Paliya Bible
दानीयल 11
“दारा नाम ना मादी राजा ना राज्य ना पेल्ला साल मे तीने मदत करवा अने ताखत आपवा नी लेदे मेंत उबो हय ज्यो।
मीस्र अने सीरीया देस ना राज्य
“हाव में तने खरली वात देखाड़ु। देख, फारस ना राज्य मे हाव तीन अळी राजा उबजहे; अने चोवथो राजा तीमनी गेथो जादा पोमतो हय्हे; अने जत्यार तीहयो धन ना कारण सी ताखत वाळो हय्हे, तत्यार आखा माणहु ने ग्रीस ना राज्य ना वीरोद मे उबा हय्हे।
“आनीन अळतेण एक अळी ताखत वाळो राजा पयदा हयहे, जे मोटी सक्ती सी राज करहे; अने तीने जे वारु लागहे तीहयुत करहे। जत्यार तीहयु मोटु हयहे, तत्यार तीनु राज्य टुटीन च्यारोव ह़ोड़ वटाय्न अलग-अलग हय जहे। आहयु राज तीनी अवल्यात ने नी जड़े अने नी तीनी सक्ती नो फरक तीहया राज पोर पड़े, काहाके तीनु राज तीनी पांह गेथु हापकीन काना बीजा ने आप देहे।
“तत्यार दखणाव ना मीस्र देस नो राजा ताखत वाळो बणहे। पण तीनो एक अदीकारी तीनी गेथो बी जादा ताखत वाळो बणीन राज करहे; आञे लग के तीनु राज्य राजा गेथु बी मोटु हय जहे। ढेरेत साल वीतवा अळतेण, आहया बेम भेळा हयहे, अने दखणाव ना मीस्र देस ना राजा नी सोरी धुराव ना सीरीया देस ना राजा ह़ाते वेवा करहे। पण तां राजा नी सोरी नी ताखत हमेसा नी चाले, अने नी तीहया राजा नु अने नी तीनु नाम चाले, पण तीहयी बयर ने पुगाड़वा वाळा अने तीनो बाह अने राखवा वाळ भेळ आखा ने मार नाखहे।
“तत्यार तीहयी सोरी ना घोराणा नो एक जणो तीना जागा पोर उठ पड़हे। तीहयो धुराव ना सीरीया देस ना राजा नी सेना पोर हमलो करहे, अने तीना कीला मे मोय भरायहे अने तीहयो तीमनी ह़ाते झुमायहे अने जीकहे। तत्यार तीहयो तीमना देवताम नी बणावली मुर्ती, अने ह़ोना-चांदी ना मोगला ठाहराम ने हापकीन मीस्र मे लीत्ती रेहे; आनीन अळतेण तीहयो कंय साल लग सीरीया देस ना राजा पोर हमलो नी करे। तत्यार तीहयो राजा दखणाव ना मीस्र देस ना राजान्तां हमलो करवा आवहे, पण हारवा नी बीक सी आह़फा ना देस मे पासो जत रेहे।
“अने तीना सोरा झुमायवा नी तीयारी करवा करीन एक मोट्ली सेना एक्ठी करहे, जे कोय नी रोक सके एवी आंजीन तेम साटीत अगी बड़हे अने लड़ाय ने तीना कीला तक लीजहे। तत्यार दखणाव ना मीस्र देस नो राजा खीजवाय्न आवहे, अने धुराव ना सीरीया देस ना राजा सी लड़ाय करहे, अने तीहयो राजा लड़ाय करवा नी लेदे एक मोट्ली सेना भेळी करहे, पण तीहयी सेना दखवरा देस ना राजा ना हात मे कर देहे। जत्यार दखणाव देस नो राजा तीनी सेना ने हरावहे, तत्यार तीनु मन घमंड सी भराय जहे, तीहयो लाखु माणहु ने मारहे, पण जीक नी सके।
“काहाके सीरीया देस नो राजा एक बीजी सेना बणाय लेहे जे तीनी पेल्नी सेना गेथी मोटी रेहे, अने कंय साल नी बाद, तीहयो पुरी तीयारी भेळ एक मोट्ली सेना ने लीन अगो बड़हे।
“तीहया दाड़ा मे घणा माणहु दखणाव ना मीस्र देस ना राजा ना वीरोद मे आवहे; तारा माणहु मे गेथा बी कंय माणहु गलत करन्या नीकळहे, जीनी से आहया दरसन नी वात पुरी हय जहे; पण तीहया ठोकर खाय्न पड़हे। तत्यार तीहयो जे तीमना वीरोद मे आवहे, तीहयो जेम चाहे तेम करहे, अने कोय बी तीनी अगळ टेक नी सके। तीहयो आह़फा ने तीहया घटाळ्ळा देस मे उबो करहे, अने तीनी पांह तीने खत्तम करवा नी सक्ती रेहे। तत्यार तीहयो जे तीमना वीरोद मे आवहे, तीहयो जेम करवा चाहे तेम करहे, अने कोय बी तीनी ह़ामने टेक नी सके। तीहयो आह़फा ने तीहया घटाळा देस मे उबो करहे, अने तीनी पांह तीने खत्तम करवा नी सक्ती रेहे।
