Tit 2

Kətəksɛ ka atem kɔ atembəra

1Mba məna Tit, pəmar məloku ntɛ tosol kɔ kətəksɛ kəlompu mɔ. 2Məloku atem a pəmar ŋakɛmbərnɛ kəyɔ mes mɛlɛc, ŋaleləsnɛ, ŋackɔtɛnɛ mera kəyɔ pətɔt. Məloku ŋa sɔ a pəmar ŋacəmɛ kance darəŋ kəlaŋ kəŋan disrɛ, kəbɔtər disrɛ, kɔ kəsektərnɛ kəbər kəyeŋki disrɛ. 3Tin tayi tɔ nnɔ atembəra ŋayi mɔ, məloku ŋa a pəmar ŋatɔmpər mɔyɔ mɔtɔt mmɛ mɔmbɔt Kanu mɔ, ta ŋaloku pəlɛc pa akɔ, ta ŋasɔŋnɛ member. Pəmar ŋactəksɛ tɔkɔ tentesɛ mɔ. 4Ti disrɛ, atembəra ŋactəksɛ oŋ aran ayecəra kəbɔtər awos kɔ awut aŋan, 5pəmar ŋacepərɛnɛ doru kəlompu kɔ kəsumpərnɛ disrɛ, ŋacəmɛ yɛbəc ya wɔlɔ waŋan, ŋayɔnɛ abɔt mera kɔ aleləs awos aŋan. Awa kɔ teyi-ɛ, afɔlɔməs Toloku ta Kanu.

Kəyeŋkəs ka bəkəc ya atɛmp

6Məmɛŋkəs sɔ atɛmp kəkɔtɛnɛ mera kəyɔ pətɔt. 7Məna yati məyɔnɛ totubucɛnɛ tɔtɔt dəmɔyɔ mam. Pəmar mɛtəksɛ mam mosol kɔ kance, mɔsɔŋɛ akɔ kəleləs mi. 8Pəmar moloku mam molomp, ta pacgbɛkəl mi, ntɛ tɔŋsɔŋɛ aterɛnɛ asu ŋayinɛ malap ta ŋantam kəloku pəlɛc pin tetosu mɔ-ɛ. 9Məloku acar pəmar a ŋaleləs mariki maŋan dəmes fəp. Pəmar ŋatɛn kəbɔt, ŋayay kəcgbɛkəlɛnɛ kɔ mariki maŋan, 10ta ŋakiyər ŋa mpɛ o mpɛ. Mba ŋamentərnɛ dəmɔyɔ maŋan fəp acar atɔt ŋɔ ŋayɔnɛ, ntɛ tɔŋsɔŋɛ ŋaleləs tɛtəksɛ ta Kanu Wəyac kosu mɔ.

Kəmar kifəli ka Kanu

11Awa, ti disrɛ Kanu kəmentər kəmar kifəli kɔn nkɛ ɛŋyacɛ afum a doru fəp mɔ. 12Kəmar kifəli kaŋkɔ kəntəksɛ su a səlukus mes mɛlɛc kɔ mɛfaŋ ma doru darəŋ. Ti disrɛ, səntam kəyinɛ doru tɛm tosu tantɛ tɔkɔ pəmar mɔ, pəlompu kɔ kətɔmpər alom ŋa kəsektərnɛ teta Kanu. 13Ti tɔsɔŋɛ ntɛ səŋkar pəbotu mpɛ səŋgbɛkər amera mɔ: Nɔrɔ da debeki da Kanu kəpɔŋ kɔ da Wəyac kosu Yesu Krist dendementərnɛ. 14Yesu ɛnasɔŋnɛ nkɔnsərka tetosu, ntɛ tɔŋsɔŋɛ pəwurus su pəyamayama, pəsɔŋɛ su kəyɔnɛ afum asoku aŋɛ ŋayɔnɛ akɔn mɔ, payɔnɛ asiməs kəyɔ pətɔt. 15Tantɛ tɔ pəmar a mətəksɛ kətam kam disrɛ fəp, məyeŋkəs afum bəkəc, kɔ pəyɔnɛ fɛ ti mənal ŋa. Ta fum o fum pəter əm, ta pəgbɛkəl əm.