Paliya Bible
दानीयल 12
आखरी टेम
“तीहयी टेमे मुख्यो ह़रगदुत मीकाएल, जे तारा माणहु नी रखवाळी करवा उबो रेय, तीहयो उठहे, तत्यार एवी वेला नी टेम आवहे, जेवी काना देस ने बणवा गेथी हजु लग नी आयी, अने नी हये; पण तीहयी टेमे तारा माणहु मे जेतरा नु नाम भगवान नी कीताप मे लीखलु हहे, तीहया बच नीकळहे।1 जे धरती मे हेटा मड़ाट्या मे ह़ुय र्या तीमनी मे गेथा ढेरेत माणहु जाग उठहे कंय ते हमेसा नी जीवाय नी लेदे, अने कंय ने बदनामी अने हमेसा नी ह़ीगी नी लेदे ठेरहे।2 तत्यार जे ह़मजदार रेहे तीहया चमकवा वाळी तारामंडळीन तेम अने जे ढेरेत ने धरमी बणावे, तीहया हमेसा तारान तेम भबळहे।”
“पण ए दानीयल, तु आहयी कीताप पोर सीलठप्पो लगाड़ीन आहया बोलु ने आखरी टेम नी लेदे बचाड़ीन राख। ढेरेत माणहु पुसतास अने ह़ोद करहे, अने आह़फाम नी अक्कल वदाड़हे।”3
आहयु आखु ह़मळीन, में दानीयल जत्यार देख्यो, तां मने बे अदमी देखाव पड़्या, एक नंदी नी आहयी धेड़, अने एक नंदी नी ह़ेली धेड़े। तत्यार जे अदमी सुती ना लुगड़ु पेरीन नंदी ना पाणी नी उपर हतो, तीने तीहया अदमी मे गेथो एक जणो पुछ्यो, “आहया वहराड़न्या कामु कारु पुरा हयहे?”
तत्यार जे अदमी सुती ना लुगड़ा पेरीन नंदी ना पाणी नी उपर हतु, तीहयो मारी ह़मळते जमण्यो अने डाखर्यो हात ह़रग भणी उचो करीन, हमेसा जीवत्ला रेवा वाळा भगवान नी ह़ाम खाय्न केदो, “आहयी हालत साड़ी तीन साल लग रेहे। अने जत्यार चोखला माणहु नी ताखत टुटते-टुटते खत्तम हय जहे, तत्यार आहयी आखी वात पुरी हयहे।”
आहयी वात में ह़मळतो ते हतो पण कंय बी नी ह़मज्यो, ता मे केदो, “ए मारा मालीक, आहयी वात नी आखरी हालत ह़ु हयहे?”
तीहयो केदो, “ए दानीयल जत रे; काहाके आहयी वात आखरी टेम नी लेदे सीलठप्पो लगाड़ीन बंद करली से। ढेरेत माणहु ते आह़फा-आह़फाम ने वारु अने चोखा करहे, अने वारु हय जहे; पण गलत माणहु गलतेत करता रेहे; अने गलत माणहु मे कोय आहयी वात नी ह़मजे; पण जे अक्कल वाळा से तीहयात ह़मजहे।4
“जे दाड़े चोखला मंदीर मे दाड़ीक नी होम बादा चड़ाव्वा बंद हय जहे, अने ह़ीगी आवे एवी चीज ने तीहया जागा पोर वहाड़हे, जे खत्तम हयवा नो कारण रेहे, तांह तक बारे ह़ोव नब्बे दाड़ा वीत जहे।5 जुगाळो से तीहयो माणेह, जे धीरज धरीन एक हजार तीन ह़ोव पंयतीस दाड़ा पुरा करहे।
“दानीयल हाव तु जा। अने आह़फा नी जीवाय नी आखरी टेम लग तारी वाट्ये चालतो रे अने तने अराम जड़हे। अने आखरी मे तने तारो हीस्सो जड़हे।”
Source notes (5)
- Cross-reference मत्ती 24:21; मरकुस 13:19; परकासीतवाक्य 7:14; 12:7
- Cross-reference यसाया 26:19; मत्ती 25:46; युहन्ना 5:29
- Cross-reference परकासीतवाक्य 22:10
- Cross-reference परकासीतवाक्य 22:11
- Cross-reference दानीयल 9:27; 11:31; मत्ती 24:15; मरकुस 13:14
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.