“तत्यार तीहयो आह़फा राज्य नी आखी ताखत भेळ, थोड़ाक वारला माणहु ने ह़ाते लीन आवहे, अने आह़फा नी मरजी नी अनसारे काम कर्या करहे। तीहयो तीनी ह़ाते आह़फा नी सोरी ह़ाते वेवा बी कराय देहे, ते बी तीनी आहयी योजना पुरी नी हये अने तीनो कंय बी फायदो नी हये। तत्यार तीहयो आह़फा नो धीयान दर्या नी काठे लगाड़हे अने तीमनी मे गेथा घणा राज्य ने आह़फा ना हक मे कर लेहे, पण एक सेना नो मुख्यो तीनी रीह ने खत्तम कर देहे; अने तीनी रीह नी अनसारे तीनी सी बदलो लेहे। तत्यार तीहयो आह़फा ना देस ना कीला भणी पासो जवा करहे। पण तीहयो वाट्ये ठोकर खाय्न पड़हे, अने तीहयो खत्तम हय जहे।
“तत्यार तीना जागा पोर कोय आसवो राजा आवहे; जे राज-पाट नी बड़ाय ने बणावीन राखवा करीन फाळो एक्ठो करवा वाळो मोकलहे। पण तीहयो रीह नीता झुमाया वगरेत मरीन खत्तम हय जहे।”
सीरीया देस नो वेरी राजो
“तीना जागा मे एक बुरो माणेह उबो हयहे तीहयो राजगादी पोर बठहे पण तीहयो तीनी लायक नी रेय, ते बी तीहयो तीनी वारु-वारु वात करीन राज्य हात कर लेहे। तत्यार सेना तीनी अगळ पुरी खत्तम हय जहे, अने अमारा वायदा नो मुख्यो माणेह बी खत्तम हय जहे। काहाके तीहयो तीनी ह़ाते वायदो करवा पोर बी धोको देहे, अने थोड़ाकेत माणहु ने ह़ाते लीन सक्ती भेळ राज्य पोर राज करहे। जत्यार पोमत्ला राज्य ने आखु वारलु से लागहे, तत्यारुत तीहयो तीमनी पोर हमलो करहे; अने एवी जीक हात करहे, जेवी नी ते तीना बाह ना बाह अने नी आड़ा-बुड़ा करला हता। तीहयो लुटलु अने हापकलु ह़मान अने धन ने तीना माणहु मे वाट देहे। तीहयो कीलाम ने जीकवा करीन योजना बणावहे; पण थोड़ीकेत वार जुगु।
“तीनीन अळतेण तीहयो आह़फा नी ताखत अने हीम्मत ना कारण उतवाळ्यो हय्न एक मोट्ली सेना ने लीन दखणाव ना मीस्र देस पोर हमलो कर देहे। दखणाव ना मीस्र देस नो राजा बी तीनी ह़ाते मोट्ली सेना लीन हमलो ते करहे, पण तीनी अगळ टेक नी सके, काहाके माणहु तीना वीरोद मे योजना बणावहे। आञे तक के राजा नी लारे आपलु खाणु ने खाता हता, तीहयात माणहु तीने खत्तम करवा नी कोसीत करहे; तीनी सेना ने नहाड़ देहे, अने घणा ढेरका माणहु ने झुमायहे ता मार देहे। तत्यार तीहया बेम राजाम ना मन बुराय करवा मे लाग जहे, आञे लग के तीहया एक्ठा बहीन खाणु खावा नी टेमे बी झुट मेकहे, पण आनी सी कंय फायदो नी हये; काहाके ठेरावली टेम पोर आहयु आखु हयवा वाळु से। तत्यार धुराव देस नो राजा जादा लुटलु धन लीन आह़फा ना देस पासो जत रेहे, अने तीनु मन चोखला वायदा ना वीरोद मे हयहे, अने तीहयो आह़फा नी मरजी पुरी करीन आह़फा ना देस मे पासो जत रेहे।
“ठेरावली टेमे तीहयो पासो दखणाव ना मीस्र देस भणी आवहे, पण तीहयी पाछली वार ने तेम आहयी वार तीनो अदीकार नी चाले। काहाके कीत्तीयो ना मोट्ला ढुन्ड्या तीना वीरोद मे आवहे, अने तीहयो बीहीन पासो जत रेहे, अने चोखला वायदा पोर खीजवाय्न आह़फा नी मरजी पुरी करहे। तीहयो पासो जीन चोखला वायदा ने तोड़वा वाळा नी खबर लेहे। तत्यार सेना ना टोळा उबा हयहे, अने मजबुत चोखला जागा ने वीटाळहे, अने हमेसा नी होम बादा ने बंद कर देहे। तीहया ते ह़ीगी आवे एवी चीज ने चड़ावहे जे उजाड़ कराय देय;1 अने जे माणहे गांडा हय्न तीहया वायदा ने तोड़हे, तीमने तीहयो