Paliya Bible
वेवस्थावीवरन 12
एकीत भक्ती नो जागो
जे देस तमारा आड़ा-बुड़ा नो भगवान यहोवा तमने हक मे लेवा करीन आपलो से, तीहयी जागा मे जत्यार लग जीवत्लो रेय तत्यार लग आहया रीत्या अने नेम ने चेतीन रीन मानजे। जे देसु ना माणहु ना तमु हकदार्या हयहु तीमना माणहु मोटा-मोटा बड़ा नीता टेकड़ा पोर हय, नीता काना भाती ना झाड़ तळे, जेतरी जागा मे तीमना देवताम नी पुजा करता हय, तीहया आखाम ने पुरी रीते खत्तम कर देजे; तीमनी वेदी ने तोड़ नाखजो, तीमना दगड़ा ना खम्बा ने बी पाड़ नाखजो, तीमनी असेरा नाम नी मुरत्या ने आक्ठा मे धपाड़ देजो, अने तीमना देवताम नी मुरत्या ने तोड़ीन पाड़ देजो, के तीहया देस मे सी तीमनु नाम तक नी रेय।
जीसम आहया माणहु आपणा-आपणा देवताम नी लेदे करे, तीसम तमु आपणा भगवान नी लेदे नी करजो। पण जे जागो तमारो भगवान यहोवा तमारा आखा घोराणा मे सी टाळ लेहे, के तां आह़फा नु नाम बणावीन राखे, तीना तीहया रेवा ना जागा मे जीया करजो; अने तांत तमु आपणी होम नी बादा, अने मेल-मीलाप नी बादा, अने दसवो वाटो, अने लेदली भेट, अने बादा नी चीजु, अने आपणी मरजी नी भेट, अने गाय-बोळद्या अने गाडरा-बोकड़ा ना पेल्ला बच्चा लीन जीया करजे; अने तांत तमु आपणा भगवान यहोवा नी सामने खाणु खाया करजो, अने आपणा-आपणा घोराणा ह़ाते आखा कामु पोर ,जीमने तमु करला हय, अने जीनी पोर तमारा भगवान यहोवा नी बरकत जड़ली हय, खुसी मनावजे।
जीसम आज आमु काम कर र्या, तीसम तमु नी करजो, आखा माणहु तीहयुत काम कर र्या, जे तीमनी नींगा मे वारु से, काहाके तमु हजु लग तीहया जागा मे नी पुग्या जे तमारो भगवान यहोवा तमने आपवा बाज र्यो, जीनी मे तमु सांती सी री सको। पण जत्यार तमु यरदन नंदी पार जीन तीहया देस मे जीनो हक तमुने तमारो भगवान यहोवा तमने आपे वह जावो, अने तीहयो तमने च्यारो मेर ना आखा दुस्मन सी बचाड़हे, अने तमु सांती सी रेहु। अने तमु बेफीकर्या रेवो, तत्यार जे जागा तमारो भगवान यहोवा आह़फा ना नाम नी रेवा नी जागा ठेराव्वा करीन टाळ लेहे तीनी मे तमु आपणी होम नी बादा, अने मेल मीलाप नी बादा, अने दहवो वाटो, अने माणहु नी आपली भेट; अने बादा नी वारु-वारु चीजु जे यहोवा नी जुगु ठाण लेवो, मतलब जेतरी चीजु नो हुकम में तमने ह़मळावलो से तीहयी आखी चीजु ने लीन जीया करजो। अने तां तमु आपणा सोरा-सोरी अने पावर पावर्याण ह़ाते आपणा भगवान यहोवा नी सामने खुसी करजो अने जे लेवी तमारा गाम मे रेय तीहया बी खुसी करे, काहाके तीमनो तमारी ह़ाते कंय बी वाटो नी रेय। तु चेतीन रेजे। आसम नी हये के जे-जे जागो तु देखे तांत होम नी बादा चड़ाय देय; पण जे जागो तारा काना घोराणा मे यहोवा टाळ लेय तीहयुत आक्ठा नी बादा ने चड़ाया करजे, अने जे-जे काम नो हुकम में तने ह़मळावु तेत काम करजे।
