Tit 1

Kəyif ka Pol Tit

1Ina, Pol iyɔnɛ wəcar wəka Kanu kɔ wəsom ka Yesu Krist. Kanu kənacəmbər im kəsɔŋɛ afum aŋɛ kənayɛk-yɛk mɔ kəgbɛkər ki kəlaŋ. K'ɛncəmbər im sɔ kəsɔŋɛ afum kəcərɛ kance nkɛ kəsol kɔ kəcəmɛ mɛfaŋ ma Kanu darəŋ mɔ. 2Ti disrɛ ŋantam kəgbɛkər amera kəyi wəyeŋ kəŋan ka doru o doru. Kanu nkɛ kəntɔyemɛ mɔ, kənasɔŋ su temer ta ki kəyɛfɛ ta doru dɛntacop-ɛ. 3Ntɛ tataka ntɛ Kanu Wəyac kosu ɛnabonc tɛmbəp mɔ, k'ementər su Toloku tɔn nnɔ tosom ntɛ ɛnacəmbər im kədesamsər mɔ. 4Tit, məna incicɛ. Wan kem yati məyɔnɛ nnɔ kəgbɛkər kəlaŋ nkɛ kəloŋka su mɔ. Intola Kanu Kas kosu kɔ Krist Yesu Wəyac kosu, ŋasɔŋ əm kəmar kifəli kɔ pəforu!

5Inasak əm mokuru ma Krɛt ntɛ tɔŋsɔŋɛ mələpəs kəlompəs mes fəp mmɛ mɛncəmɛ di mɔ. Kəloŋkanɛ ka alaŋ a Yesu a dare o dare pəmar məcəmbər abeki alɔma kəyɔnɛ akiriŋ pəmɔ tɔkɔ inasom əm ti mɔ. 6Pəmar wəbeki nwɛ o nwɛ pəyinɛ pəlompu disrɛ fɔr y'afum fəp kiriŋ, pəyɔnɛ wos ka wəran wəkin1. Pəmar awut ɔn ŋayɔnɛ agbɛkər Kanu kəlaŋ, pəmar fɛ sɔ ŋayɔnɛ aŋɛ aŋyemsɛnɛ kəyinɛ dɛyamayama kɔ kətɔleləs mɔ. 7Ti disrɛ, pəmar akiriŋ a kəloŋkanɛ k'alaŋ aŋɛ ŋantɔmpər mes ma Kanu mɔ, ŋalomp fɔr y'afum fəp kiriŋ. Ta ŋadot banca, ta ŋatɔmpər mɛtɛlɛ, ta ŋayɔnɛ acis, ta ŋayɔnɛ ayeŋki bəkəc, ta ŋatɛn kəsɔtɔ daka kətɔlomp disrɛ. 8Mba pəmar ŋayɔnɛ abaŋ atɔt afum aŋɛ ŋander ndaraŋan mɔ, ŋabɔtər tɔkɔ tentesɛ mɔ, ŋayɔnɛ akɛmbərnɛ kəyɔ mes mɛlɛc, ŋalomp. Pəmar ŋayɔnɛ sɔ asektərnɛ Kanu kɔ asumpərnɛ kətɔyɔ pəlɛc. 9Pəmar abeki akiriŋ aka kəloŋkanɛ ka alaŋ a Yesu ŋasumpər toloku ntɛ tɛlarɛ kəlaŋ, ntɛ towurɛnɛ kɔ tɔkɔ anatəksɛ ŋa mɔ. Ti disrɛ, abeki akakɔ ŋantam kəyeŋksɛ akɔ bəkəc mɛtəksɛ mɔtɔt, ŋatam sɔ kəmentər pəlɛc pa akɔ ŋaŋgbɛkəl mɛtəksɛ maŋan mɔ.

10Bawo alarəm ŋayi aŋɛ ŋayeŋk səbomp mɔ. Ŋacpempɛ moloku mmɛ mɔntɔyɔ dəkəcəmɛ mɔ, ŋactiŋkər afum kəgbaymɛ kance. Ayɛfɛ dinɛ d'aSuyif dacɔ aŋnəŋk afum akakɔ pəlarəm. 11Pəmar məmɛp ŋa cusu, bawo mɛtəksɛ mɔkɔ pəntɔmar mɔ, imɔ ŋayamsərɛ wɔlɔ fəp teta kəsɔtɔ kəŋan daka kətɔlomp disrɛ. 12Fum wəlɔma nwɛ aKrɛt ŋanalɔm Sayibɛ mɔ ɛnaloku:

«AKrɛt, ayemɛ ŋɔ!

Ŋanayɔnɛ kəyɛfɛ tɛm tobol-bolu ayeŋki bəkəc,

acɛlək ŋɔ aŋɛ ŋancɛm-cɛmnɛ cor cəŋan gbəcərəm mɔ.»

13Tɔkɔ wəKrɛt wəkakɔ oloku mɔ tɔyɔnɛ kance. Awa, məgbəŋ-gbəŋər ŋa yati, ntɛ tɔŋsɔŋɛ kəlaŋ kəŋan kəcəp mɔ. 14Pəmar ŋakɛmbərnɛ moloku mɛpər ma aSuyif. Ta ŋaleləs mosom ma afum aŋɛ ŋambɛr kance kumunt mɔ. 15Aŋɛ ŋayɔ bəkəc yosoku mɔ, ca fəp yɔsɔk nnɔ ŋayi mɔ. Mba atɔsɔk bəkəc kɔ atɔlaŋ, ca fəp yɔtɔsɔk nnɔ ŋayi mɔ. Dosoku daŋan domp kɔ mera yaŋan yɔsɔk fɛ. 16Ŋacdɛrəm a ŋancərɛ Kanu, mba ŋacgbɛkəl kɔ dəmɔyɔ maŋan, bawo ayɔ mes mɛlɛc mmɛ Mariki enter mɔ ŋɔ ŋayɔnɛ, ayeŋki səbomp ŋɔ, ŋafɔtam sɔ kəyɔ pətɔt mpɛ o mpɛ.