Tit 3

Ntɛ pəmar kəloŋkanɛ ka alaŋ kəkɔt mɔ

1Məcɛm-cɛməs alaŋ fəp a ŋaleləs abɛ kɔ akiriŋ. Pəmar a ŋaleləs ŋa, ŋalompəsnɛ sɔ kəcyɔ mɔyɔ mɔtɔt. 2Ta alaŋ ŋalɔməs fum o fum, ŋayay kəgbɛkəlɛnɛ. Pəmar ŋadɛncɛ, ŋamentər sɔ dobotu daŋan mera nnɔ afum fəp ŋayi mɔ. 3Bawo tɔcɔkɔ-cɔkɔ, səna sɔ, sənayinɛ dotoŋkulu, deyeŋki səbomp, səcgbaymɛ dɔpɔ dɔtɔt. Mɛfaŋ ma dis dosu kɔ ma doru fəp mɛnatasərnɛ su. Sənayinɛ kəyi wəyeŋ kəlɛc, sənayɔ kəraca. Sənayɔnɛ afum aŋɛ alɔma ŋanter mɔ, kɔ səna yati sənaterɛnɛ aŋɛ kɔ akɔ. 4Mba ntɛ Kanu Wəyac kosu ɛnamentər dobotu amera kɔ kəbɔtər kɔn afum fəp mɔ, 5kɔ kəyac su, bafɔ teta kəlas kosu ka mɔyɔ mmɛ mowurɛnɛ kɔ pəlompu mɔ de, mba nɔnɔfɔr d'ɛnayɔnɛ su. Kanu kənayacɛ su kəgbət kosu dəromun nkɛ kənasɔŋ su kəwur doru kəfu, kɔ Amera Ŋecempi nŋɛ ŋɔŋsɔŋ su kiyi wəyeŋ kəfu mɔ. 6Amera Ŋecempi ŋaŋɔkɔ, Kanu kənayerəs su ŋi pəlarəm kəmar ka Yesu Krist Wəyac kosu. 7Ti disrɛ, kəmar kifəli ka Kanu kəlɔm su alompu, səntam kəyɔnɛ alɛk kɛ nnɔ kəgbɛkər amera ka kiyi wəyeŋ ka doru o doru kəyi mɔ. 8Toloku ta kance tɔ tantɛ, ifaŋ a məgbəcərnɛ moloku mamɔkɔ pəlarəm, ntɛ tɔŋsɔŋɛ aŋɛ ŋaŋgbɛkər kəlaŋ kəŋan Kanu mɔ ŋasɔŋnɛ yati kəyɔ mɔyɔ mɔtɔt. Awa, tantɛ tetesɛ kɔ tɔyɔ dəkəcəmɛ nnɔ afum fəp ŋayi mɔ. 9Mba məbɔlɛnɛ moloku mɔtɔyɔ dəkəcəmɛ: Kəgbɛkəlɛnɛ teta dəkəcəmɛ d'atem, teta Sariyɛ, kɔ kəyɛfərɛnɛ. Bawo mes mamɔkɔ mɔfɔmar afum tɔlɔm o tɔlɔm. 10Fum nwɛ endegbɛyəs kəloŋkanɛ ka alaŋ mɔ, məcɛm-cɛməs wəkayi katin kɔ pəyɔnɛ fɛ ti-ɛ kəmɛrəŋ. K'ɔntɔnen'am-ɛ, awa, məbɔlɛnɛ kɔ kəloŋkanɛ ka alaŋ. 11Məncərɛ ti, a fum nwɛ eyi tatɔkɔ mɔ, ɛŋgbaymɛ dɔpɔ dɔtɔt. Pəcyɔ pəlɛc, ombocərnɛ kiti nkɔnsərka. 12K'indesom Artemas, kɔ pəyɔnɛ fɛ ti Tikiko nnɔ məyi mɔ-ɛ, məsɛp kəbəp im dare da Nikopolis, bawo difɔ incɛm-cɛmnɛ kədecepərɛnɛ dɛrəŋ. 13Mədɛm belbel Senas wəcərɛ sariyɛ, kɔ Apolos teta marənt maŋan ntɛ tɔŋsɔŋɛ ta paka o paka pobut ŋa mɔ. 14Pəmar awɛnc asu alaŋ sɔ ŋatəkəs kəsiməs kəyɔ mes mɔtɔt teta kəlompəs ka mɛfaŋ maŋan mɛgbəcɛnɛ, ta ŋadeyinɛ kiyi wəyeŋ kətɔsɔŋ yokom yɔtɔt. 15Aŋɛ ŋayi kɔ ina mɔ fəp ŋayif əm. Məyif'em apaŋnɛ asu kəlaŋ aŋɛ ŋambɔtər su mɔ. Kanu kəsɔŋɛ a kəmar kifəli kɔn kəyi fəp fonu kəroŋ.