पण तु आह़फा ना काना बी ह़ेर मे जानवर मारी आपणी मरजी अने मालीक भगवान नी लारे आपली बरकत नी अनसारे माह खाय सकत्लो। चोखलु अने वीटळ्ळु माणेह तीने खाय सके, जीसम नील-गाय अने हयणी नु माह। पण तीनु लोय नी खाजे; तीने पाणीन तेम भोय्मे नाख देजे। तु आह़फा ना ह़ेर नी मोय आपणा अन, अंगुर ना रोह, नीता जेतुन ना तेल ना दहवा वाटा ने, नीता गाय-बोळद्या, गाडरा-बोकड़्या ना पेल्ना बच्चा ने, नीता बादा ने जीने तु मान्ता माने, नीता मरजी नी बादा ने, नीता भेट ने जीने तु चड़ावे, नी खाजे। पण तु, तारा सोरा-सोरी, पावर्या-पावर्याण अने तारा ह़ेर मे रेवा वाळा लेवी भेळ तीमने तारा मालीक भगवान नी अगळ तीहया जागा मे खाजे, जीने तारो मालीक भगवान आह़फो टाळहे। अने तु आपणा भगवान यहोवा नी सामने आपणा आखा कामु पोर बरकत आपे खुसी करजे। अने चेतीन रेजे के जत्यार लग तु धरती पोर जीवत्लो रेय तत्यार लग लेवीयो ने नी भुलजे।
जत्यार तारो भगवान आह़फा ना बोल नी अनसारे तारी काकड़ ने वदाड़हे, अने तु केय, “में माह खाही,” काहाके तु माह नी हेर करे, ता तु जेतरु चाहे, तेतरु माह खाय सके। जे जागो तारो भगवान यहोवा आह़फा नु नाम बणावीन राखवा नी लेदे टाळ लेय तीहयु कदी तार सी ढेरेत नाम्बे हय, ता जे गाय-बोळद्या, गाडरा-बोकड़ा यहोवा तने आपलो हय, तीमनी मे जे कंय तारु मन करे तीने मारा हुकम नी अनसारे मारीन आह़फा ना घोर नी मोय खाय सकही। जीसम हयणी अने हयणी नु माह खात्ला तेमेत तीमने बी खाय सकीया, चोखलु अने वीटळ्ळु बेम भाती ना माणहु तीमनु माह खाय सकहे। पण तीमनु लोय कानी भाती नी खाजे; काहाके लोय जे से तीहयो जीव से, अने तु माह नी ह़ाते जीव कदी बी नी खाजे। तीने नी खाजे; तीने पाणीन तेम भुय्मे नाख देजे। तु तीने नी खाजे; आनीन करीन के तीहयु काम करवा सी जे यहोवा नी नींगा मे वारु से अने तारीन अळतेण तारी पसळ तारी अवल्यात नु बी भलु हये। पण जत्यार तु कानी चीज चोखली करे, नीता मान्ता माने, ता आसवी चीज लीन तीहया जागा मे जजे जीने यहोवा टाळ लेय। अने तां आपणी होम नी बादा, माह अने लोय बेम ने आपणा भगवान यहोवा नी वेदी पोर चड़ावजे, अने मेल बादा नो लोय तीनी वेदी पोर नाखीन तीनु माह खाजे। तु चेतीन रीन आहयी वातु ने ह़मळ, जीमनो हुकम में तने आप र्यो, जीनी सी तु आपणा मालीक भगवान नी नींगा मे भलु अने वारलु काम कर सके, अने तारु अने तारी बाद तारी अवल्यात नु सदा भलु हये।
मुरती-पुजा ना वीरोद मे चेतावणी
जत्यार तारो भगवान यहोवा तीहया देसु ना माणहु ने खत्तम कर देहे, जीना हकदार्या हयवा करीन तमु जवा बाज र्या अने तमु हकदार्या बणीन तीहया देसु मे वह जहु। तत्यार चेतीन रेजो, कंखर माय्न आसम नी हये के भगवान तीहया देसु ने खत्तम करवा नी बाद तु बी तीमनीन तेम फस जाय, मतलब आसम कीन तीमना देवताम ना बारा मे आहयु पुसतास नी करजे, के तीहया देसु ना माणहु आह़फाम ना देवता नी भक्ती कानी रीती सी करता हता? में बी तीसमेत करही। तु आपणा भगवान यहोवा नी भक्ती तीमनीन तेम नी करजे, जीसम तीहया आपणा देवताम नी पुजा करो, काहाके तीहया आह़फी पुजा मे आखी भातीन गलत चीज करो जीनी सी यहोवा बुराय करे। आञे लग के तीहया आह़फा ना सोरा-सोरी ने आह़फा ना देवताम नी लेदे आक्ठा मे नाखीन धपाड़ देय।
जेतरी वात नो में हुकम आपु तीमने चेतीन रीन मान्या करजो; अने नी ते कंय तीनी मे बड़ावजो अने नी तीनी मे कंय कम करजो।
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.