Alkitab Bahasa Ansus
Lukasi 1:37
Verse 37 is marked below, with the whole chapter around it. Read from the start
Kawio retenang
Theopilus au we moi, yau Lukasi etoi arera nina we au, wo nyontarai madu eserai imbaro entoi pitau we Yesusi nyari dona na tane pandurapa. Parari we entopana we tata na we pampong, we endeoa na endekami na we weesayau Allai ne Arera Topiyana ma aneutatua pitaubai wawau na we mai na retenangpa, imbaro ekutu we etoi kepana na we mai we au. Imbaro anemuaoa we pitaubai we etintanyau au yana wepitarai toapeina.
Werangdoana we Yoanisi ingkai nyani dawini
Na awe Herodesi we mananu baba na Yudea, nyontarai Imami pei anong pei Zakariai ria na marandang Imami Abiai. I ne wawini tato ria na Imami baba Haruni ne mandarong pai we anong pei Elisabeti.
Asaru mamo umai na Allai renapa. Kong urong parari pitau we Allai dona, mae urong sasari wa. Mana une kumai pei wa, wo Elisabeti anekarawai kong piana asaru umbe paituangto.
Na a peana, Abiai ne marandang wadi etadu esanomi mae Zakariai we anong riu pi we imami na we Allai renawau. Mae a we engkai aikara parari we Imami etona pa, imbaro kemang Imami matei we riupi, andi aikara deduti, imbaro ingkai yuara nyunung pikika kemenyani na Allai ne Manu Mamarang rarongpa. Impaina Zakariai andi deduta pa. Na a yani Zakariai yua nyunung pikika na Sen ne Manu rarongpa mae nyontarai tau we empandura na riwau kong entandau. Toyana Seni ne mampang pei, denyawi we Zakariai, doa na wara dowatang na pata we dinunung pikika kemenyani nai wadi. Zakariai reo mampang wadi pa, tentuma kong metai. Mana mampang wadi kewio weiya doyo, “Zakaria ye! Remo motaipe, wo piwe tondau weapa piana Seni yepatara mae donato. Mae Elisabeti wawimui, ingkai dawing kumai muang pei we au, mae ingkai wawi anong pei Yoanisi. Au ingkai morarising kia mae kawasa emararising tutu kumai wadi, na awe nyani miotuturi wane. Wo i ingkai beba na Sen renawau, mae ingkai dunung angguri wa kong wang mamunawa. Mae donung na Sen Duainunung Mamarang, na a retenang nyaina nyani aneaiwawing pa. I ingkai dong nyontarai Israeli madu pei entaweri wu Allai, Mamarang enempai. Mae i ingkai ria pampong Seni, mae ne paya parari nabi Eliai na pampong pa. Imbaro dong tamania esanerarong taweri wu ene kumai kong inyosane na nyontarai we emai wa, wu we esanetatua nyontarai we emai, mae i dong kui marandang we mei pei etamang we Seni. Interi Zakariai kewio wu mampang wadia doyo, “Topitotoi ingkai parariapa? Wo yau ewe paituangto, neu wawing wanei tato ne ape babaeato.” Mampang wadi kewio wuria doyo, “Yau Gabrieli. Yau yoana Allai renawau, erupatari diru ayari. Allai demi yau toninama imbaro etopang Arera Weweng nina ne we au.” Pitau we etopana ninane ingkai pararia mana anemusara wa, impaina woreng tamung kio a we pitau ninane tawa na wane interi kowio. Toyanapa nyontarai tau, etamang Zakariai pampang. Embekaeng wo Zakariai nyai na Allai ne Manu Mamarang rarong woroi kapara. Meti mari kewio pea wa wu yara wa, mana piana esanetatuata we piana reo pianeato na Manu Mamarang rarong. Interi dong pararia wu yara, wo woretamung. Toyana piwe riu wau ra kaito, teweri wu manu wanea. We pira a pea asaru Wawini Elisabeti deyoape, impaina yembai awaruring i denyawi wa. Doyo, “Nina mamo piwe Sen dona we yau, wo a nei Sen dupi neu mamayane na kawasa endenawau.”
Werandoana we Yesusi nyani Mariai dawini
Na awe Elisabeti piana deiyoa yembaipe bowonang, interi Sen Allai demi ne mampang Gabrieli riawu bendari koiri na nu Galilea, anong pei Nasareti. Ria wu karawing dina anongpe Mariai. I wo dengkong muang pei wami. Mariai wo weanong we Yusupi, na mandarong Dauti.
Topiana mampangnei, yua na Mariai ne manunei, riuwara wei doyo, “Tabea! Bodu, Sen ne wewempa, Sen nyai konta au.”
Mariai tentuma tarao kawio wau, aneng dutang waweri, kawio pa totoai tonina? Mampang nei kewio we Mariai doyo, “Remo motaipe, au bodu weweng kong Allai peidi. Ingkai boiyoa, buawing kumai muang pei, wauwi anong pei Yesusi. I wo ingkai beba, esawi we Allai we tedai raweina ne Kumai, mae Sen Allai doni we mananu parari, ne woriai Dauti. Ingkai we mananu baba na Yakupi ne tapung woriai wanea kio woroi-woroi, mae ne Maring pa wata weyuwi sopisoane.”
Mariai riuwara we mampangpai doyo, “Pitau ninane ingkai topino, wo edidau wami.”
Mampangpai riuwara we Mariai doyo, “Sen Duainunung Mamarang wiao au, paya na Allai dewu au tutu kumai we buawini yanipai, esawi we Kumai Mamarang, Allai Antung. Mae tarai, Elisabeti nemeta pai tato, dontayoa kumai muang pei na ne awe paituangbau, piana ne yembaipe awaru wonang pinini, we etoyo anekarawai. Wo na Allai mamo ea taworawa.”
