ARom 15:13

Mətɛn kəbɔt afum mes, bafɔ mənasərka

1Səna aŋɛ səyɔ kəlaŋ kəyeŋki mɔ, pəmar pawosɛ kətɔmpər dɛfan da akɔ ŋantɔyɔ kəlaŋ kəyeŋki mɔ, ta payɔ tɔkɔ tɔmbɔt sənasərka mɔ. 2Nwɛ o nwɛ pəcyɔ tɔkɔ tɔmbɔt wɛnc mɔ, it'ɔŋsɔŋɛ pamar kɔ kəlaŋ kɔn kəbɛk. 3Ti disrɛ, Krist ɛnatɛn fɛ tɔkɔ tɔmbɔt nkɔnsərka mɔ. Mba pəmɔ tɔkɔ Yecicəs Yosoku yoloku ti mɔ: «Mɔlɔməs ma akɔ ŋaŋlɔməs məna Kanu mɔ mɛntɛmpɛn'em kəroŋ.»1 4Tɔcɔkɔ-cɔkɔ anacic dəYecicəs Yosoku teta kətəksɛ kosu. Yɔsɔŋɛ su kəbər pəcuca disrɛ kɔ kəncəpəs su bəkəc, ntɛ tɔŋsɔŋɛ sətɔmpər kəgbɛkər amera mɔ. 5Kanu nkɛ kəsɔŋ su kəbər kɔ kəcəp bəkəc mɔ, kəsɔŋɛ nu kətəŋnɛ kɔ awɛnc əm aŋa. Nətubucnɛ mɔyɔ ma Krist Yesu. 6Awa kətəŋnɛ kosu dim din disrɛ, nəkor-koru Kanu Kas ka Mariki mosu Yesu Krist.

Kibaru kətɔt nkɛ kəyɔnɛ ka afum a doru fəp mɔ

7Nəbaŋɛnɛ nəna kɔ akɔ, pəmɔ ntɛ Krist ɛmbaŋ nu, ntɛ tɔŋsɔŋɛ padekor-koru Kanu mɔ. 8Icloku nu a Krist ɛnayɔnɛ wəbəcɛ ka aSuyif ntɛ tɔŋsɔŋɛ pəmentər a kance kɔ Kanu kəŋkɔtɛnɛ mɔ, kəlas dim ndɛ kənasɔŋ atem aŋan mɔ. 9Yesu ɛnaderɛnɛ sɔ kədesɔŋɛ atɔyɔnɛ aSuyif ŋakor-koru Kanu teta nɔnɔfɔr dɔn. Pəmɔ ntɛ Yecicəs Yosoku yoloku ti mɔ:

«Itɔsɔŋɛ ntɛ indesamsər kəkorkoru kam atɔyɔnɛ aSuyif dacɔ mɔ,

indeleŋəs teta kəleləs ka tewe tam.»2

10Kɔ Yecicəs Yosoku yɔŋgbɔkərɛ sɔ kəloku:

«Atɔyɔnɛ aSuyif, nəwoləs-woləs kɔ afum aŋɛ Kanu kəyɛk-yɛk mɔ.»3

11Kɔ Yecicəs yendeŋər sɔ kəloku:

«Doru kɔrkɔr dokor-koru Mariki!

Afum fəp, nəleŋəs debeki da Kanu!»4

12Kɔ Aŋnabi Esayi nkɔn sɔ oloku:

«Wərkun wəlɔma wəka kəlɔ disrɛ ka Yisay endeder.

Fum wəkakɔ endeyɛfɛ pətɔmpər dɛbɛ da afum a tɔf ya doru fəp,

afum akakɔ ŋagbɛkər kɔ amera.»5

13Kanu nkɛ kəŋsɔŋɛ nu kəgbɛkər amera mɔ, kəlas nu pəforu kɔ pəbotu teta ntɛ nəŋgbɛkər Kanu kəlaŋ konu mɔ! Ti disrɛ fənɔntər fa Amera Ŋecempi fəndenaŋkanɛ kəsɔŋɛ nu kəgbɛkər amera.

