2 Timote 3:16

Pəcucanɛ pa mataka mɛlpəs

1Məcɛm-cɛmnɛ belbel a tɛm tɛlpəs tendecuca. 2Bawo afum ŋandefaŋɛ sona səŋan gbəcərəm, ŋabɔtər pəsam, ŋadot banca, ŋalɛknɛ, ŋaclɔməs Kanu, ta ŋalɔm akombəra aŋan tɔlɔm o tɔlɔm-ɛ, ŋafɔtam kəyif barka, ŋafɔde ŋacleləs ca nyɛ ampusɛ Kanu mɔ, 3ŋandeyeŋk bəkəc, ŋafɔde ŋacyɔnɛ nɔnɔfɔr, ŋacfor, ta ŋantam kəsumpərnɛ-ɛ, ŋander ŋacyɔ pəlɛc, aterɛnɛ a pətɔt ŋɔ, 4atiŋkər afum ŋɔ, ŋafɔkɛmbərnɛ kəyɔ mes, kədot banca kəkəfəs ŋa. Mɛfaŋ ma doru mɔmbɔt ŋa mɛtas Kanu. 5Ŋambaŋɛnɛ kəcəmɛ mɛfaŋ ma Kanu darəŋ, mba ntɛ tɔyɔnɛ mɔ, ŋance fənɔntər fa kəlaŋ kətɔt. Awa məbɛr afum akakɔ kumunt. 6Alɔma ŋayi afum akakɔ dacɔ aŋɛ ŋambɛrɛ dəwɔlɔ ŋactiŋkər aran aŋɛ kəlaŋ kəŋan kətɔcəp mɔ ŋasarɛ kiciya. Ŋaŋgbaymɛ dɔpɔ dɔtɔt, teta mɛfaŋ mɛlɛc maŋan fəp. 7Aran akakɔ ŋaŋsɛp kətəkəs tɛm fəp, mba ŋafɔtam kəcərɛ tɔlɔm o tɔlɔm ta kance. 8Tɔkɔ Yanɛs kɔ Yambrɛs1 ŋanagbɛkəl Musa mɔ, itɔ afum akaŋɛ ŋayi kəgbɛkəl kance. Mera yaŋan yɛlɛcɛ, kəlaŋ kəŋan kəyɔ fɛ dəkəcəmɛ. 9Mba mɛtam maŋan mɔfɔdebɔl sɔ kətɛnc, bawo dotoŋkulu daŋan andecərɛ di fɔr ya afum fəp kiriŋ, pəmɔ tɔkɔ pənayi afum akɔ iloku nu taŋan mɔ.

Məsektərnɛ tɔkɔ mətəkəs mɔ

10Mba məna mənagbɛkərɛ mɛtəksɛ mem, tɔkɔtɛnɛ tem mes, mɛfaŋ mem, kəlaŋ kem, kətɔbɛlkər kem, kəbɔtər kem kɔ kəbər kem. 11Mənanəŋk sɔ kətɔrəs teta kəlaŋ kem kɔ pəcuca mpɛ inacepərɛnɛ sədare sa Antiyɔk, Ikoniyon kɔ Listər mɔ. Kətɔrəs kəre k'inatɔcepərɛnɛ-ɛ? Mba mamɔkɔ fəp Mariki oncwur'em mi. 12Awa, aŋɛ ŋantɔmpər alom ŋa kəsektərnɛ teta Kanu kəloŋkanɛ disrɛ kɔ Yesu Krist mɔ, ŋandecərɛ kətɔrəs teta kəlaŋ kəŋan. 13Mba afum alɛc kɔ abaŋɛnɛ kətəksɛ kance ŋa ŋande ŋactor kətor dəm dəpəlɛc. Ŋactiŋkər akɔ, ŋactiŋkərnɛ sɔ yati. 14Mba məna, məsektərnɛ mɔkɔ məntəkəs kɔ mɛcərɛ mmɛ məsɔtɔ kəlaŋ kam disrɛ mɔ. Məncərɛ atəksɛ akɔ məsɔtər mi mɔ. 15Kəyɛfɛ ntɛ mənafɛtɛ mɔ kɔ məncərɛ Yecicəs Yosoku, nyɛ yɛntam kəsɔŋ əm kəcərɛ kəkɔtɛnɛ mes kətɔt mɔ. Ki kəndekɔsɔŋ am kəfis teta kəgbɛkər kəlaŋ kam Yesu Krist. 16Bawo ndena Kanu Yecicəs Yosoku fəp yɛyɛfɛ. Yɔyɔ dəkəcəmɛ kətəksɛ ka kance, yɛntəksɛ afum kəsak kəciya-ciya, yolompəs mɔyɔ mɔkɔ mɛlɛcɛ mɔ, Yecicəs Yosoku yɛtəks'am kəcepərɛnɛ doru pəlompu disrɛ, 17ntɛ tɔŋsɔŋɛ fum nwɛ ampusɛ Kanu mɔ, pəctam kəyɔ belbel yɛbəc yɔtɔt fəp fɔr ya Kanu kiriŋ mɔ.