ARom 8:38

Amera ŋa Kanu ŋɔsɔŋ su kiyi wəyeŋ

1Ndɛkəl oŋ, kətɔrəs ka Kanu nkɛ aŋsɔtɔ teta kiciya mɔ kəyi fɛ sɔ afum aŋɛ aloŋka kɔ Yesu Krist mɔ. 2Ti disrɛ, sariyɛ sa Amera səyac əm nnɔ sariyɛ sa kiciya kɔ sa defi səyi mɔ, Amera ŋɔsɔŋ su kiyi wəyeŋ kəloŋka disrɛ kɔ Yesu Krist. 3Tes ntɛ Sariyɛ sənatɔtamɛ mɔ, bawo teyi ta dis donu tɛnayamsər si kətam kəbəc, mba Kanu kənatam ti kəyɔ. Itɔ kənakɛrɛnɛ Wan kɔn yati pəyɔ dis ndɛ dowurɛnɛ kɔ da aciya mɔ, ntɛ tɔŋsɔŋɛ Wan wəkakɔ pəyac ŋa kiciya mɔ. Ti disrɛ, Kanu kələsər kiciya nkɛ kəmbəc afum dəris mɔ. 4Kanu kənayɔ ti ntɛ tɔŋsɔŋɛ mosom mɔtɔt ma Sariyɛ fəp mɛlarɛ nnɔ səna aŋɛ səntɔkɔtɛnɛ sɔ mɛfaŋ mɔtɔyɔ dəkəcəmɛ ma dis dosu, mɛnɛ mɛfaŋ mɔtɔt m'Amera mɔ. 5Bawo aŋɛ ŋayinɛ teta dis mɔ, mes ma dis mɔ ŋancɛm-cɛmnɛ pəlarəm. Mba aŋɛ ŋayinɛ teta Amera ŋa Kanu mɔ, mes m'Amera mɔ ŋancɛm-cɛmnɛ. 6Kɔ mɛfaŋ mɔtɔyɔ dəkəcəmɛ ma dis mosumpər fum dɛbəkəc-ɛ, mɛŋkekərɛ kɔ dədefi, mba kɔ mɛfaŋ mɔtɔt ma Amera mosumpər kɔ-ɛ, dəkiyi wəyeŋ kɔ pəforu meŋkekərɛ kɔ. 7Kɔ mɛfaŋ mɔtɔyɔ dəkəcəmɛ ma dis gbəcərəm mosumpər fum-ɛ, ŋanterɛnɛ kɔ Kanu, bawo mɛfaŋ mamɔkɔ meleləs fɛ Sariyɛ sa Kanu. Mɛfaŋ mamɔkɔ mɔfɔtam ti yati. 8Aŋɛ ŋancəmɛ mɛfaŋ mɔtɔyɔ dəkəcəmɛ ma dis gbəcərəm darəŋ mɔ ŋafɔtam kəbɔt kɔ Kanu.

9Mba nəna, nəncəmɛ fɛ mɛfaŋ mɔtɔyɔ dəkəcəmɛ ma dis mamɔkɔ darəŋ, Amera ŋa Kanu ŋɔ nəncəmɛ darəŋ bawo ŋeyi nu. Kɔ fum ɔntɔyɔ Amera ŋa Krist-ɛ, ɔfɔyɔnɛ wəka Krist. 10Kance dis donu dendefinɛ teta kiciya ali ntɛ Krist eyi nu mɔ, mba ntɛ Kanu kənalɔm nu alompu mɔ, Amera ŋendesɔŋ nu kiyi wəyeŋ. 11Kɔ Amera ŋa Kanu nkɛ kəyekti Yesu dədefi mɔ ŋeyi nu-ɛ, Amera ŋaŋɔkɔ ŋendeyekti dis donu ndɛ dendefi mɔ deyi wəyeŋ.

