकजे। अने जीना जागा ने तारो भगवान यहोवा आह़फा ना नाम नो रेवा नो जागो ठेराव्वा करीन टाळ लेय तीनी मे आह़फु अन, अने नवलो अंगुर नो रोह, अने जेतुन नु तेल नो दहवो वाटो, अने आपणा गाय-बोळद्या अने गाडरा-बोकड़ा ना पेल्ला बच्चा ने आपणा भगवान यहोवा नी सामने खाया करजे; जीनी सी तमु तीनी बीक हमेसा मानवा ह़ीकहु। पण कदी तीहयो जागो जीने तारो भगवान यहोवा आह़फा नु नाम बणावीन राखवा नी लेदे टाळ लेय तीहयु नाम्बे हय, अने आहया कारण तां नी यात्रा तारी जुगु एतरी नाम्बी हय के तु आह़फा ना भगवान यहोवा नी बरकत सी जड़ली चीजु ने नी ली जाय सके, ता तीने वेचीन, रुप्या ने बांदीन, हात मे लीन तीहया जागा पोर जजे जे तारो भगवान यहोवा टाळ लेय, अने तां गाय-बोळद्या, नीता गाडरा-बोकड़्या, नीता अंगुर नो रोह, नीता ह़रु, नीता कानी भाती नी चीज काहा नी हय, जे तारु जीव करे, तीने तीहया रुप्या सी वेचातु लीन आपणा घोराणा भेळ आपणा भगवान यहोवा ह़ामने खाय्न खुसी करजे।
“आपणा ह़ेरु मे रेवा वाळा लेवीम ने नी छोड़जे; काहाके तारी ह़ाते तीमनो कानो बी वाटो नीता हीस्सो नी हय। हरेक तीसरा साल ना आखरी मे आपणी आखी मेर नो दहवो वाटो लावे अने तीने आह़फा ना ह़ेर मे एक्ठु करे। आहयु खाणु लेवीम नी जुगु से, काहाके तीमनी पांह खुद नु धन नी हय, अने बीजा देस वाळा, नमल्या वाळा, अने रंडायला तारा ह़ेर मे हय, तीहया बी आवीन पेट भरीन खाय; जीनी सी तारो भगवान यहोवा तारा आखा कामु मे तने बरकत आपे।
Source notes (1)
- Footnote हुद-हुद चड़ा झाड़का कोरन्यु चड़ु
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.