Paliya Bible
आमोस 2
मोवाब
यहोवा आसम केय: “मोवाब राज्य ना वळ-वळीन करला गुना ना कारण सी तीन ह़ु, पण च्यार गुना ना कारण सी, में तीनो डंड नी छोड़ु; काहाके तीहयु एदोम ना राजा ना हाड़का ने धपाड़ीन रोखड़ो बणाय देदु। करीन में मोवाब राज्य मे आक्ठु धपाड़ही, अने तीनी सी करीयोत ह़ेर ना कीला धप जहे; अने मोवाब राज्य मे हुल्लड़ अने कचाट, अने फेपार्या नी अवाज हयते-हयते मर जहे। में तीनी वचे मे गेथा नीयाव करन्या ने खत्तम करही, अने तीनी ह़ाते-ह़ाते तीना आखा अदीकार्या ने मारही,” यहोवा नो आहयोत बोल से।
यहुदा
यहोवा आसम केय: “यहुदा ना वळ-वळीन करवा गुना ना कारण सी तीन ह़ु, पण च्यार गुना ना कारण, में तीनो डंड नी छोड़ु; काहाके तीहया यहोवा ना नेम ने नी मान्या; अने मारी रीती ने नी मान्या; अने आह़फाम ना झुटा देवताम ना कारण सी जीमनी पसळ तीना आड़ा-बुड़ा चालता हता, तीहया बी भटक जेला से। करीन में यहुदा मे आक्ठु धपाड़ही, अने तीनी सी यरुसलेम ना कीला धप जहे।”
ईस्रायल नो नीयाव
यहोवा आसम केय: “ईस्रायल ना वळ-वळीन करला गुना ना कारण सी तीन ह़ु, पण च्यार गुना ना कारण, में तीनो डंड नी छोड़ु; काहाके तीहया वण-गुनाळ्ळा ने पय्हा जुगु अने कमजोर ने एक जोड़ी खाहड़ा जुगु वेच देदला से। तीहया गरीबु ना मुंडा पोर ना कादा नी बी लालच करे, अने ह़ुदला माणहु ने वाट्ये गेथा भटकाड़ देय; अने बाह-बेटा बेम एकीत कुवारीन्तां जाय, जीनी सी मारु चोखलु नाम ने वीटळ्ळु ठेराया। तीहया आखी वेदीन्तां गीरवे राखला लुगड़ा पोर ह़ुवे, अने डंड ना पय्हा वेर वेचातु लेदलु ह़रु तीमना देवता ना घोर मे पी लेय।
“में तीमनी अगळ गेथा एमोरीम ने खत्तम करलो हतो, जीमनी लम्बाय देवदारु झाड़का ह़रकी, अने जीमनी ताखत वांज्या झाड़ ह़रकी हती; ते बी में उपर गेथा तीना फोळ, अने हेटा गेथा तीना मुळ्या खत्तम कर्यो। में तमने मीस्र देस मे गेथो नीकाळ लायो, अने उजाड़ी जागा मे चाळीह साल तक लीन फीरतो र्यो, के तमु एमोरीम ना देस ना हकदार्या बण जावो। में तमारा सोरा मे गेथो भगवान वगे गेथी वात केवा वाळा बणवा करीन अने तमारा थोड़ाक जुवान मे गेथा नाजीर1 बणवा करीन ठेरायो। ए ईस्रायली, ह़ु आहयु आखु ह़ाचली नी हय?” यहोवा आहयु केदलो से। पण तमु नाजीर ने ह़रु पीयाड़्या, अने भगवान वगे गेथी वात केवा वाळा ने हुकम आप्या के भगवान वगे गेथी वात नी केय। “देखो, में तमने आसम डाबही, जेम पुळा सी भरली गाडी ने हेटी डाबे। आनीन करते उतवाळ्या नाह जवा वाळा ने नाहवा नो जागो नी जड़े, अने ताखत वाळा नी ताखत कंय बी काम नी देय; अने वारलो झुमायण्यो बी आह़फा नो जीव नी बचाड़ सके; वारलो धंदली देण्यो उबो नी री सके, अने उतवाळ्यो दवड़वा वाळो नी बचे; घोड़ा पोर बहण्यो बी आह़फा नो जीव नी बचाड़ सके; अने वारला झुमायण्या मे जे जादा टेकवा वाळो हय, तीहयो बी तीहया दाड़े नांगरो2 हय्न नाह जहे,” यहोवा आसम केय।
Source notes (2)
- Footnote नाजीर मतलब, जे नान्ला गेथा भगवान ने ह़ोपला से
- Footnote नांगरो हत्यार वगर नो,
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.