Paliya Bible
आमोस 1
तकोवा मे रेवा वाळो आमोस जे गाडरा-बोकड़ा ना गुवाळ्या मे गेथो हतो, तीना आहया बोल से जे तीहयो यहुदा ना राजा उजीयाह ना, अने योवास ना सोरा ईस्रायल ना राजा यारोबाम ना दाड़ा मे, भुकम्प सी बे साल पेले, ईस्रायल ना बारा मे दरसन देखीन केदो: “यहोवा सीय्योन बड़े गेथो गाजहे, अने यरुसलेम गेथो आह़फा ना सब्द ह़मळावहे; ता चारवा वाळान चारवा नो जागो दुखी हयहे, अने कार्मेल बड़ा नी चोट्ली ह़ुक जहे।”
ईस्रायल ना ह़ाते वाळा राज्य नो नीयाव
यहोवा आसम केय: “दमीस्क ना तीन ह़ु, पण च्यार गुना ना कारण में तीनो डंड नी छोड़ु; काहाके तीहया गीलाद ह़ेर ने महळवा वाळा अवज्यार सी रंदळला से। करीन में हजाएल ना राजा ना कीला मे आक्ठु धपाड़ही, अने तीनी सी बेन्हदद ना राजा ना कीला बी धप जहे। में दमीस्क ना डांडा ने तोड़ देही, अने आवेन नाम नी घाटी मे रेवा वाळा ने अने बेतएदेन ना घोर मे रेवा वाळा अदीकारीम ने खत्तम करही; अने अराम ना माणहु धराय्न कीर मे जहे यहोवा नो आहयोत बोल से।”
पलीस्तीया
यहोवा आसम केय: “गाजा ना वळ-वळीन करला गुना ना कारण सी तीन ह़ु, पण च्यार गुना ना कारण सी में तीनो डंड नी छोड़ु; काहाके तीहया माणहु ने धरीन ली ज्या के तीमने एदोम राज्य ना हक मे कर देय। करीन मे गाजा ना कीला नु भीतड़ु मे आक्ठु धपाड़ही अने तीनी सी तीना कीला धप जहे। में असदोद ना रेवा वाळा ने अने अस्कलोन ना अदीकारीम ने बी खत्तम करही; में मारो हात एक्रोन ना वीरोद मे उचो करही, अने बचला पलीस्ती माणहु खत्तम हय जहे,” भगवान यहोवा नो आहयोत बोल से।
सोर
यहोवा आसम केय: “सोर ना तीन ह़ु पण च्यार गुना ना कारण सी में तीनो डंड नी छोड़ु; काहाके तीहया आखा माणहु ने धरीन एदोम ना हक मे कर देदा अने भाय ह़ाते करला वायदा ने फोम नी कर्या। करीन में सोर ह़ेर नु भीतड़ु पोर आक्ठु धपाड़ही, अने तीनी सी तीना कीला बी धप जहे।”
एदोम
यहोवा आसम केय: “एदोम ना तीन ह़ु, पण च्यार गुना ना कारण सी में तीनो डंड नी छोड़ु, काहाके तीहयु आह़फा ना भाय ने तलवार लीन दवड़ावलु अने कंय बी दया नी कर्यु, पण रीह मे तीमने लगातार फाड़तु र्यु, अने आह़फा नी रीह ने जलम नी लेदे बणाय र्यु। करीन में तेमान मे आक्ठु धपाड़ही, अने तीनी वेर बोस्रा ह़ेर ना कीला धप जहे।”
अम्मोन
यहोवा आसम केय: “अम्मोन ना वळ-वळीन करला गुना ना कारण सी तीन ह़ु, पण च्यार गुना ना कारण सी में तीनो डंड नी छोड़ु काहाके तीहया आह़फाम नी काकड़ वदाड़वा नी करते गीलाद ना ईलाका ना भारेपोगे बयरा ना पेट चीर देदा। करीन में रब्बा ना भीतड़ा मे आक्ठु धपाड़ही, अने तीनी सी तीना कीला बी धप जहे। तीहयी लड़ाय ना दाड़ा मे कुर्राटा हयहे, तीहयो आंजी मतलब भुत्या नो दाड़ो रेहे; अने तीमनो राजो तीना अदीकार्या भेळ गुलामी मे जहे,” यहोवा नो आहयोत बोल से।
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.