2 Timote 4

Məkawandi Toloku ta Kanu

1Ti tɔsɔŋɛ ntɛ isom'am ti Kanu kɔ Yesu Krist fɔr kiriŋ, nwɛ endekiti ayi wəyeŋ kɔ afi, tewe ta Krist nwɛ endementərnɛ kɔ dɛbɛ dɔn disrɛ mɔ: 2Məgbəc kəkawandi ka Toloku Tɔtɔt ta Kanu tɛm fəp pəyeŋki kɔ pəforu disrɛ, məlompɛ afum, məmentər ŋa meciya maŋan, məcəpəs ŋa bəkəc, mətəksɛ ŋa, məyɔ mamɔkɔ fəp kəkar disrɛ. 3Bawo tɛm tendebəp ntɛ afum ŋantɔdefaŋ kəcərɛ tɔlɔm o tɔlɔm ta kətəksɛ kəcempi mɔ. Mɛfaŋ maŋan ma doru mɔ ŋandecəmɛ darəŋ, atəksɛ alarəm ŋɔ ŋandesɔtɔ, aŋɛ ŋande ŋacloku ŋa mɔkɔ mɔmbɔt ŋa kəne mɔ. 4Ŋandesak kəcəŋkəl kance ŋaccəŋkəl taruku tɛpər. 5Mba məna məsumpərnɛ mamɔkɔ fəp, məbəknɛ pəcuca, məlas yɛbəc yam ya kəkawandi ka Kibaru Kətɔt, məbəc yɛbəc yam belbel teta Kanu.

6Bawo ntɛ tɔyɔnɛ temi mɔ, tɛm tem tefi tɛmbəp, indeder kəyɔnɛ poloŋnɛ pa wɛn mpɛ aŋloŋnɛ Kanu mɔ. 7Isiməs teta Kanu belbel. Ilip kəkɔtɛnɛ tosom tem fəp. Imɛŋkərnɛ kəgbɛkər kəlaŋ kem Kanu. 8Ndɛkəl oŋ kəway ka kəsiməs kəŋkar im. Kəway kəlompu kaŋkɔ kɔ Mariki wəlompu nwɛ endekɔkiti afum mɔ, endekɔsɔŋ im dɔsɔk da kiti. Endekɔsɔŋ ina kəway kaŋkɔ, mba endekɔsɔŋ sɔ ki akɔ ŋaŋkar kəbɔtər disrɛ tɛm ntɛ endeder mɔ.

Mosom mɛlpəs

9Məsɛp kədebəp im nnɔ katəna. 10Awa Demas ɛsak im bawo teta doru t'esektərnɛ, ɔŋkɔ Tɛsaloni. Kresen nkɔn ɔŋkɔ Kalat, kɔ Tit ɔŋkɔ Dalmati. 11Luk gbəcərəm səyi oŋ dɛ. Məkɛrɛnɛ Mark, bawo ɔyɔ dəkəcəmɛ dɔpɔŋ nnɔ yɛbəc yem yeyi mɔ. 12Ntɛ tɔyɔnɛ ta Tikiko mɔ, isom kɔ Efesi. 13Kɔ məncder-ɛ, məkɛrɛn'em duma da kəfe ndɛ inasak Torowas ndena Karpɔs mɔ, səbuk, pənaŋkanɛ yecicəs yɔkɔ ancic dəkata mɔ.

14Alɛksandər wəgbɛc eyi kəmentər deyeŋki abəkəc dɔpɔŋ nnɔ iyi mɔ. Mariki endesɔŋ kɔ kəway ka yɛbəc yɔn. 15Məna sɔ məkɛmbərnɛ kɔ bawo ence mɛtəksɛ mosu pəpɔŋ.

16Tɔcɔkɔ-cɔkɔ ntɛ inayi kəyacnɛ dəŋkiti mɔ, ali fum ɛnader fɛ pəmar im, fəp fənasak im. Ta Kanu kəsumpərɛ ŋa ti. 17Mba Mariki ɛnader pəmar im, k'ɔsɔŋ im sɔkət səcamɛ toloku tɔn pəpɔŋ ntɛ tɔŋsɔŋɛ atɔyɔnɛ aSuyif ŋane ti mɔ. K'owur'em kusunuŋku dəkusu. 18Mariki ɔfɔdesak kəcwur'em pəlɛc fəp, endebɛrs'em sɔ dɛbɛ dɔn dəntɔf nde dəKɔm. Pakor-koru kɔ doru o doru. Amina.

Kiyif kəlpəs

19Iyif Pirsila, Akila kɔ aka kəlɔ disrɛ ka Onesifɔr. 20Erasto eyi Kɔrɛnt, k'isak Tirofimo dare da Mileto ta ɛntamnɛ-ɛ. 21Məsɛp kəder a dɛrəŋ dɛcbəp. Ebulus, Pudens, Linus, Kəlodiya kɔ awɛnc su aŋa alaŋ fəp ŋayif əm.

22Mariki pəsol'am, kəmar kifəli ka Kanu kəyi fəp fonu kəroŋ.