1 ATɛsaloni 5:11

1Awɛnc im aŋa alaŋ: Ntɛ tɔyɔnɛ ta tɛm kɔ dec ndɛ Mariki endeder mɔ, ali ancicɛ fɛ nu ti, 2bawo nəncərɛ ti belbel: Dɔsɔk da Mariki dendeder pəmɔ ntɛ wəke ender pibi mɔ. 3Kɔ afum ŋandeloku: «Pəforu kɔ kəbum kosu kəmbɛk!» Awa, kələsər kənder ŋa pəmɔ ntɛ pucuy pender wəran wəbɛkəs, ŋayi ta ŋantam kəmulpɛ mɔ. 4Mba nəna awɛnc im aŋa alaŋ, bafɔ pibi pɔ nəyi disrɛ, dɔsɔk dadɔkɔ dɔfɔdebəp nu pəmɔ wəke. 5Fəp fonu awut aka pəwaŋkəra kɔ dɔsɔk ŋɔ nəyɔnɛ. Bafɔ pibi kɔ kubump kəyɔ su. 6Ti disrɛ, ta padirɛ pəmɔ akɔ, mba payi kətɔdirɛ disrɛ, pacgbɛkərɛ sɔ. 7Awa, aŋɛ ŋandirɛ mɔ, pibi pɔ ŋandirɛ. Aŋɛ ŋancis mɔ, pibi pɔ ŋancis. 8Mba səna aŋɛ səyɔnɛ aka pəwaŋkəra mɔ, pəmar pacsumpərnɛ kəyɔ mes. Kəgbəkər kəlaŋ kosu Kanu kɔ kəbɔtərɛnɛ kosu aŋɛ kɔ akɔ kəbum su pəmɔ yamos ya dəkəwan yombum asɔdar mɔ. Pagbɛkər amera a Kanu kəndeyac su pəmɔ ntɛ təmbo pa wəsɔdar pombum kɔ dəkəwan mɔ. 9Awa, Kanu kəwe fɛ su kədewɛnərɛ su mɛtɛlɛ mɛwɛy-wɛy ma kiti kɔn, mba kəwe su ntɛ tɔŋsɔŋɛ pasɔtɔ kəyac ka Mariki mosu Yesu Krist mɔ. 10Yesu efinɛ tetosu ntɛ tɔŋsɔŋɛ, payi wəyeŋ, kɔ pəyɔnɛ fɛ ti pafi, payi kɔ nkɔn mɔ. 11Ti disrɛ, nəcəpsɛnɛ bəkəc, nəyeŋksɛnɛ kəgbɛkər kəlaŋ nəna kɔ akɔ pəmɔ tɔkɔ nəyi ti kəyɔ mɔ.

Mosom mɛləpəs kɔ kəyif

12Awɛnc im aŋa alaŋ, ntɛ tɔ səwer nu: Nəleləs akɔ ŋambəc yɛbəc yeyeŋki nu dacɔ, ŋayɔnɛ akiriŋ anu tewe ta Mariki mɔ, ŋactəksɛ nu dɔpɔ dɔtɔt. 13Nəmentər ŋa pəlel pɛlarəm kɔ kəbɔtər teta yɛbəc yɔkɔ ŋaŋyɔ mɔ. Nəyinɛ aŋɛ kɔ akɔ pəforu disrɛ.

14Awɛnc im aŋa alaŋ, səŋwer nu sɔ ntɛ: Nəcnal afan, nəccəpəs bəkəc ya akɔ ŋantɔcəp bəkəc belbel mɔ, nəcmar akɔ ŋantɔyeŋk dis mɔ, paŋaŋnɛnɛ afum fəp. 15Pakɛmbərnɛ, ta nwɛ o nwɛ pəyɔ pəlɛc kəluksɛ ka ayɛk ŋa pəlɛc! Mba nəctɛn kəyɔnɛnɛ pətɔt tɛm fəp nnɔ akɔ kɔ fəp fəyi mɔ.

16Pəcbɔt nu dɔsɔk o dɔsɔk, 17ta nəsak kətola Kanu tɛm fəp, 18nəcyif sɔ ki barka teyi ntɛ o ntɛ nəŋyi disrɛ mɔ. Itɔ Kanu kəwer nu kəyɔ, nəna aŋɛ nəloŋkanɛ kɔ Yesu Krist mɔ.

19Ta nəyamsɛ Amera Ŋecempi kəbəc, 20ta nəfani moloku ma sayibɛ. 21Nəkɔkcɛ mes fəp, nəmɛŋkərnɛ mɔkɔ mentesɛ mɔ, 22mba nəkɛmbərnɛ ntɛ o ntɛ tɛlɛcɛ mɔ.

23Kanu ka pəforu kisərka kəsɔŋɛ papus nu məlməl tetɔn. Pəmɛŋkərnɛ amera, afɔkəl kɔ dis donu, ntɛ tɔŋsɔŋɛ ta andetam kənalɛ nu ntɛ o ntɛ dɔsɔk ndɛ Mariki Yesu Krist endeder mɔ. 24Nwɛ eŋwe nu mɔ, wəleləs danapa ɔfɔ, nkɔn endeyɔ mamɔkɔ fəp.

25Awɛnc im aŋa alaŋ nətolanɛ su Kanu.

26Nəyifɛnɛ, nəmakərɛnɛ pəmɔ dɛwɛnca.

27Ifaŋər nu tewe ta Mariki, a pakaraŋ areka ŋaŋɛ awɛnc su aŋa alaŋ fəp fɔr kiriŋ.

28Kəmar kifəli ka Mariki mosu Yesu Krist kəyi nu kəroŋ!