Paliya Bible
वेवस्थावीवरन 13
“कदी तारी वचे कोय भगवान वगे गेथी वात केवा वाळो नीता ह़पनु देखवा वाळो उजन्तो हय्न तने कोय सेलाणी नीता चमत्कार देखाड़े, अने जे सेलाणी नीता चमत्कार ने पक्कु ठेरावीन तीहयो तार सी केय, आवो आपणु बीजा देवताम नी पसळ चालन्या बणीन, जीने तमु हजु लग नी जाण्या, तीनी पुजा करे, तत्यार तमु तीहया भगवान वगे गेथी वात केवा वाळा नीता ह़पना ने देखवा वाळा माणहे नी वात नी मान्जो; काहाके तमारो भगवान यहोवा तमारी पारख करहे, जीनी सी आहयु जाण ले, के मार सी पुरा मन अने पुरा जीव नी ह़ाते मोंग राखे के नी? तमु आपणा भगवान यहोवा नी पछळ चालजो, अने तीनी बीक मानजो, अने तीना हुकम पोर चालजो, अने तीना बोल मानजे, अने तीनी चाकरी करजो, अने तीनी सी रीस्तो बणावीन राखजो। अने आसवो भगवान वगे गेथी वात केवा वाळो नीता ह़पना ने देखवा वाळो जे तमने तमारा तीहया भगवान यहोवा सी अलग करे, जे तमने मीस्र देस सी नीकाळ्यो अने गुलामी मे गेथो छोड़ावलो से, तारा तीहया भगवान यहोवा नी वाट सी भटकाड़वा नी वात केवा वाळो ठेरहे, आहया कारण तीने मार नाखवा जोवे। आहयी रीती सी तु आपणी वचमे सी आसवी बुराय ने सेटी कर देजे।
“कदी तारो सग्गो भाय, नीता सोरो, नीता सोरी, नीता तारी लाडी, नीता तारा जीव सी मोंगाळ्ळो तारो दोस्तीदार तने होगोत आहयु कीन भटकाड़े के आवो आपणु बीजा देवताम नी भक्ती नीता पुजा करया, जीने नी ते तु अने नी तारा आड़ा-बुड़ा जाणता हता, चाहे तीहया तमारी ह़ाते रेवा वाळा आड़े-धेड़े ना माणहु ना देवता हय, नीता धरती नी एक धेड़े सी बीजी धेड़े लग नाम्बे-नाम्बे रेवा वाळा ना देवता हय। ता तु तीमनी नी मानजे अने तीमनी वात नी ह़मळजे, अने तीमनी पोर दया नी करजे अने नी दया देखाड़जे, अने नी तीमना गुना ने ह़ताड़जे। तीने पक्को मारजे; तीने मारवा मे पेलो दगड़ो तु देजे, बाद मे बीजा माणहु देहे। तीनी पोर आसम दगड़ा देजो के तीहयो मर जाय, काहाके तीहयो तमने तारा तीहया भगवान यहोवा सी जे तने गुलामी ना घोर मतलब मीस्र देस सी नीकाळ लावलो से, भटकाड़वा नी कोसीत करलो से। अने आखा ईस्रायली माणहु आना बारा मे ह़मळीन बीह जहे, अने आसवु बुरु काम अळी तारी वचे नी करे।
“कदी तारा काना ह़ेर ना बारा मे ,जीने तारो भगवान यहोवा तने रेवा करीन आपे, आसवी वात तने ह़मळवा मे आवे के केतरा रीकामा माणहु तारी वचमे सी नीकळीन आपणा ह़ेर मे रेवा वाळा माणहु ने आहयु कीन भटकाड़ देदला से, के आवो आपणु बीजा देवताम नी जीनी सी तमु हाव लग अंजाणा र्या पुजा करया। ता पुसतास करजे, अने ह़ोदजे, अने वारु रीते पतो लगाड़जे; अने कदी आहयी वात ह़ाचलीन हय, अने कंय बी सण्का नी रेवा जोवे के तारी वचे आसवु भुंडु काम कर्या, ता पक्को तीहया ह़ेर ना माणहु ने तलवार सी मार नाखजे। अने जानवरु ने तीहया आखा भेळ तलवार सी खत्तम कर देजे। तु तीनी आखी लुट तीना चोवराया ना वचे एक्ठी करीन तीहया ह़ेर ने लुट भेळ आपणा भगवान यहोवा नी लेदे पुरी होम नी बादा ना रुप मे करीन धपाड़जे; तीहयु सदा नी लेदे उजाड़ हय जहे; तीहयु बाद मे नी वहे। अने कानी खत्तम करली चीज तारा हात नी लागवा जोवे; जीनी सी यहोवा आह़फा नी भड़कली रीह सी होगो हय्न जीसम तीहयो तारा आड़ा-बुड़ा सी ह़ाम खादलो हतो तेमेत तार सी दया करे, अने दया करीन तने गीणती मे वदाड़हे, आहयु तत्यार हयहे जत्यार तु आपणा भगवान यहोवा ना जेतरा हुकम मे आज तने ह़मळावु तीहया आखाम ने मानही अने जे तारा भगवान यहोवा नी नींगा मे वारु से तीहयुत करहे।
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.