12Awa, awɛnc im aŋa alaŋ arkun kɔ aran, antɔmpər debe, bafɔ patɔmpərɛ di mɛfaŋ mɔtɔyɔ dəkəcəmɛ ma dis de. 13Ti disrɛ, kɔ nəyinɛ doru mɛfaŋ mɔtɔyɔ dəkəcəmɛ ma dis donu-ɛ, nəndefi. Mba kɔ nənimɛ mɔyɔ mɛlɛc mmɛ dis donu dɔŋyɔ mɔ Amera Ŋecempi-ɛ, nəndeyi wəyeŋ. 14Afum fəp aŋɛ Amera ŋa Kanu ŋoŋsolɛ mɔ, awut a Kanu ŋɔ. 15Amera nŋɛ nəsɔtɔ mɔ ŋɔsɔŋɛ fɛ nu kəyɔnɛ ka acar aŋɛ ŋɛlas kənesɛ mɔ, mba awut a Kanu ŋɔ ŋɔŋsɔŋɛ nu kəyɔnɛ. Teta Amera ŋaŋɔkɔ, tɔsɔŋɛ su kəckulɛ pəpɔŋ nnɔ Kanu kəyi mɔ: «Aba!» Itɔ tatɔkɔ: «Papa kem!» 16Amera Ŋecempi ŋisərka yati ŋɔsɔŋ amera ŋosu sede sasɔkɔ: Awut a Kanu ŋ'ayɔnɛ. 17Awa, k'ayɔnɛ awut a Kanu-ɛ, andepaŋnɛ kɛ nkɛ Kanu kənasɔŋ temer kədesɔŋ afum ɔn mɔ. Kɛ kaŋkɔ, andesɔtɔ ki kɔ Krist. Ɛy, k'ampaŋnɛ kəyi dəpəcuca kɔ nkɔn-ɛ, andesɔpaŋnɛ kəyi nɔrɔ da debeki dɔn disrɛ kɔ nkɔn.

Nɔrɔ da debeki da Kanu dendementərnɛ

18Tɛcɛmcɛmnɛ tem, afɔtam kətubcɛnɛ pucuy pɔmɔkɔ kɔ nɔrɔ da debeki ndɛ Kanu kəndekɔmentər su gbasŋa tekiriŋ mɔ. Pucuy posu pempicɛ. 19Doru ndɛ Kanu kəlompəs mɔ dɛŋkar pəpɔŋ tɛm ntɛ Kanu kəndementər awut ɔn yati mɔ. 20Doru dandɛ dɛnayi kətam ka fənɔntər dəntɔf nfɛ fəntɔyɔ dəkəcəmɛ mɔ. Bafɔ doru disərka dɛfaŋ ti de, mba Kanu kəcəmbər di kətam kaŋkɔ dəntɔf, kɔ kəsɔŋɛ di kəsɔrɔgbɛkər amera, 21a Kanu kəndesikəli doru dandɛ fənɔntər nfɛ fəŋləsər di fəsɔŋɛ di kəyɔnɛ wəcar mɔ. Awa, tɛm tatɔkɔ dendepaŋnɛ kəyi yɛŋən kɔ nɔrɔ da debeki da awut a Kanu. 22Səncərɛ ti belbel: Haŋ ndɛkəl ca nyɛ Kanu kənalompəs mɔ fəp yeyi kigbis kɔ dəpəcuca pəmɔ wəran nwɛ eyi kəkom mɔ, 23bafɔ yi sona yeyi kigbis, mba səna afum a doru sɔ kigbis kɔ səndɛ dɛbəkəc haŋ tɛm ntɛ səndeyɔnɛ awut a Kanu səyɔnɛ ayi yɛŋən few mɔ. Mba səsɔtər krɛsna Amera popoc pɔcɔkɔ-cɔkɔ pa kəpocɛ nkɛ Kanu kənalɛk temer kədesɔŋ mɔ. 24Ti disrɛ, awa, kəgbɛkər amera disrɛ kɔ Kanu kəyac su. Kɔ tɔyɔnɛ patɔmpər tes ntɛ aŋgbɛkər amera mɔ-ɛ, afɔsɔwe ti kəgbɛkər amera. An'ɛgbɛkər amera tes ntɛ ɔntɔmpər mɔ-ɛ? 25Mba k'antɔtɔmpər ntɛ aŋgbɛkər amera mɔ-ɛ, aŋsektərnɛ kəkar ka ti ali pəcwon su.

26Tin tayi tɔ, Amera sɔ ŋender kədemar su dɛfan dosu disrɛ. Səncərɛ fɛ kətola Kanu pəmɔ tɔkɔ pəmar mɔ, mba Amera ŋisərka ŋontolanɛ su kɔ kigbis nkɛ kusu kəntɔtam kəloku mɔ. 27Ali məloku fɛ, Kanu kəntɛnəs tedisrɛ ta bəkəc, kəncərɛ ntɛ Amera ŋontola kɔ mɔ. Ɛy, kətəŋnɛ disrɛ kɔ Kanu, Amera ŋontolanɛ akɔ ŋayɔnɛ apus ɔn mɔ.