Pəmar Pol pəcicəs pəmɔ tɔkɔ encicəs mɔ

14Awɛnc im aŋa alaŋ, nənamentər im a bəkəc yonu yentesɛ belbel, a nəncərɛ tɔkɔ pəmar pacərɛ mɔ, a nəntam sɔ kəclokɛnɛ moloku mɔtɔt aŋɛ kɔ akɔ. 15Ti disrɛ, incicɛ nu kətɔnesərnɛ disrɛ mes mɔlɔma, bawo inafaŋ kəcɛm-cɛməs nu mɔkɔ nənatəkəs mɔ. Teta kəmar kifəli nkɛ Kanu kəsɔŋ im mɔ, 16kəsɔŋ'em kəyɔnɛ wəbəcɛ ka Yesu Krist teta aŋɛ ŋantɔyɔnɛ aSuyif mɔ. Ti disrɛ ilas kəyɔ yɛbəc yopus yɔn pəmɔ wəloŋnɛ teta kədəŋk Kibaru Kətɔt ka Kanu nnɔ atɔyɔnɛ aSuyif ŋayi mɔ, ntɛ tɔŋsɔŋɛ akakɔ ŋayɔnɛ poloŋnɛ mpɛ pɔmbɔt Kanu, mpɛ Amera Ŋecempi ŋompus mɔ. 17Isɔtɔ kəyekti domp teta yɛbəc nyɛ iyi kəbəcɛ Kanu mɔ. Intam kəloku ti teta kəloŋka kosu disrɛ kɔ Yesu Krist. 18K'intɔnesərnɛ kəloku ka tes tɔlɔma-ɛ, ti tɔyɔnɛ gbəcərəm ntɛ Krist ɔyɔn'em kəsɔŋɛ atɔyɔnɛ aSuyif kəleləs Kanu mɔ. Ɔsɔŋ'em ti dəmoloku kɔ dəmes mem mɔyɔ 19kɔ Kanu kəmentər fənɔntər fɔn. Kənayɔ fi dəmɛgbɛkərɛ ma dəKɔm, dəmes mɛwɛy-wɛy mɔpɔŋ kɔ dəfənɔntər fa Amera ŋɔn. Kəyɛfɛ Yerusalɛm haŋ kəbəp ka dare da Iliri, indəŋk mofo mamɔkɔ fəp Kibaru Kətɔt teta Krist. 20Mba ntɛ inafaŋ belbel mɔ, idəŋk Kibaru Kətɔt sədare nsɛ səntɔcərɛ tewe ta Krist mɔ gbəcərəm. Inayɔ tatɔkɔ ntɛ tɔŋsɔŋɛ ta idəŋkər Kibaru Kətɔt afum aŋɛ ŋanane ki katin mɔ, bawo inafaŋ fɛ kətɛl dalɛ ndɛ inatɔbɔf mɔ. 21Tɔkɔ Yecicəs Yosoku yoloku mɔ, t'incəmɛ darəŋ:

«Akɔ antɔdəŋkər tetɔn mɔ ŋandenəŋk kɔ,

kɔ aŋɛ ŋanatɔne pacloku tetɔn mɔ, ŋandecərɛ kɔ.»6

Pol oloku kəfaŋ kɔn kəkɔ Rom

22Yɛbəc yayɛ yɛyams'em kəkɔ ka nde ndoronu Rom. 23Mba ndɛkəl yɛbəc yem yelip oŋ atɔf ŋa Kresi. Bawo tɔsɔtɔ meren mɛlarəm ntɛ pənabas im kəkɔnəŋk nu mɔ, 24ifaŋ kədeyɔ ti k'indekɔ atɔf ŋa Ɛspaŋ-ɛ. Iyɔ amera kənəŋk nu k'indekɔ di-ɛ, iŋgbɛkər sɔ kəmar konu amera itam kəkɔ di, kɔ teyi-ɛ, indekɔyi nu dacɔ tɛm tɔlɔma. 25Mba krɛsna ikɔ Yerusalɛm, ikɔ ibəcɛ alaŋ aŋɛ ampusɛ Mariki dare dadɔkɔ mɔ. 26Kəloŋkanɛ ka alaŋ aŋɛ ŋayi Masedon kɔ Akaya mɔ, ŋantəŋnɛ kəbelər daka daŋan ŋapocɛ di kəmar disrɛ alaŋ atɔyɔ daka a Yerusalɛm aŋɛ ampusɛ Mariki mɔ. 27Ŋantəŋnɛ kəmar ŋa, mba ntɛ tɔyɔnɛ kance mɔ, bafɔ kəmar kɔ, mba debe yati dɔ ŋantɔmpərɛ ŋa. Alaŋ a kəloŋkanɛ ka Masedon kɔ ka Akaya ŋayɔnɛ fɛ aSuyif, mba ŋasɔtɔ pətɔt pa Kanu teta aSuyif aka Yerusalɛm, ŋa sɔ pəmar ŋayerɛnɛ kɔ aSuyif daka daŋan. 28K'indelip mes mamɔkɔ, ickenɛ kəloŋkanɛ ka alaŋ a Yerusalɛm kəfɛk kaŋkɔ-ɛ, indekɔ Ɛspaŋ icepərɛnɛ ndoronu. 29K'indekɔ ndoronu-ɛ, incərɛ a kətolanɛ pətɔt fəp ka Krist kɔ səndekɔ.

30Awɛnc im aŋa alaŋ, pasiməs kɔ nənde kəctolan'em Kanu fɔr kiriŋ-ɛ. Ilɛtsɛnɛ nu ti teta Mariki mosu Yesu Krist kɔ kəbɔtər nkɛ Amera Ŋecempi ŋɔsɔŋ su mɔ. 31Nətola Kanu ta ibɛrɛ aSuyif atɔlaŋ Krist dəwaca nde atɔf ŋa Yude. Nətola sɔ Kanu kəsɔŋɛ kəloŋkanɛ ka alaŋ aSuyif aŋɛ ampusɛ Mariki mɔ ŋawosɛnɛ bəkəc yɔtɔt kəmar nkɛ iyi kəkɛrɛ ŋa Yerusalɛm kəyɛfɛ ka nda atɔyɔnɛ aSuyif ŋayi mɔ. 32Ti disrɛ intam kəder nde ndoronu pəbotu disrɛ, kɔ Kanu kəwosɛ-ɛ, iŋesəm pipic kɔ nəna. 33Kanu nkɛ kəŋsɔŋ pəforu mɔ kəyi nu dacɔ! Amina!