वारु-वारु वात कीन भटकाड़ देहे। पण जे माणहु भगवान ने जाणता हहे तीहया हीम्मत करीन काम करहे। जे माणहु ह़मजदार से, तीहया बीजा माणहु ने ह़मजाड़हे, ते बी तीहया ढेरेत दाड़ा लग तलवार वेर मरीन अने आक्ठा मे धपीन, अने गुलामी मे जाय्न अने लुटाय्न, घणा दुख मे पड़ रेहे। जत्यार तीहया दुख मे पड़हे तत्यार थोड़ीक मदत जड़हे, पण ढेरेत माणहु वारु-वारु वात करीन तीमनी ह़ाते भेसकाय जहे। अने थोड़ाक ह़मजदार माणहु बी वायदा सी पड़ जहे, तीहया आनीन करते भटक जहे के भरहा नी लेदे जाचहे अने पारखहे, तीहया तीमना भरहा मे चोखा अने उजळा करे। आहयी हालत आखरी टेम लग बणीन रेहे, काहाके आहयी आखी वात नु खत्तम हयणु ठेरावली टेम मे पुरु हयहे।
“तत्यार तीहयो सीरीया नो राजा आह़फा नी मरजी नी अनसारे काम करहे, अळी आह़फा ने आखा देवता गेथो उचो अने मोटो ठेरावहे; अने आखा देवताम ना भगवान ना वीरोद मे अलग वात केहे। जत्यार लग भगवान नी रीह कम नी हये तत्यार लग तीहया राजा नु काम पुरु हयहे; काहाके जे कंय पक्कु करीन ठान लेय तीहयु पक्कुत पुरु हयवा वाळु से।2 तीहयो नी ते आह़फा ना आड़ा-बुड़ा ना भगवान नो धीयान करे, अने नी बयरा नी, अने नी काना देवताम नी लालच करे; काहाके तीहयो आह़फा ने आखा गेथो घणो मोटो ह़मजहे। तीहयो राजा आड़ा-बुड़ा ना देवताम नी ईज्जत करवा छोड़ीन कीला मे वाळा देवताम नी ईज्जत करहे, जीमने तीना आड़ा-बुड़ा बी नी जाणे; तीमने तीहयो ह़ोनु-चांदी मोगली मणी अने मोगला भेट चड़ावीन ईज्जत करहे। तीहयो, तीहया बीजा देवताम नी मदत सी कीला पोर हमलो करहे, अने जे कोय तीने माने तीहयो तीने मोटी ईज्जत आपहे। आसवा माणहु ने तीहयो ढेरेत नी उपर राज करन्यो बणावहे, अने आह़फा ना फायदा नी लेदे आह़फा ना देस नी जागा ने वाट देहे।
“आखरी टेम मे दखणाव ना मीस्र देस नो राजा तीनी पोर हमलो करहे। पण धुराव ना सीरीया देस नो राजा तीनी पोर भुत्यान तेम ढेरेत घोड़ागाड्या चलाड़न्या अने मोट्लु ढुन्ड्यु लीन हमलो करहे; आहयी रीती सी तीहयो ढेरेत देसु मे फेल जहे, अने तीमनी मे गेथो नीकळी आवहे। तीहयो अमारा घटाळा देस मे बी आवहे, अने ढेरेत देस उजड़ी जहे, पण एदोमी, मोवाबी अने मुख्या-मुख्या अम्मोनी माणहु ना देस तीनी हात सी बच जहे। तीहयो बीजा देसु पोर बी अदीकार करवा करीन हमलो करहे अने मीस्र देस तीना हात सी बच नी सके तीहयो मीस्र ना ह़ोना-चांदी ना खजाना अने आखी मोगली चीजु नो मालीक बण जहे; अने लुबी अने कुस3 देस ना माणहु बी तीना हक मे हय जहे। तीहयी टेमे तीहयो उगण अने दखणाव भणी गेथी खबर ह़मळीन चीन्ता मे पड़ जहे, अने खीजवाय्न ढेरेत जणा ने खत्तम करवा करीन नीकळहे। तीहयो तीनु राज-पाट नु तम्बु दर्या अने घटाळ्ळा चोखला बड़ा नी वच मे उबु करहे। ते बी तीहयो खत्तम हय जहे; अने कोय बी तीनी मदत करवा करीन नी आवे।
Source notes (3)
- Cross-reference दानीयल 9:27; 12:11; मत्ती 24:15; मरकुस 13:14
- Cross-reference 2 थीसलुनीकीयो 2:3,4; परकासीतवाक्य 13:5,6
- Footnote कुस ईब्रानी मे कुस देस, नील नंदी ना पेल्ला झोर ना दखणाव मे मोट्ला ईलाका नु जुन्लु नाम से। युनानी रोम नी टेम मे आहया ईलाका ने ईथोपीया केता हता, अने आनी काकड़ मे नवला सुदान नो ढेरेत वाटो अने हमणे ना ईथोपीया (एबीसीनीया) नो थोड़ोक वाटो हतो।
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.