28Səncərɛ sɔ tes tin: Kanu kəmbəcɛ ca fəp teta pətɔt pa aŋɛ ŋambɔtər kɔ mɔ, aŋɛ kənawenɛ kədekɔtɛnɛ mɛfaŋ mɔn haŋ meyi mɔ. 29Aŋɛ Kanu kənacərɛ tɔcɔkɔcɔkɔ mɔ, ŋ'ɛnanuŋkɛnɛ sɔ kəlɛk amera kəsɔŋɛ ŋa kəwurɛnɛ kɔ Wan kɔn. Ti disrɛ Wan kɔn pəyɔnɛ coco ca awɛnc alaŋ alarəm. 30Aŋɛ Kanu kənalɛk amera kəsɔŋɛ kəwurɛnɛ kɔ Wan kɔn mɔ, kənawe ŋa sɔ. Aŋɛ Kanu kənawe mɔ, kənalɔm ŋa sɔ alompu, aŋɛ kənalɔm alompu mɔ, kɔ kəmpocɛ ŋa nɔrɔ da debeki dɔn.

Mpɛ o mpɛ pɔfɔtam kəgbɛy su kəbɔtər ka Kanu

31Awa, cəke c'antam kəloku pacepər tantɛ-ɛ? Kɔ Kanu kəyinɛ su-ɛ, an'endeter su-ɛ? 32Ali Wan kɔn yati Kanu kəyay fɛ kɔ kətɔrəs, mba k'ɛmbɛr kɔ aterɛnɛ ɔn dəwaca tetosu fəp. Ti disrɛ teta Wan kɔn endesɔŋ su kifəli mes fəp. 33An'ɛntam kəyemsɛnɛ aŋɛ Kanu kəyɛk-yɛk mɔ-ɛ? Ali fum! Kanu yati kəlɔm ŋa alompu. 34An'endetam kəboncɛ ŋa kəsarɛ kiciya-ɛ? Ali fum, bawo Krist ɔyɔnɛ nwɛ efi kɔ tɛyɛfɛ day k'ɛntimɛ, k'ɛndɛ kəca kətɔt ka Kanu pəclɛtsɛnɛnɛ su kɔ mɔ. 35Ak'ɛntam kəgbɛy su kəbɔtər ka Krist-ɛ? Mɛcɛmcɛmnɛ mɛlarəm ba? Amera kəlɛcɛ-lɛcɛ ba? Kətɔrəs nkɛ kəŋyɛfɛ nda akɔ mɔ ba? Dor ba, kətɔyɔ daka, pəwɛy-wɛy ba? Ali defi yati dɔfɔtam kəgbɛy su kəbɔtər ka Krist! 36Ancicəs ti dəYecicəs Yosoku:

«Tetam, t'andiftɛ su gbɛkcər gbɛkcər kəyɛfɛ bətbət haŋ dec dɛkalɛ.

Paclɔm su pəmɔ ŋkesiya nyɛ aŋkekərɛ dəkəfay mɔ.»1

37Mba dəmes mamɔkɔ fəp, səncepərər kəntam mi teta wəkɔ ɔmbɔtər su mɔ. 38Ɛy, iŋgbɛkər kəlaŋ ntɛ: Tɔlɔm o tɔlɔm tɔfɔtam kəgbɛy su kɔ kəbɔtər nkɛ Kanu kəmentər su dəKrist Yesu Mariki mosu mɔ. Kəlɛk defi, kəkɔ kiyi wəyeŋ, kəlɛkɛnɛ mɛlɛkɛ, akiriŋ kɔ fənɔntər fəlɔma fa dəkɔm, haŋ ntɛ teyi ndɛkəl kɔ tɔkɔ tender mɔ, 39akɔ ŋayɔ fənɔntər mɔ, sɔkət sa darenc, sɔkət sa tantɔf, kəkɔ ca nyɛ Kanu kəlompəs mɔ fəp, ali paka pɔfɔtam kəgbɛy su kɔ kəbɔtər ka Kanu!