Impaina Mariai doyo, “Toyana mamo, Sen ne woming di yau, we topana pa pararia.” Interi mampang wadi ria warui.
Mariai ria piaio Elisabeti
Woroi wami mae Mariai ria wu bendari pei na Yudea na raora we wi pa. Na yana i yua wu Zakariai ne manu wadi, interi i dong tabea we Elisabeti. Mae toyana Elisabeti tarao tabea na Mariai, kumai we niai na aneaiwawing pai merarising kong yuira. Mae Elisabeti Sen Duainunung Mamarang niai nai, impaina Elisabeti kewio doyo, “Mariaie! Allai dong beng we au warui wawing neya kuira, mae kumai we buawini pai ingkai dedu muang ria Sen pai. Matei di yau, aidonane Sen nyani ria wu yauma pa? Wo na awe bong tabea pai, kumai we nyai na aneuaiwawing nei yuira mae merarising. Au bodu wewengpa tutu piana anemusisarao piwe Seni sopana we aupa ingkai taoa.”
Mariai rioi rarung deparanding Allai
Interi Mariai doyo,
“Yeparanding Seni na aneurarong nei,
Mae yau emararising na duainunung nei tutu Allai neu Mampariri pina,
wo I rekakepang nyontarai emayea ne yau!
Na a nei wu a taubai we rama wane dakami tau entopana etoyo, ‘yau emai raweina.’
Tutu Allai We Piaya doyao mariwa baba we yau tutu
Anompa wo Mamarang.
Mae newempa yuwio
nyontarai we endoa oi paya.
I deniau paya we dona na warangpa,
Mae I sota nyontarai we embesompari.
I pi mananu wauya warui paya enempa,
mae riuwa nyontarai we esaneai waya.
I dong roweang weweng we nyontarai we embawi,
mae demi nyontarai we enepipau paya entaweri na kakawiri.
I piata ne woming Israeli paya,
tutu aneao ne apa we doni we ne apusi woriai pai.
Seni wo perandeni wa, apa we sopana
topino, aneung Abrami
tutu ne tapung woriaipai wata weyuwi sopisoane.
Wepira yembaipe toru Mariai niai kong Elisabeti, interi teweri wu ne manupai ya.
Yoanis Pembaptisi nyani dawini
Interi a wau ra mai we Elisabeti we do dawing, i tato dawing kumai muang pei. Impaina manu wararei wauya kong neta mantaung entaraoa we Sen ne weweng pa we Elisabeti, mae ya tato eto emararising konti. Awe kumai wadi ne a pe injatang pina, nyontarai we empau endama we eto embe sunati1. Ya esau tamani anong wau na kumai wadi impaina anong Zakariai, mana nyani doyo, “Wengki! I metoni anong pei Yoanisi.”
Weendama paya entopana wei etoyo, “Na mune mandarong paya, nyontarai peiwa anong toyana pa wa.” Interi ya etong kamang we kumai wadi tamani we etintutani, tamane nyosanong totoai bona we kumai neipa. I dewa kami we etingtoia, interi entoi kawio wau, “Anongpei Yoanisi.” Mae ya wo esarokutuya na pitau wawau. Na a yanito Zakaria kewio naria ea, mae deparinding Allai. Impaina nyontarai taupa ya we enaina raora yani ematai kong entuang esomi we Seni, tutu arera wawau embuwua tate raora wi rewowai Yudea tantenang. Mae nyontarai paya engkai we entaraoa, esanetatuata kong engkawio etoyo, “Topitotoi we kumai nini?” Tutu Sen warangpa deruari.
Zakariai sopang arera na Seni
Zakariai, Yoanisi tamani, Allai Duainunung Mamarang pai yumaoi impaina, i sopang arera na Seni. Kewio doyo,
“Mararising we Seni,
Allai nyontarai Israeli!
Wo I riama piata Ne kawasa paya
kong pikaya.
I dona we tata Pariri we piaya,
na mandarong Dauti, Allai ne woming pai.
Na awe rampa piana Allai kewio
kamana na ne nabi diri ya paya
we, warapika tata warui weembemarowa we tata
kong warui nyontarai we emaidi tata ene paya pa.
Allai
denyau anerarong we wieng pai we
tantapumi woriaipai, kong ingkai
dong parari ne apa Mamarang pai.
Apa yani sopani we
Abrami, tane woriaipai. Allai derekamana we ingkai
periri tata warui
weembemarowa we tata imbaro tantandau wei mae tandeo tamatai wa,
anemai tasomi wei mae tambaua anerarong na
awe tambeng na nunei.
Neu kumaipa au, ingkai esau au we nabi na
Allai We Tedairaweina, au etami au
pompong Seni we boning rang pai wei.
Au ingkai topang
kamana we kawasa paya, wo Allai ingkai periri ya tutu dupirandeni ya warui sasari enempa.
Impaina, tarai tane Allai
anewiwu kong
anemanyayang interi I riama we periri tata.
Parari wo we tepira na ayarima,
dong ne wedea wadi we nyontarai wauya engkai we embeng na we
berorang kong ematai. I dingtata wu rang wepiboki.”
Zakariai ne kumai wadi beba toyei kong anerarong piaya. Mae i nyai na we mapang wau kio awau ramapa, i meti ma denyawi dong parari piwe deduta dona na rai Israeli enerabuang pa.
Source notes (1)
- Footnote Sunati mamo muang apai enempa engkuturewuwai parari Arera na Weraung Musaipa
Alkitab Bahasa Ansus. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.