Paliya Bible
दानीयल 10
दानीयल ने नंदी धेड़े दरसन जड़्यो
फारस देस ना राजा कुस्रु ना राज्य ना तीसरा साल मे दानीयल पोर, जे बेलतसस्सर बी केवाये, एक वात उजन्ती कर्यो। तीहयी वात खरली हती के मोट्ली लड़ाय हयहे। तीहयो आहयी वात ने जाण लेदो, अने तीने आहयी देखली वात ह़मज आय जी।
तीहया दाड़ा मे, दानीयल, तीन हप्ता लग दुखी हयतो र्यो। तीहया तीन हप्ता पुरा हयते लग, में नी ते ह़वादु खाणु खादो अने नी मांह खादो नी ते अंगुर नो माणलो रोह पीदो, अने नी मारा मुंडे तेल लगाड़्यो।
अळतेण पेल्ला मयना ना चोव्वीसवा दाड़े जत्यार मे हीदकेल नाम नी नंदी नी धेड़े हतो, तत्यार में डोळा उचा करीन देख्यो, के सुती ना लुगड़ा पेरीन, अने उफाज देस नु ह़ोनु नु फटकु वेर केड़ बांदीन एक अदमी उबो हय र्यो। से।1 तीनु डील फीरोजा नाम ना मोगला दगड़ान तेवु, तीनु मोडु वीजळीन तेवु, तीना डोळा धपत्ला दीवान तेवा, तीना हात अने पोग पपल्तलु पीतळ ने तेवा, अने तीना बोल भीड़ नी अवाज ने तेवा हता।
तीने में दानीयल एतरोत देख्यो, अने मारा ह़ाती माणहु तीनो कंय बी दरसन नी देख्या; पण तीहया घणा कापवा बाज ज्या, अने ह़तायवा करीन नाहवा बाज ज्या। तत्यार मे एखलो रीन आहयु जुदु दरसन देखतो र्यो, आनी सी मारी ताखत कम हय जी; मारो चमकत्लो सीको बीक नी करते ह़ुक ज्यो, अने मारी मे कंय बी ताखत नी री। ते बी में तीहया अदमी ना बोल ने ह़मळतो र्यो, अने जत्यार तीहयो मने ह़मळाय पड़्यो, तत्यार में मोडा ना भरहे पड़्यो अने घणी नींदर मे भोय्मे उन्दा मोडे पड़ र्यो। ता काना नो एक हात मने छीम्यो अने मारा थतरत्ला डील ने मारी हतळी अने मांडा ना भरहे उबो कर देदो।
तत्यार तीहयो मने केदो, “ए दानीयल, ए घणा मोंगाळ्ळा अदमी, जे बोल में तने केम तीने ह़मज ले, अने ह़ुदो उबो हय, काहाके मने हमणे तारीन्तां मोकल्ला से।” जत्यार तीहयो मने आहयो बोल केदो, तत्यार में उबो ते हय ज्यो पण थतरतो र्यो।
अळतेण तीहयो मने केदो, “ए दानीयल, ना बीहे, काहाके पेल्ला दाड़े जत्यार तु ह़मजवा नी लेदे मन लगाड़्यो अने आह़फा ना भगवान नी ह़ामने आह़फा ने नानो कर्यो, तीहयात दाड़े तारा बोल ह़मळ्यो, अने में तारा बोलु ना कारण आय लागलो से। फारस राज्य नो मुख्यो ईक्कीस दाड़ा लग मारी ह़ाते झुमायतो र्यो; पण मीकाएल जे आखा मे मुख्यो से, तीहयो मारी मदत नी लेदे आयो, करीन में फारस ना राजान्तां र्यो,2 अळी हाव में तने ह़मजाड़वा आवलो से, के आखरी दाड़ा मे तारा माणहु नी ह़ु हालत हयहे। काहाके जे दरसन तु देखलो से तीहयो थोड़ाक दाड़ान अळतेण पुरो हयहे।”
जत्यार तीहयो अदमी मने आहयी वात की देदो, तत्यार में हेटु मोडु कर्यो अने होगो री ज्यो। तत्यार माणेह नी अवल्यात ने तेवो कानो मारा होट्या छीम्यो, अने में मोडु खोलीन बोलवा बाज ज्यो। जे मारी ह़ामने उबो हतो, तीन में केदो, “ए मारा मालीक, दरसन नी वात ना कारण सी में दुख उठायो, अने मारी मे कंय बी ताखत नी री। करीन मालीक नो चाकर्यो, आह़फा ना मालीक नी ह़ाते कीसम वात कर सके? काहाके मारा डील मे नी ते कंय ताखत री, अने नी कंय ह़ाह़ बचली हय।”
तत्यार तीहयो जे माणेह ने तेवो देखायतो हतो अळी मने छीम्यो अने मने ताखत आप्यो। अने तीहयो केदो, “ए भगवान ना घणा मोंगाळ्ळा अदमी, ना बीहे, तने सांती जड़े; तु ताखत वाळो रेय अने तारी हीम्मत बणीन रेय।” जत्यार तीहयो आहयु केदो, तत्यार में हीम्मत करीन केदो, “ए मारा मालीक, हाव के, काहाके तु मने हीम्मत आपलो से।”
तत्यार तीहयो केदो, “ह़ु तु जाणे के में काना कारण तारीन्तां आवलो से? हाव में फारस ना मुख्या ह़ाते झुमायवा करीन पासो जही; अने जत्यार में जही, ता ग्रीस नो मुख्यो आवहे। अळतेण जे वात खरला सास्तर मे लीखली से, तीहयी में तने देखाड़ु; तीहया मुख्या ना वीरोद मे, तमारा मुख्या मीकाएल ह़रगदुत ने छोड़ीन मारी ह़ाते उबो रेवा वाळो अळी बीजो कोय नी हय।
Source notes (2)
- Cross-reference परकासीतवाक्य 1:13-15; 2:18; 19:12
- Cross-reference परकासीतवाक्य 12:7
Paliya Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.