1 Tesalonika 5

Etamamang we Seni riama

1Mana parari a totoi kai Seni riamapa mamo antontoi kamana we manetapa mia wa. 2Tutu mantau mia mendearona pitarai wo awe Seni riamapa parari mananapi we riana diru.1 3Na awe nyontarai esanetatuata etoyo: Tau nina pa wemadori kia kong wemai, mana na tantuma ya etadu uirapa kong emuna-munai. Piyana pa tawa tantuma parari wawing we yui we do dawing, impaina matei tato wewua tepira wa. 4Mana maneta pa mia membeng na berorang wadi wa, impaina ayani tawa tantuma we mia parari mananapi wa. 5Tutu mia mengkai mamo kumai dea di mia kong kumai raida. Tata wo nyontarai diru di tata wa ete nyontarai we tanai na berorang di tata wa 6Impaina tandeo tatena pe parari nyontarai ea ya pe, mana tatamamang na tasaneaiwa tata. 7Wo nyontarai we etena pa mamo etena na awe dirupa kong we emaeru paya tato, emaeru na awe diru pa, ya etamamang wa. 8Mana tata, we nyontarai raida ne tata, tasanetatuatapa andi dea. Tata wo andi tandoao Seni kong tasanewiwu we nyontarai peaya kong tasanesara na pitarai we Allai ingkai periri tata. Yana pa aino parari pimamuna we dongwido tata warui piberorang pa.2 9Tutu Allai kemang tata we tatadu mambabatipai wa, mana we tatadu pariri we rana tane Sen Yesus Kristusi pa, 10we piana keda we tata, imbaro na awe riama pa, tambengne rai ete, piana tangkada ete, ingkai tambeng kuira konti. 11Impaina mia metanyau waweri mia kong metong mesanerarongpa paya waweriao mia parari pitoai piana menari pa.

Uara

12Antorewara kong maneta pa mia imbaro mentuang we nyontarai emariwa kangkuna we mia pa, we etara mia kong we embe mananu na Seni we mia pa kong we etanyau mia pa; 13Metongsaiwa ya na mentuang weya kong na mesanewiwu ya, tutu pitoai piana enari we mia pa. Membeng na wemadori nyontaraipei wu nyontaraipei eaya pa. 14Antoru tato antoranyau manetapa mia, we mesua nyontarai we embeng na etenakakai ya, mendiroi we esaneaidu paya, memba we empaya wa paya, mesaneaiwara we nyontarai wauya engkai. 15Mendekakepana imbaro nyontarai pea endeo etoamuna waweriao ya pe. Mana meserai pampang we menari wewengpa we nyontarai paya engkai. 16Memararising pampang. 17Kong mentandau pampang. 18Mentopang piboki na pitoi ea, wo yana pai Allai anewea na Kristusi Yesusi we mia pa. 19Mendeo mentampi mariwa Duainunung Mamarang pai pe. 20Kong mendeo mesanepapi kawio kakera we Duainunung Mamarang pai sopana we miapa pe. 21Mentou pipatotoi ea mae mendu wewengpa. 22Mempika menetarai pa warui pitau we mamunapa.

Tabea

23Wento Allai mantauni we dong madori we tata pai, nyari mia memamarang tantenang.

Wento I dongwido mia, dongwido menetaraipa, mesanetatuatapa konta menduainunungpai imbaro we kapapo katea wa na awe tane Sen Yesus Kristusi ria teweri eama pa. 24Allai we yau mia pai nukepana, impaina I tato ingkai dong parari pitau yana pa ki. 25Neta pa mia, mentandau we antoru.

26Mentopana we taneta paya we antosanemiwiwu ya mae antotopang tabea mamarang we ya kuira.

27Na Seni anompa yutana na kangkuna we mia, imbaromi metatora kawio arera nina pa we taneta endoaoa paya kuira.

28Wengto tane Sen Yesus Kristusi dong ne weweng dona pinoma pa we mia.